Барои рушди соҳаҳои тандурустӣ, иҷтимоӣ ва дастрасӣ ба оби ошомиданӣ дар Тоҷикистон панҷ лоиҳа ба имзо расид

ДУШАНБЕ, 25.02.2020 /АМИТ «Ховар»/. Дар чаҳорчӯбаи Барномаи Ҳукумати Япония оид ба кумакҳои бебозгашт ва амнияти башарӣ барои бахши аъзами аҳолӣ (GGP) панҷ лоиҳае, ки баҳри рушди соҳаҳои тандурустӣ, иҷтимоӣ ва дастрасӣ ба оби ошомиданӣ дар Ҷумҳурии Тоҷикистон равона шудаанд, бо Фонди Оғохон дар Тоҷикистон ва ташкилоти Оксфам ба тасвиб расиданд.

Хабарнигори АМИТ «Ховар» иттилоъ медиҳад, ки  созишномаҳои муштарак имрӯз, 25 феврал дар Сафорати Япония дар Ҷумҳурии Тоҷикистон аз ҷониби Сафири Фавқулода ва Мухтори Япония дар Ҷумҳурии Тоҷикистон Такаюки Мияшита ва намояндагони мақомоти пазирандаи грантҳо ба тасвиб расиданд. Маблағи умумии грантҳо 303,590 доллари ИМА-ро ташкил медиҳад.

Дар доираи созишномаҳо Лоиҳа оид ба барқарорсозии маркази ҷавонон дар шаҳри Хоруғ ва инчунин се лоиҳа барои сохтмони марказҳои саломатӣ дар ноҳияҳои Дарвоз, Рӯшон ва Шуғнони Вилояти Мухтори Кӯҳистони Бадахшон бо Роҳбари Фонди Оғохон дар Ҷумҳурии Тоҷикистон Кишвар Абдулалишоев ба маблағи 217,490 доллари ИМА ба имзо расонида шуданд.

Инчунин Лоиҳаи беҳтар намудани низоми хати оби нӯшокӣ дар 4 деҳаи ҷамоати Зайнабободи ноҳияи Рӯдакӣ, ки бо Роҳбари ташкилоти «Oxfam GB» дар Ҷумҳурии Тоҷикистон Шавкат Ализода бо маблағи 86,100 доллари ИМА ба имзо расонида шуд, амалӣ хоҳад шуд.