Чаро ноболиғон ба оворагардӣ машғул шуда, ба ҷиноят даст мезананд? Баррасии ин мавзӯъ дар барномаи таҳлилии «Бозтоб»-и Радиои «Ховар»

 ДУШАНБЕ, 21.01.2020 /АМИТ «Ховар»/. Таълиму тарбияи фарзанд, ба таҳсил фаро гирифтану соҳибмаълумот намудани онҳо яке аз вазифаҳоест, ки волидайн бевосита дар ин самт масъуланд. Ҳарчанд баъди солҳои низоъҳои дохилӣ шароити зиндагӣ  вазнин буд, аммо бо мурури замон  ҷомеа пеш рафта, дар соҳаи маориф тамоми шароит ҷиҳати таълиму тарбия ва соҳибмаълумот гардонидани фарзандон фароҳам гардидааст.

Таҳлилҳо  нишон медиҳанд,  яке аз масъалаҳое, ки дар ҷомеа то ҳол  ҳалли худро наёфтааст,  ин оворагардии бархе аз кӯдакону наврасон ва ҳатто баъзе аз  мактаббачагон мебошад. Зеро яке ба шустани наклиёт машғул асту дигаре ба пакетфурӯшӣ ва сеюмин то нимашаб машғули бозиҳои компиютерӣ.

Чӣ ноболиғонро водор сохтааст, ки даст ба чунин амалҳо зананд? Чунин амалҳо ба инкишофи ноболиғон чӣ таъсири равонӣ мерасонад? Чаро Қонуни Ҷумҳурии Тоҷикистон “Дар бораи масъулияти падару модар дар таълиму тарбияи фарзанд” аз ҷониби бархе волидайн риоя намешавад?

Посух ба ин саволҳо ва баррасии ҳама паҳлӯҳои мавзӯи мазкур дар барномаи навбатии «Бозтоб» рӯзи 22 январ, соати 09:30, (такроран) 17:30 ва 21:30 аз радиои «Ховар». Муҳаррир ва ровии барнома Моҳинави Наврӯз.

«Бозтоб»-ро пайгирӣ намоед!