ҶАБҲАИ БУЗУРГИ СОЗАНДАГӢ ДАР ШАҲРУ ДЕҲОТИ ТОҶИКИСТОН. 16 нуқтаи хатна, 6 ҳуҷраи таваллуд, 8 толори кошонаи ҳусн ва 14 сартарошхона — пешниҳоди аҳолии деҳаҳои дурдасти ноҳияи Бобоҷон Ғафуров гардид

ДУШАНБЕ, 22.03.2020. /АМИТ «Ховар»/. Ба ифтихори ҷашни 30-солагии Истиқлолияти давлатии Ҷумҳурии Тоҷикистон ва Солҳои рушди деҳот, сайёҳӣ ва ҳунарҳои мардумӣ дар деҳаҳои ҷамоатҳои дурдасти ноҳияи Бобоҷон Ғафурови вилояти Суғд, чун Чашмасор, Дадобой Холматов ва Исмоил  аз рӯи дархост ва эҳтиёҷот 16 адад нуқтаҳои хатна, 6 адад ҳуҷраи  таваллуд, 8 адад толори кошонаи ҳусн ва 14 сартарошхона мавриди истифода қарор гирифтанд.

Ҳадаф аз бунёди ин муасисаҳои тандурустиву хизматрасонӣ — боз ҳам  обод кардани  деҳаву  маҳали  аҳолинишини шаҳраку ҷамоатҳои ноҳия, ҳалли масъалаҳои иҷтимоии аҳолӣ бо роҳи беҳтар намудани инфрасохтор, пеш аз ҳама, дар соҳаи тандурустӣ, ба талаботи муосир мутобиқ сохтани сатҳи хизматрасонӣ, баланд бардоштани некӯаҳволии мардум ва оҷилан расонидании ёрии тиббӣ ба аҳолӣ, инчунин дастрасии саривақтӣ ба хизматрасонии иншооти иҷтимоӣ мебошад.

Бино ба иттилои хабарнигори минтақавии АМИТ «Ховар» дар вилояти Суғд Абдуаҳад Шарифзода бо истинод ба маълумоти масъулини Мақомоти иҷроияи ҳокимияти давлатии ноҳияи Бобоҷон Ғафуров, то соли 2021 бунёду навсозии беш аз 1300 иншооти иҷтимоиву иқтисодӣ дар назар буда, то имрӯз иншооти зиёд сохта шудаанд.

Масъулини ноҳия азм доранд то ҷашни 30-солагии Истиқлолияти давлатӣ  бо дарназардошти эҳтиёҷоти аҳолӣ дар ҳар як ҷамоату маҳалли аҳолинишин ва деҳаҳо бунёди коргоҳҳои дӯзандагӣ, майдончаҳои варзишӣ, қасри фарҳанг, китобхона, бунгоҳҳои тиббӣ, сартарошхона, кошонаи ҳусн, боғҳои фарҳангию фароғатӣ ва дигар иншооти муҳими аввалиндараҷаи  иҷтимоиро роҳандозӣ намоянд.