Дар Душанбе таҳти унвони «Занон ва интихобот» ҳамоиш баргузор гардид

ДУШАНБЕ, 23.01.2020. /АМИТ «Ховар»/.  22 январ дар Кумитаи кор бо занон ва  оилаи назди Ҳукумати Ҷумҳурии Тоҷикистон таҳти унвони “Занон ва интихобот” ҳамоиш баргузор гардид. Дар кори он  муовини Раиси Комиссияи марказии интихобот ва раъйпурсии Ҷумҳурии Тоҷикистон  Махфират Хидирзода, муовини Раиси Кумитаи кор бо ҷавонон  ва варзиши назди Ҳукумати Ҷумҳурии Тоҷикистон Дилноза Аҳмадзода, Раиси Кумитаи кор бо занон ва оилаи назди Ҳукумати Ҷумҳурии Тоҷикистон  Ҳилолбӣ Қурбонзода, устодон  ва донишҷӯёни Муассисаи давлатии “Чароғи ҳидоят” ва фаъолзанони шаҳру навоҳии ҷумҳурӣ иштирок намуданд.

Зикр гардид, ки интихобот яке аз маъракаҳои муҳими сиёсӣ дар идоракунии давлат маҳсуб шуда, ҳамагондар баргузории он бояд саҳмгузор бошанд.

Махфират Хидирзода афзуд, ки ин маъракаи бисёр муҳими сиёсӣ бояд аз ҷониби шаҳрвандони ҷумҳурӣ шаффофу озод сурат гирад. Мавсуф ба ҳозирин тарзи гузаронидани интихоботро пурра фаҳмонида, саҳмгузории занону бонувони мамлакатро дар ин чорабинии сиёсӣ муҳим арзёбӣ намуд.

Муовини Раиси Кумитаи кор бо ҷавонон ва варзиши ҷумҳурӣ Дилноза Аҳмадзода доир ба дастгирии ҷавонон, иштироки онҳо дар корҳои созандагиву ободонӣ, маъракаи муҳими сиёсии дар пеш истода- интихоботи вакилони Маҷлиси намояндагони Маҷлиси Олии Ҷумҳурии Тоҷикистон ва вакилони маҷлиси вакилони маҳаллӣ сухан гуфта, аз ҷумла зикр кард, ки Пешвои миллат муҳтарам Эмомалӣ Раҳмон нисбат ба ҷавонон эҳтироми зиёд доранд. Ҷавононро дӯст медоранд ва тамоми шароитро барои инкишоф ва илмомӯзии онҳо фароҳам овардаанд. Пайваста ҷавононро дастгирӣ менамоянд, онҳоро тарбия месозанд ва ба вазифаҳои гуногуни роҳбарӣ таъйин менамоянд. Такя ба ҷавонон маънии пайванди имрӯзу фардоро дорад. Кумитаи ҷавонон дар навбати худ тасмим дорад, ки дар ин маъракаи муҳим фаъолона иштирок намоянд.

Дар ҷамбасти ҳамоиш иштирокчиён ба саволу пешниҳодҳои худ доир ба интихобот  ҷавобҳои мушаххас гирифтанд.