Соли 2019 аҳолии Тоҷикистон зиёда аз 245 ҳазор нафар зиёд гардид

Январь 2, 2020 12:07

ДУШАНБЕ, 02.01.2020 /АМИТ «Ховар»/. Соли 2019 дар Тоҷикистон 245 ҳазору 840 кӯдак ба дунё омаданд. Дар ин бора аз Маркази ҷумҳуривии омор ва маълумоти тиббии Вазорати тандурустӣ ва ҳифзи иҷтимоии аҳолии Ҷумҳурии Тоҷикистон ба хабарнигори АМИТ «Ховар» Елена БАТЕНКОВА иттилоъ доданд.

Ба иттилои манбаъ, шумораи таваллуд нисбат ба соли 2018 камтар шудааст.

Ба ҳамин тариқ, соли гузашта  дар шаҳри Душанбе 19 ҳазору 105, соли 2018 каме бештар, яъне 19 ҳазору 798  нафар навзод ба дунё омадаанд. Моҳи декабри соли 2019 дар Тоҷикистон 1315 нафар кӯдакон чашм ба олам кушодаанд.

«Соли 2019 дар шаҳру ноҳияҳои тобеи марказ 62 ҳазору 786, дар Вилояти Мухтори Кӯҳистони Бадахшон 3 ҳазору 390, дар вилояти Хатлон 97 ҳазору 066 ва дар вилояти Суғд 63 ҳазору 495 нафар навзод ба дунё омадаанд», -афзуд манбаъ.

Мутаассифона, дар бораи он, ки дар муддати  31 декабр ва 1 январ чанд нафар тифл ба дунё омадаанд, маълумоти оморӣ дастрас нагардид. Вале дар бархе аз таваллудхонаҳои ҳудуди шаҳри Душанбе шумораи навзодон дар ин муддат ба чанд нафар баробар аст, ба мо аён гардид. Масалан, дар Пажӯҳишгоҳи акушерӣ- гинекологӣ ва перинатологии Ҷумҳурии Тоҷикистон дар ин муддат 23 навзод ба дунё омадааст. «Таваллуди кӯдак шодӣ ва хушбахтии беандозае барои ҳар хонадон аст. Шаби Соли нав дар Пажӯҳишгоҳи мо табибону акушерҳо, неонатологҳо ва ҳамшираҳои шафқат ба таври маъмулӣ кор карданд. Волидайн аз таваллуди кӯдак хеле шод мешаванд, бахусус дар шаби Соли нав. Ба шаҳрвандони хурдакаки Тоҷикистон ва волидайни онҳо саломатӣ ва тамоми хушиҳоро таманно мекунам», — зикр намуд директори Пажӯҳишгоҳи мазкур Гулҷаҳон Давлатзода.

Тавре аз таваллудхонаи №2 –и шаҳри Душанбе ба мо иттилоъ доданд, шаби Соли нав 11 кӯдак ба дунё омадаанд. «Бисёре аз волидайн, ки вақти таваллуди тифлашон ба охири декабр рост меояд, орзу мекунанд, ки фарзандашон шаби Соли нав, яъне шаби 31 декабр ба 1 январ ба дунё оянд. Баъзе аз модарон ҳатто мепурсанд, ки оё чунин шуданаш мумкин аст, ки ин ҳодисаи муҳим дар зиндагии онҳо шаби Соли нав рух бидиҳад? Албатта, касе намехоҳад, ки шаби Соли нав сари кор бошад, вале қарз қарз аст», — изҳор дошт сардухтури таваллудхонаи мазкур Маҳина Ҳусейнова.

Дар бемористони «Истиқлол» шаби Соли нав 14 тифл ба дунё омадаанд. Ба иттилои муовини директори маркази табобатии «Истиқлол» Муҳаббат Раҷабова,  шаби 31 декабр ба 1 январ дар ин ҷо 6 писар ва 8 духтар ба дунё омаданд. Волидайни ин тифлони навзод хеле хушбахтанд, зеро аз ин ба баъд онҳо дар як рӯз ду идро таҷлил хоҳанд кард.

Ба ҳамин тариқ, шаби Соли нав дар шуъбаи таваллудхонаи Маркази тиббии шаҳрии ба номи Карим Аҳмадов 13 тифл ба дунё омадаанд,-иттилоъ дод муовини директори маркази мазкур  Зулфия Абдусаломова.

Дар маҷмӯъ, шаби тантанаҳои таҷлили Соли нав танҳо дар Душанбе бештар аз 70 навзод ба дунё омадаанд.

Бояд гуфт, ки тибқи маълумоти сомонаи https://countrymeters.info/ru/, ки шумораи аҳолии сайёраро ҳисоб мекунад, ҳамарӯза дар Тоҷикистон 650 нафар навзод ба дунё меоянд. Мавриди зикри хос аст, ки маълумоти оморӣ оид ба аҳолии бештари мамлакатҳо дар асоси маводи Шуъбаи нуфуси аҳолӣ дар назди Департамент оид ба масъалаҳои иқтисодиву  иҷтимоии СММ омода мегардад.

Тибқи иттилои Маркази ҷумҳуриявии омор ва маълумоти тиббии Вазорати тандурустӣ ва ҳифзи иҷтимоии аҳолии Ҷумҳурии  Тоҷикистон, ҳар рӯз дар мамлакат дар маҷмӯъ 673 тифл ба  дунё меоянд.

Январь 2, 2020 12:07

Хабарҳои дигари ин бахш

Президенти Тоҷикистон: «Ҷашни Наврӯз ва истиқлолу озодӣ – ин ду мафҳуми барои ҳар яки мо азизу муқаддас аст»
«КАЪБА ЧӢ МЕРАВӢ, ДИЛЕРО ДАРЁБ…». Андешаҳо дар ҳошияи мулоқоти Президенти Тоҷикистон бо фаъолону намояндагони ҷомеа ва ходимони дин
Пешвои миллат: «Боиси ифтихор аст, ки Наврӯз – калимаи асили тоҷикӣ, яъне «рӯзи нав» ҳоло барои миллионҳо аҳолии сайёра ҳамчун рӯзи ҷашни фархунда вирди забон аст»
Эмомалӣ Раҳмон: «Наврӯз аз ҷумлаи бузургтарин ва маҳбубтарин ҷашнҳои тоҷикон мебошад»
СИЁСИШАВИИ ДИН — ХАТАР БА ФАРҲАНГИ МИЛЛӢ ВА СУБОТИ ҶОМЕА. Андешаҳои профессор Нозим Маҳмадизода дар ин мавзуъ
Президенти Тоҷикистон: «Бо назардошти шароити замона анъанаи неки гузаштагон – сарфаю сариштакориро бояд риоя намоем»
Сулаймон Талбакзода: «Дарси хештаншиносӣ ва хизмат ба халқу Ватанро аз Пешвои миллат бояд омӯзем»
Президенти Тоҷикистон: «Мушкилоти таъмини аҳолии сайёра бо озуқаворӣ моро водор менамояд, ки ҳар қитъа заминро оқилонаву самаранок истифода барем»
Пешвои миллат Эмомалӣ Раҳмон: «Ойинҳои наврӯзӣ аҳли башарро ба таҳаммулгароӣ, бунёдкориву созандагӣ ҳидоят менамоянд»
Пешвои миллат: «Дар шароити кунунӣ зарур аст, ки ба кишти такрорӣ, гирифтани се – чор ҳосил аз заминҳои обӣ эътибори аввалиндараҷа дода шавад»
Наврӯз дар баробари забони тоҷикӣ бунёди худшиносии тоҷиконро низ ташаккул додааст
Пешвои миллат Эмомалӣ Раҳмон: «Мақому ҷойгоҳи Наврӯз он қадар баланд буд, ки ҳеҷ монеа ва қуввае онро натавонист аз байн барад»