Медведев бо аъзоёни Шӯрои иттилоотии ИДМ мулоқот намуд

Ноябрь 26, 2019 10:00

ДУШАНБЕ, 26.11.2019 /АМИТ Ховар/. Дирӯз, 25 ноябр Раиси Ҳукумати Федератсияи Россия Дмитрий Медведев бо  ширкаткунандагони  ҷаласаи XXVII   Шӯрои  роҳбарони агентиҳои давлатии иттилоотии ИДМ (Шӯрои иттилоотии ИДМ) мулоқот намуд, иттилоъ медиҳад АМИТ «Ховар» бо истинод ба ТАСС. Ёдовар мешавем, ки дар кори ҷаласаи Шӯрои иттилоотии ИДМ узви Шӯро, директори АМИТ «Ховар» Саидалӣ Сиддиқ иштирок намуд.

Яке аз мавзӯъҳои мулоқот- ин  баррасии  лоиҳаҳои муштарак бахшида ба 75-солагии Ғалаба дар ҶБВ солҳои 1941-1945  буд. «Ин ҷашни умумии мост, ки ба хотири он халқҳои моро зарур омад ҳуқуқи зиндагии наслҳои ояндаро ҳимоя кунанд, — гуфт зимни ҷаласа раиси Шӯрои иттилоотии ИДМ, директори генералии ТАСС Сергей Михайлов. — Мо ҳақ надорем   ҷасорати  бузурги онҳоеро, ки дар шадидтарин ҷанг дар таърихи инсоният ғалаба кардаанд, фаромӯш  созем». Ӯ иброз дошт, ки агентиҳои иттилоотӣ барои ба наслҳои имрӯза ва оянда расонидани таърих, сабақҳо ва арзишҳои айёми ҷанг, хотираи қаҳрамононаи ҳамдиёронамон ва амалҳои ваҳшиёнаи фашизм дорои иқтидори эҷодӣ ва техникӣ мебошанд.

Михайлов иттилоъ дод, ки ТАСС намоишгоҳи густурдаи аксҳоро таҳти унвони «Матбуот дар ҷанг» омода мекунад, ки аз аксҳои хабарнигорони агентиҳо ва бойгонӣ иборат хоҳад буд. Намоишгоҳ дар Толори марказии намоишҳои «Манеж» сурат мегирад. Директори генералии Агентии иттилоотии «БелТА» Ирина Акулович доир ба омодагӣ ҷиҳати иштирок дар лоиҳаи ТАСС ва инчунин дар бораи аллакай пешниҳод намудани даҳҳо акси беназир хабар дод.

Раиси раёсати Агентии давлатии иттилоотии Озарбойҷон «АзерТАҷ» Аслан Асланов нақши муттаҳидсози солгарди Ғалабаро зикр намуд. «Ғалаба дар ҷанги Бузурги Ватанӣ-ин барои ҳамаи халқҳои собиқ Иттиҳоди Шӯравӣ муштарак аст ва ҳар кадоме аз халқҳо, аз ҷумла мардуми Озарбойҷон  дар ин пирӯзӣ саҳм гузоштаанд», — гуфт Асланов. Ба гуфтаи вай, «АзерТАҷ» барои ҷамъоварии маводи бойгонӣ, ки дар бораи иштирокчиёни ҷанг ҳикоят мекунанд, кор бурда истодааст. Дар баробари ин, Асланов пешниҳод намуд, ки ҷаласаи навбатии Шӯрои иттилоотӣ соли 2020 ба муносибати 100-солагии агентии иттилоотии Озарбойҷон дар Боку гузаронида шавад.

Директори Агентии давлатии иттилоотии Арманистон «Арменпресс» Арам Ананян дар бораи корҳои иттилоотӣ-ҷустуҷӯӣ дар доираи омодагӣ ба ҷашни Ғалаба сухан гуфт. Ӯ зикр намуд, ки дар агентӣ аксҳои нодире ёфт шуданд, ки дар он беш аз 60 сарбоз ва афсар аз ҷумҳуриҳои гуногуни ИҶШС таҷассум ёфтаанд. Меҳмони фахрии Шӯро, Директори генералии Агентии миллии иттилоотии Ӯзбекистон Абдусаид Кучимов дар бораи саҳми ҷумҳуриҳо дар ғалабаи Ҷанги Бузурги Ватанӣ ёдовар шуд. Вай инчунин гуфт, ки соли оянда 75-солагии Ғалаба яке аз мавзӯъҳои асосии агентӣ хоҳад буд.

Ёдовар мешавем, ки Шӯрои иттилоотии ИДМ моҳи ноябри соли 1995 таъсис ёфтааст. Ба ҳайати он роҳбарони хадамоти давлатии иттилоотии Озарбойҷон, Арманистон, Беларус, Қазоқистон, Қирғизистон, Молдова, Россия ва Тоҷикистон шомил мебошанд. Ҷаласаи навбатии Шӯро моҳи марти соли 2020 дар шаҳри Бокуи Озарбойҷон баргузор мешавад.

Фаъолияти Шӯрои иттилоотии ИДМ ба таъмини ҳамгироӣ ва ҳамкории давлатҳои аъзои ИДМ дар соҳаи иттилоот, фароҳам овардани шароити мусоид барои интишори бемамониати иттилоот ва табодули самараноки таҷрибаи фаъолияти касбӣ, инчунин таҳкими шарикии иттилоотӣ равона карда шудааст.

ДАР АКС: Раиси Ҳукумати Федератсияи Россия Д. Медведев бо иштирокдорони ҷаласаи 27-уми Шӯрои роҳбарони агентиҳои давлатии иттилоотии ИДМ. 25 ноябри соли 2019. Москва, қароргоҳи ТАСС. Акси ТАСС.

Ноябрь 26, 2019 10:00

Хабарҳои дигари ин бахш

Гӯштини тоҷикӣ мақоми байналмилалӣ гирифт
ЭҲЁИ ҶАШНИ САДА ДАР ТОҶИКИСТОНИ СОҲИБИСТИҚЛОЛ. Мулоҳизаҳои мушовири бахши Ёрдамчии Президенти Ҷумҳурии Тоҷикистон оид ба масъалаҳои рушди иҷтимоӣ ва робита бо ҷомеа Масрур Абдуллозода
ТАВОНО БУВАД, ҲАР КӢ ДОНО БУВАД (андешаҳо перомуни Паёми Президенти Ҷумҳурии Тоҷикистон ба Маҷлиси Олии Ҷумҳурии Тоҷикистон)
ОБШАВИИ ПИРЯХҲО-МУШКИЛИ ҶАҲОНӢ. Пешниҳодҳо ва саҳми дурахшони Президенти Тоҷикистон дар масъалаи пешгирии маҳви пиряхҳои сайёра назаррас аст
ПАЁМ НАВИДЕ ФАРАҲБАХШ. Бардоштҳои мушовири бахши Ёрдамчии Президенти Ҷумҳурии Тоҷикистон оид ба масъалаҳои рушди иҷтимоӣ ва робита бо ҷомеа Муҳиддин Пайшанбезода дар ин бора
SIM-КОРТҲОЯТОНРО ДАР ВАҚТАШ АЗ ҚАЙД ГУЗАРОНЕД! Хабарнигори АМИТ «Ховар» бори дигар ба таваҷҷуҳ мерасонад, ки барои ин кор кадом ҳуҷҷатҳо заруранд
ЭҲТИЁТ: САКТАИ ДИЛ АЗ САРДӢ! Табиби қалб ба АМИТ «Ховар» доир ба сабабҳои авҷ гирифтани бемориҳои дилу рагҳо дар фасли зимистон маълумот дод
БИШКЕК ДАР САДРИ РӮЙХАТИ 100 ШАҲРИ ДОРОИ ҲАВОИ ОЛУДА ҚАРОР ГИРИФТ. Миёни чанд шаҳри ИДМ, ки ба ин феҳрист шомил шудаанд, ягон шаҳри Тоҷикистон нест
АМАЛИ ХАЙР ВА ИБРАТОМӮЗ! Дар Мастчоҳ ба беш аз 200 нафар кормандони идораи роҳ ва хоҷагии манзилию коммуналӣ, ки дар паи рафъи пайомадҳои бориши барф буданд, хӯроки гарм дода шуд
Дар Тоҷикистон нархи гази моеъ тақрибан 50% поён рафт
БА БИНОҲО НАЗДИК НАШАВЕД! КҲФ ва МГ аз сокинон даъват ба амал овард, ки чораҳои бехатариро риоя намоянд
ПАЁМИ ФАРОГИР ВА ДУРНАМОИ РУШДИ КИШВАР БО ТАШАББУСҲОИ ҶАҲОНӢ. Мулоҳизаҳои Президенти Академияи миллии илмҳои Тоҷикистон дар ҳошияи Паёми Сарвари давлат