Донишгоҳи славянии Россияву Тоҷикистон — ғолиби Мусобиқаи кушоди варзишӣ оид ба волейбол

ДУШАНБЕ, 23.01.2020 /АМИТ «Ховар»/. Мусобиқаи кушоди варзишӣ оид ба волейбол, ки  20 январ дар Донишгоҳи давлатии ҳуқуқ, бизнес ва сиёсати Тоҷикистон дар вилояти Суғд оғоз шуд, дирӯз бо ғолибияти дастаи Донишгоҳи славянии Россияву Тоҷикистон  ҷамъбаст гардид. Тавре қаблан иттилоъ дода будем, дар мусобиқаи мазкур  18 даста аз шаҳру ноҳияҳо, муассисаҳои таҳсилоти миёна ва олии мамлакат байни ҳам рақобат намуданд.

Тавре аз Кумитаи миллии олимпии Тоҷикистон ба АМИТ «Ховар» хабар доданд, дар мусобиқаи кушод дастаи  Донишгоҳи давлатии ҳуқуқ, бизнес ва сиёсати Тоҷикистон  сазовори ҷойи дуюм,  Ашт-2 ҷойи сеюм ва дастаи Истаравшан ҷойи чорумро ишғол намуданд.

Ёдовар мешавем, ки Мусобиқаи кушоди варзишӣ оид ба волейбол бахшида ба Солҳои рушди деҳот, сайёҳӣ ва ҳунарҳои мардумӣ бо дастгирии Кумитаи кор бо ҷавонон ва варзиш, Вазорати маориф ва илм, Иттифоқи касабаи кормандони маориф ва илми мамлакат ва мақомоти иҷроияи ҳокимияти давлатии вилояти Суғд доир карда шуд. Ҳадаф аз он оммавигардонии варзиш ва тарғибу ташвиқи тарзи ҳаёти солим мебошад.

Ғолибони мусобиқа бо Ҷом, сипоснома ва маблағҳои пулӣ- 3000, 2000 ва 1000 сомонӣ қадрдонӣ шуданд.