«КИСТ САРБОЗИ ВАТАН? МОВУ ТУЕМ!..». Ба шарафи Рӯзи Қувваҳои мусаллаҳи Ҷумҳурии Тоҷикистон Камол Насрулло ду матни суруди нав офарид

Февраль 23, 2020 08:34

ДУШАНБЕ, 23.02.2020. /АМИТ «Ховар»/. Дар арафаи ҷашни мубораки 30-солагии Истиқлолияти давлатии Тоҷикистони озод имрӯзҳо афсарону сарбозони Қувваҳои мусаллаҳи мамлакат бо дарки баланди масъулияти касбӣ вазифаҳои худро содиқона ба ҷой оварда, барои пешгирии ҳар амалу кирдоре, ки амният ва ҳаёти осоиштаи сокинони ҷумҳурии моро зери хатар мегузорад, омода мебошанд.

Қувваҳои мусаллаҳи Тоҷикистони озод зодаи нангу номус ва шарафи ватандории халқи некманиши мо, зодаи истиқлолияти деринтизори сокинони шарафманду соҳибтамаддуни ин сарзамини куҳанбунёд буда, дар рӯзҳои душвор таъсис ёфтаанд. Дар шароите, ки бо таҳмили андешаҳои нохайрхоҳонаи бегонагон мардуми содаву бефан ва башардӯсту инсонпарвари тоҷик гирифтори парокандагӣ ва ҷангу ҷидолҳои бемаънои байниҳамдигарӣ гардида буданд.

Хушбахтона, хиради зотӣ боло гирифту пирӯз шуд ва халқи некманиши мо таҳти сарварии Пешвои муаззами худ ба ҷодаҳои эҳёву худшиносӣ рӯ овард. Ба шарофати ин Қувваҳои мусаллаҳи Тоҷикистон 23 феврали  соли 1993 таъсис ёфтанд. Ҳадафи ин қувваҳо муҳофизати Истиқлолияти давлатӣ ва тамоми марзҳои Тоҷикистон  мебошад.

Тоҷикистони соҳибистиқлоли мо давлати хайрхоҳу сулҳдӯст ва башарпарвар  буда, ба ҳеҷ кишвари дунё ғараз надорад. Сиёсати хориҷии он ба ҳалли  тамоми муноқишаҳои минтақавӣ бо роҳи дипломатӣ  равона шуда, ҷонибдори тавсиаи муносибати сиёсӣ, иқтисодӣ ва фарҳангӣ бо кишварҳои олам аст. Аммо таҳаввулоти  ҳарбию сиёсии ҷаҳон, вазъи номусоид ва хатарангези замони муосир моро водор месозад, ки барои ҳифз ва  таъмини сулҳу осоиштагии халқамон зираку ҳушёр ва ҳамеша омода бошем.

Пешвои миллат  Эмомалӣ Раҳмон пайваста дар суханрониҳои худ таъкид месозанд, ки “мо бояд зиракӣ ва ҳушёрии сиёсиро аз даст надиҳем”.

Артиши миллӣ яке аз рукнҳои асосии давлатдорӣ ва сипари баэътимоди  мамлакат мебошад.  Ҷавонони тоҷик идомадиҳандаи корнамоӣ ва ҷасорату далерии гузаштагони номдори худ ҳастанд. Онҳо бо номи қаҳрамонони ҳалқи худ Рустаму Шерак, Деваштичу Спитамен, Абӯмуслиму Муқаннаъ, Темурмалику Восеъ ифтихор дошта, худро пайрави онҳо меҳисобанд. Ин аст, ки мо эътимод  ба неруҳои муҳофизи Ватани азизамон дошта, бо онҳо ифтихор мекунем.

Шоири халқии Тоҷикистон, ходими адабии АМИТ «Ховар» Камол НАСРУЛЛО ба муносибати таҷлили Рӯзи Қувваҳои мусаллаҳи Тоҷикистон ду матни тозаи сурудро ба сарбозони Ватан тақдим намудааст, ки манзури  хонандагон мегардонем.

 

ТАВОНИ ВАТАН

Субҳи ободии хонадони туем!

Пайки озодии остони туем!

Ҳамдилу ҳамтану ҳамравони туем!

Эй Ватан!

Эй Ватан!

Мо тавони туем!

Бо туем, эй Ватан, чун дили рӯи каф!

Бо туем, эй Ватан, чун қасам, чун шараф!

Рӯҳи озодии ҷисму ҷони туем,

Эй Ватан!

Эй Ватан!

Мо тавони туем!

Мерасад аз само файзи остони ту!

Мерасад аз бақо нури имони ту!

Мо дуои кафи модарони туем!

Эй Ватан!

Эй Ватан!

Мо тавони туем!

Чун Сиёвуш фари ҷовидони туем!

Шераки ҷоннисори замони туем!

Рустами бешикан — қаҳрамони туем!

Эй Ватан, эй Ватан, армуғони туем!

Ҷонфишони туем!

Ҷонфишони туем!

Дар куҳанмарзи мо, ин ҳаво зинда бод!

Ин мақом, ин суруд, ин наво зинда бод!

Дар самои Ватан ин сафо зинда бод!

Эё Ватан! Эй Ватан!

Ҷон ба ҷони туем!

Посбони туем!

Посбони туем!

СУРУДИ САРБОЗОН

Сар барафрохта сарбози Ватан мову туем!

Сипари нанги дари бози Ватан мову туем!

То ки хуршеди амонӣ бидурахшад ба само,

Мурғи толеъи ту бошад зи ҳама банд раҳо,

Бо дилу бозуву дасту тани тобовари худ

Сипари ҳифзи Ватан — модари худ, хоҳари худ,

Саф кашедем, Ватан, аз сари нанг, аз аз сари ор,

Марз то марзи ту бо ҳиммату ҷони ба нисор!

Кист сарбози Ватан?! Мову туем, мову туем!

Боли парвози Ватан?! Мову туем, мову туем!

Ҷони мардони шарафманди Ватан рӯи каф аст!

Дар раҳи нанги Ватан мурдани мардон шараф аст!

Ончунон бош, ки бошӣ тану симои Ватан!

Дар сари шонаи худ дошта фардои Ватан!

Кист сарбози Ватан?! Мову туем, мову туем!

Боли парвози ватан?! Мову туем, мову туем!

Февраль 23, 2020 08:34

Хабарҳои дигари ин бахш

Президенти Тоҷикистон аз тағйирёбии босуръати иқлим ва оқибатҳои ногувори он изҳори нигаронӣ намуданд
ИСТИҚЛОЛИЯТ-ШИНОСНОМАИ БАЙНАЛМИЛАЛИИ ТОҶИКОН. Андешаҳои Президенти Ҷумҳурии Тоҷикистон муҳтарам Эмомалӣ Раҳмон доир ба истиқлолият
Эмомалӣ Раҳмон: «Ормону орзуи ҳар шахс танҳо дар сурати побарҷо будани сулҳу суботи ҷомеаву давлат ва ваҳдати миллӣ амалӣ гардида метавонад»
ЭМОМАЛӢ РАҲМОН ВА ТАҲКИМИ ИСТИҚЛОЛИ ТОҶИКИСТОН. Эҳдо ба 33-солагии Истиқлолияти давлатии Ҷумҳурии Тоҷикистон
Президенти Тоҷикистон: «Шабакаи алоҳидаи телевизионии таълими забонҳои хориҷӣ таъсис дода шавад»
ПРЕЗИДЕНТИ ТОҶИКИСТОН САРПАРАСТИ БОЗ ЯК ОЗМУНИ ҶУМҲУРИЯВӢ. Озмуни «Беҳтарин китоби илмӣ, мақолаи илмӣ ва мақолаи илмию оммавӣ» дар соли 2024 баргузор карда мешавад
«ДАҲСОЛАИ АМАЛ БАРОИ ИЛМҲОИ КРИОСФЕРА, СОЛҲОИ 2025-2034»: Талоши созанда барои ҷаҳонӣ гардонидани илмҳои қутбшиносӣ ва яхшиносӣ
ТАНҲО МУТОБИҚШАВӢ БА ИҚЛИМ КОФӢ НЕСТ. Гармои тӯлонӣ ва шадид зарурати амалҳои фавриро дар мубориза бо тағйирёбии иқлим таъкид менамояд
33 СОЛИ ПУРСАМАРИ ИСТИҚЛОЛИЯТИ ДАВЛАТӢ. Президенти Тоҷикистон Эмомалӣ Раҳмон: «Дар роҳи ватансозӣ мисли ангуштони як мушт сарҷамъу муттаҳид бошем!»
ИСТИҚЛОЛ ВА ШИНОХТИ АСОЛАТИ МИЛЛӢ. Андешаҳои Ректори Донишгоҳи давлатии Хоруғ Амид Комилбек дар ин маврид
Президенти Тоҷикистон ҳушдор доданд: «Эҳтимолан чанд соли оянда мо шоҳиди боз дигар рақамҳои рекордии вобаста ба баландшавии ҳарорати ҳаво гардем»
БА ТАЪСИСИ «РОҲИ ОҲАНИ ТОҶИКИСТОН» 30 СОЛ ПУР ШУД. 72 фоизи боркашонӣ дар мамлакат тавассути роҳи оҳан амалӣ мегардад