Коршиносони тоҷик масъалаҳои ҷомеаи шаҳрвандӣ ва истифода аз таҷрибаи ҷаҳониро баррасӣ намуданд

Ноябрь 27, 2019 15:26

ДУШАНБЕ, 27.11.2019./АМИТ «Ховар»/. Имрӯз дар Маркази тадқиқоти стратегии назди Президенти Ҷумҳурии Тоҷикистон таҳти  унвони  «Масъалаҳои ҷомеаи шаҳрвандӣ дар Ҷумҳурии Тоҷикистон: арзёбии мафҳум, ҷанбаҳои миллӣ ва истифода аз таҷрибаи ҷаҳонӣ» ҳамоиш доир гардид.

Тавре мухбири АМИТ «Ховар» иттилоъ медиҳад, дар он намояндагони Дастгоҳи иҷроияи Президенти Ҷумҳурии Тоҷикистон, вазорату идораҳо, пажӯҳишгоҳҳои илмию тадқиқотӣ, воситаҳои ахбори омма,  коршиносон ва дигар ташкилоту муассисаҳои  марбута иштирок намуданд.

Директори Маркази тадқиқоти стратегии назди Президенти Ҷумҳурии Тоҷикистон Диловар Қодирзода  зимни ифтитоҳи ҳамоиш  зикр кард, ки  ҳоло дар ҷумҳурӣ 7 ҳизби сиёсӣ ва зиёда аз 2 ҳазору 500 созмонҳои ҷамъиятӣ бо дархосту пешниҳодҳои созандаи худ дар ҷомеа таъсиргузор буда, дар доираи талаботи оинномавии худ ба хотири пешрафти соҳаҳои гуногуни сиёсиву иқтисодӣ ва иҷтимоиву фарҳангии давлат саъю кӯшиш намуда истодаанд.

Бе ҷомеаи шаҳрвандӣ, — гуфт Диловар Қодирзода, истиқлоли давлатиро тасаввур кардан номумкин аст. «Зеро ин соҳаи фаъоли шаҳрвандон, ки мақсадҳои иқтисодӣ, маданӣ, иҷтимоӣ ва сиёсиро пайгирӣ мекунад, ба назорати фаъолияти давлат равона шудааст»,- афзуд мавсуф.

Зикр гардид, ки робитаи пайвастаи давлат бо ниҳодҳои ҷомеаи шаҳрвандӣ гарави устуворӣ ва фаъолнокии рушди истиқлоли давлатӣ мебошад.

«Пайдоиши созмонҳои ҷамъиятӣ ва фаъолияти густурдаи онҳо яке аз нишонаҳои демократия дар Ҷумҳурии  Тоҷикистон мебошад. Аз ин рӯ рушди минбаъдаи чунин раванд муҳим ба шумор меравад»,- афзуд  Диловар Қодирзода.

Мушовири калони бахши Ёрдамчии Президенти Ҷумҳурии Тоҷикистон оид ба масъалаҳои рушди иҷтимоӣ ва робита бо ҷомеа Муҳаммадӣ Сафолзода таҳлили масъалаи баррасишавандаро муҳим ва саривақтӣ шуморид.

Муҳаммадӣ Сафолзода бо таҳлили амиқи масъалаи баррасишаванда зикр намуд: «Бештари масъалаву вазифаҳое, ки дар паёмҳои ҳарсолаи Президенти мамлакат муҳтарам Эмомалӣ Раҳмон ва Стратегияи миллии рушди Ҷумҳури Тоҷикистон барои то соли 2030   инъикос гардидаанд, ба туфайли ҳамкориву мусоидати ҷомеаи шаҳрвандӣ, хосатан, яке аз рукнҳои фаъоли он — Шӯрои ҷамъиятии Ҷумҳурии Тоҷикистон амалӣ карда мешаванд».

Дар ҷомеаи озод ва демократии Ҷумҳурии Тоҷикистон, — гуфт мавсуф, таваҷҷуҳи аҳолӣ ба ҳаёти сиёсиву иҷтимоӣ бештар гардида, кӯшиши иштирок дар дигаргунсозии ҳаёти ҷомеа  яке аз шартҳои ноил шудан ба пешрафту тараққиёт ва суботу амният мебошад.

Гуфта шуд, ки ба ғайр аз Конститутсия дар Ҷумҳурии Тоҷикистон як қатор санадҳои меъёриву ҳуқуқие қабул гардидаанд, ки барои фаъолияти ҷомеаи шаҳрвандӣ заминагузор мебошанд.

Бояд зикр намуд, ки 27 январи соли 2017 Пешвои миллат муҳтарам Эмомалӣ Раҳмон дар маҷлиси Шӯрои ҷамъиятии Ҷумҳурии Тоҷикистон суханронӣ намуда, аз ҷумла чунин иброз доштанд: «Ҷомеаи шаҳрвандӣ воситаи муҳими таъсиррасонӣ ба раванди ислоҳоти сохтори давлатдорӣ ва такмили қонунгузорӣ буда, барои бартараф кардани камбудиву мушкилоте, ки дар сохтори идораи давлат ба назар мерасанд, кумак мекунад. Қисми зиёди ташкилоту созмонҳои ғайриҳукуматӣ дар доираи ҳамин талабот дар ҷараёни муҳокимаи санадҳои меъёрии ҳуқуқӣ, баргузории раъйпурсиву интихобот, ислоҳоти сохторӣ ва дигар чорабиниҳои сиёсиву фарҳангӣ мунтазам иштирок карда, то ба имрӯз як қатор ташаббусу пешниҳодҳо амалӣ гардиданд, ки онҳо, дар маҷмӯъ, ба таҳкими пояҳои давлатдорӣ, суботи сиёсӣ, тавсеаи фарҳанги сулҳ ва такмили қонунгузорӣ мусоидат намуданд».

Ёдовар мешавем, ки иштирокдорони ҳамоиш оид ба мавзӯъҳои таҷрибаи бунёди ҷомеаи шаҳрвандӣ дар мамлакатҳои Аврупо ва аҳамияти он барои Тоҷикистон, ҷанбаҳои истилоҳии мафҳуми созмонҳои ғайридавлатӣ, нақши ваҳдати миллӣ дар таҳкими ҷомеаи шаҳрвандӣ ва дигар мавзӯъҳо мубодилаи афкор намуданд.

Шукӯҳи ДАЛЕР,
АМИТ «Ховар»

Ноябрь 27, 2019 15:26

Хабарҳои дигари ин бахш

ҚОНУН «ДАР БОРАИ ТАРБИЯИ ВАТАНДӮСТИИ ШАҲРВАНДОН». Доир ба он байни хизматчиёни давлатӣ омӯзиш баргузор шуд
Табибони тоҷик дар Конгресси 17-уми осебшиносон-ортопедон дар Ҳиндустон иштирок намуданд
«Тоҷиксуғурта» соли гузашта дар ҳаҷми зиёда аз 5,8 миллион сомонӣ маблағи суғуртавӣ пардохт намуд
Соли 2022 барои таҷдиду барқарорсозии 42 иншооти оби нӯшокӣ беш аз 14 миллион сомонӣ ҷудо карда шуд
НИШАСТИ МАТБУОТӢ. Соли гузашта 770 ҳолати вайрон намудани Қонун «Дар бораи танзими анъана ва ҷашну маросим дар Ҷумҳурии Тоҷикистон» ба қайд гирифта шуд
ФАВРӢ! Роҳи мошингарди Душанбе-Чаноқ кушода шуд
Дар мақомоти Ваколатдор оид ба ҳуқуқи инсон лоиҳаи 50 санади меъёрии ҳуқуқӣ мавриди омӯзиш қарор гирифт
Маркази миллии қонунгузорӣ барои такмили механизми татбиқи қонунҳо беш аз 600 таклиф пешниҳод намуд
IRS ХАБАР МЕДИҲАД. Дар километрҳои аз 52 то 73-юми роҳи Душанбе-Чаноқ 45 тармаи хурду бузург фаромад
Соли 2022 дар Тоҷикистон номи 56 шаҳраку деҳот иваз карда шуд
Агентии обуҳавошиносӣ: «Соли гузашта 365 пешгӯиҳои якшабонарӯзӣ тартиб дода шуд, ки дурустии онҳо 93%-ро ташкил медиҳад»
ТАВАҶҶУҲ! Кумитаи ҳолатҳои фавқулода ва мудофиаи гражданӣ аз резиши сангу фаромадани тарма ҳушдор медиҳад