Дар Донишгоҳи техникии Тоҷикистон донишҷӯён аз 10 давлати дунё таҳсил мекунанд

ДУШАНБЕ, 28.01.2020. /АМИТ «Ховар»/. Дар Донишгоҳи техникии Тоҷикистон ба номи академик М.  Осимӣ 39 нафар донишҷӯи хориҷӣ аз 10 кишвари гуногун, ба мисли  Ӯзбекистон, Қирғизистон, Туркманистон, Афғонистон, Чин, Корея, Нигерия ва Германия дар зинаҳои гуногун таҳсил доранд. Аз ин шумора 18 нафар ба таври буҷетӣ дар асоси бурсияҳои Ҳукумати Ҷумҳурии Тоҷикистон дониш меомӯзанд. Ин нуктаро имрӯз ректори Донишгоҳи техникии Тоҷикистон ба номи академик М.Осимӣ Ҳайдар Одиназода зимни нишасти матбуотии  ин ниҳод баён намуд.

Ҳамчунин зикр гардид, ки шумораи хатмкунандагон- шаҳрвандони хориҷӣ 8 нафарро ташкил медиҳад, ки 4 нафар ба зинаи бакалавриат, 2 нафар -магистратура ва 2 нафар ба докторантураи PhD рост меояд.

Ба иттилои мавсуф, дар донишгоҳ 588 нафар донишҷӯи хориҷӣ аз 14 кишвари дунё дар зинаҳои гуногуни таълимӣ ба таҳсил фаро гирифта шудаанд. Аз ин шумора 15 нафар дар асоси бурсияҳое, ки Ҳукумати Ҷумҳурии Тоҷикистон барои шаҳрвандони хориҷӣ ҷудо намудааст ва 573 нафар дар асоси шартнома таҳсил менамоянд.

Зикр шуд, ки давоми панҷ соли охир зиёда аз 50 нафар корманди донишгоҳ ба аспирантура ва докторантураи Федератсияи Россия фиристода шудаанд. 17 нафари онҳо рисолаҳои илмии худро бомуваффақият ҳимоя намуда, барои идомаи фаъолияти илмӣ-педагогӣ ба донишгоҳ баргаштанд.

Донишгоҳи техникии Тоҷикистон бо се муассисаи олии  касбии Ҷумҳурии Ӯзбекистон ва ду донишгоҳи Беларус ҳамкорӣ ба роҳ мондааст.

Ҳайдар Одиназода оид ба омодасози кадрҳои илмӣ-педагогӣ иброз намуд, ки «омодасози онҳо дар маркази диққати раёсати донишгоҳ қарор дорад. Дар донишгоҳ се Шӯрои диссертатсионӣ фаъолият доранд. Дар маҷмӯъ дар Шӯрои диссертатсионии ҷумҳурӣ, Федератсии Россия ва шӯроҳои диссертатсионии донишгоҳ 61 нафар устоди донишгоҳ ва 3 нафар корманди дигар муассисаҳо рисолаи номзадӣ ва докторӣ ҳимоя намудаанд, ки аз инҳо 561 нафар сазовори дараҷаи илмҳои техникӣ, 1 нафар илмҳои химиявӣ, 8 нафар илмҳои иқтисодӣ, 3 нафар илмҳои филологӣ ва 1 нафар илмҳои фалсафа гардиданд. Ин рақам дар қиёс ба соли гузашта 34 нафар зиёд буда, ба шарофати таъсиси Муассисаи давлатии «Комиссияи олии аттестатсионии назди Президенти Ҷумҳурии Тоҷикистон» мебошад».