Тоҷикистон ва САҲА ҷиҳати пешгирии гардиши ғайриқонунии маводи мухаддир муборизаи муштарак мебаранд

ДУШАНБЕ, 21.02.2020. /АМИТ «Ховар»/. Ҷумҳурии Тоҷикистон ва Созмони амният ва ҳамкорӣ дар Аврупо ҷиҳати пешгирии гардиши ғайриқонунии маводи мухаддир муборизаи муштарак мебаранд. Дар ин хусус дирӯз дар шаҳри Душанбе санади дахлдор ба имзо расид.

Тавре АМИТ «Ховар» бо истинод ба Агентии назорати маводи нашъаовари назди Президенти Ҷумҳурии Тоҷикистон хабар медиҳад, масъалаи мазкур зимни вохӯрии Директори Агентӣ Шерхон Салимзода бо ҳайати намояндагон ва роҳбари Департаменти ҳарбӣ-сиёсии Дафтари барномаҳои САҲА дар Душанбе Флориан Разесбергер муҳокима шуд.

Шерхон Салимзода бо ёдоварӣ аз тадбирҳои андешидаи Ҳукумати Ҷумҳурии Тоҷикистон дар самти назорати муомилоти маводи нашъаовар ба меҳмонон оид ба тамоюлу равандҳо дар ин маврид, нигаронӣ аз воридот ва паҳншавии моддаҳои нави синтетикии нашъадор ва моддаҳои психотропӣ, пешгирии нашъамандӣ ва тарғиби тарзи ҳаёти солим дар байни қишрҳои иҷтимоии аҳолӣ маълумот дод.

Ҷонибҳо «Нақшаи чорабиниҳои муштараки Дафтари барномаҳои САҲА дар Душанбе бо Агентии назорати маводи нашъаовари назди Президенти Ҷумҳурии Тоҷикистон барои соли 2020»-ро ба имзо расониданд.

Дар доираи нақшаи мазкур омӯзиш ва тайёр намудани тренерҳои касбӣ аз ҳисоби кормандони ҷавони Агентӣ дар самти мубориза бо қочоқи маводи мухаддир, баргузории чорабиниҳои зидди нашъамандӣ барои паст кардани сатҳи нашъамандӣ ва вобастагӣ тавассути муносибати пурарзиш, таваҷҷуҳ ба шароит ва гурӯҳҳои осебпазир ва дигар барномаҳои оммавӣ ташкилу баргузор карда мешаванд.