БА МУБОРИЗА БАР ЗИДДИ КОРОНАВИРУС ОМОДА БОШЕД! Бо чунин даъват СУТ ба тамоми кишварҳои ҷаҳон муроҷиат кард

Февраль 26, 2020 12:38

ДУШАНБЕ, 26.02.2020 /АМИТ «Ховар»/. Афғонистон, Баҳрайн, Ироқ ва Уммон аз ҷумлаи кишварҳое мебошанд, ки дар онҳо на кам аз як ҳолати сирояти коронавирус тасдиқ шудааст. Дар маҷмуъ, берун аз Чин, COVID-19 дар 33 кишвар ба қайд гирифта шудааст. Шумораи умумии мубталоён дар тамоми ҷаҳон ба 80 239 нафар расид, ки 908 каси онҳо давоми 24 соати охир тасдиқ шудаанд. Дар ҳамин ҳол, роҳбари гурӯҳи муштараки коршиносони Созмони умумиҷаҳонии тандурустӣ (СУТ) ва Чин Брюс Эйлворд ба хабарнигорон дар бораи таҷрибаи Чин дар мубориза бар зидди сироят, ки ӯ онро муваффақона меҳисобад, нақл кард. Дар ин бора АМИТ «Ховар» бо истинод ба хадамоти матбуоти СММ хабар медиҳад.

«Дар Чин усулҳои анъанавии мубориза бо эпидемияро истифода бурданд, аммо онҳоро ба миқёси бесобиқа оварда расонданд», — тазаккур дод Эйлворд.

Ба гуфтаи ӯ, бо шарофати ташкилии баланд, ташхиси саривақтӣ, ҷудокунии сироятшудагон, муайян кардани шахсоне, ки бо онҳо дар тамос буданд, инчунин талошҳои дастаҷамъонаи худи мардуми Чин, мақомот тавонистанд шумораи ҳолатҳои нави беморӣ ва сатҳи фавтро коҳиш диҳанд.

Ба гурӯҳ 25 коршинос — 13 намоянда аз тамоми ҷаҳон, аз ҷумла Россия ва 12 коршиноси чинӣ шомил буданд. Ҳангоми сафар дар саросари Чин онҳо на танҳо бо мансабдорон, балки бо садҳо сокинони маҳаллӣ — дар меҳмонхонаҳо, қатораҳо ва ҳавопаймо муошират карданд.

«Мо гаштаву баргашта итминон ҳосил мекардем, ки ҳар яки онҳо масъулияти шахсии худро эҳсос мекунад ва омода аст тавсияҳоро дар самти бартараф кардани ин хуруҷ риоя намояд», — изҳори таассурот намуд Брюс Эйлворд.

Дар маҷмуъ, тадбирҳои дар Чин андешидашуда ба намояндаи СУТ таассуроти хуб гузоштанд.

«Масалан, дар Вуҳан мушоҳида кардам, ки чӣ гуна мақомот варзишгоҳро бастанд ва давоми 72 соат ба он ҷо ҳазор кати тиббӣ оварданд, ки он ба як беморхонаи азиме табдил ёфт», — гуфт ӯ.

Айни ҳол СУТ аз афзоиши шумораи ҳолатҳои нав дар давлатҳои гуногуни ҷаҳон изҳори нигаронӣ менамояд, аммо намояндаи ин созмон аз «пандемия» номидани паҳншавии коронавирус даст кашид.

«Мо бо эпидемияҳое, ки дар ҷойҳои гуногун зуд сар мезананд, сарукор дорем ва мо бояд онҳоро дар як муддати кӯтоҳ барои пешгирӣ кардани «пандемия» бартараф созем», — таъкид кард Эйлворд.

Ӯ ҳушдор дод, ки нишондодҳо дар Чин набояд касро гумроҳ кунанд: низоми тандурустии Чин самарабахшии худро собит кард, беморхонаҳои маҳаллӣ бо таҷҳизоти замонавӣ муҷаҳҳаз шудаанд, табибон малака ва дониши зарурӣ барои табобати сироят ва пешгирии пайомадҳо доранд. Намояндаи СУТ таъкид кард, ки чунин вазъ на дар ҳама ҷо мавҷуд аст ва аз ин бармеояд, ки пайомадҳои паҳншавии вирус барои кишварҳои дигар метавонанд ҷиддӣ бошанд. Ӯ аз ҳамаи давлатҳо даъват ба амал овард, ки фавран шумораи кофии ҷойҳоро дар беморхонаҳо ва ташхисгоҳҳои мавҷудаву лавозимоти зарурии тиббиро таъмин намоянд.

Эйлворд инчунин овозаҳоро дар бораи он, ки нишондоди воқеии гирифтории коронавирус нисбат ба омори расмӣ метавонад баландтар бошад, рад кард. Ба гуфтаи ӯ, дар Чин низоми назорати паҳн кардани зуком вуҷуд дорад, ки ба шарофати он шумораи зиёди одамон – садҳо ҳазор дар он ҷо озмоиш карда метавонанд. Тибқи иттилои ӯ, дар авҷи эпидемия танҳо ним фоизи ташхисҳо барои коронавирус мусбат будаанд ва вақтҳои охир ин нишондод ба 0,02 дарсад коҳиш ёфтааст.

ДАР АКС: дар Аврупо аз паҳншавии коронавирус дар ҳаросанд. Акс аз «Unsplash»

Февраль 26, 2020 12:38

Хабарҳои дигари ин бахш

Эммануэл Макрон дар интихоботи Фаронса пас аз ҳисоби садфоизаи овозҳо пирӯз шуд
10 ЗИНА БОЛОТАР! Тоҷикистон мавқеи худро дар раддабандии ҷаҳонии амнияти озуқаворӣ беҳтар сохт
Эмомалӣ Раҳмон иштирокчиёни Саммити чоруми оби кишварҳои минтақаи Осиё ва Уқёнуси Оромро ба Душанбе даъват карданд
Дар Тоҷикистон 92,9 фоизи шаҳрвандон вояи якуми ваксина бар зидди COVID-19 гирифтаанд
ДАР ФАРОНСА — БОЗ ХУРУҶИ ЗУКОМИ ПАРАНДА. АМИТ «Ховар» ёдовар мешавад, ки ин чӣ гуна вирус аст
ТОҶИКИСТОН — ЯКЕ АЗ КИШВАРҲОИ ПЕШҚАДАМИ ПЕШБАРАНДАИ ТАРЗИ ҲАЁТИ СОЛИМ ДАР ИДМ. Ба чунин хулоса омадааст созмони бритониёии Abbey Care Foundation
Музаффар Ашуриён: Дар низоми давлатдорӣ мақомоте, ки сиёсати ҳуқуқии давлатро амалӣ мегардонад, мақомоти адлия мебошад
Миёни Тоҷикистон ва Қазоқистон парвозҳои мунтазам афзоиш дода мешаванд
ДАР ПАРТАВИ ҲИДОЯТҲОИ ПРЕЗИДЕНТ. Дар шаҳри Кӯлоб бахшида ба иди Рамазон ярмаркаҳои фурӯши маҳсулоти мавриди ниёзи аввал ташкил карда мешаванд
Президенти Тоҷикистон чӣ гуна роҳ надодан ба болоравии нархи маҳсулотро фаҳмонданд
ТУТ ДАЪВАТ КАРД, КИ ДАР МУНОСИБАТ БО КОВИД-19 ҲУШЁРӢ АЗ ДАСТ ДОДА НАШАВАД. Ситоди ҷумҳуриявӣ барои пурзӯр намудани тадбирҳои зиддиэпидемикӣ дар Тоҷикистон кадом қарорро қабул намуд?
Oxfam: таваррум 260 миллион нафарро дар фақри шадид қарор медиҳад