ЧАРОҒАКИ САБЗ. Чӣ бояд кард, то ки ҳангоми убури плазаҳои «IRS» ин чароғак фавран фурӯзон шавад?

ДУШАНБЕ, 18.03.2020. /АМИТ «Ховар»/. Барои онҳое, ки дар пештоқи оинаи мошинашон RFID (чипе, ки онро дар пештоқи оинаи мошин насб карда, бидуни таваққуф плазаро гузаштан мумкин аст)   насб шудааст, имкон фароҳам меояд, ки умуман дар плазаҳо таваққуф накунанд. Ба ибораи дигар, барои чунин ронандагон зимни ҳаракат дар роҳи мошингарди Душанбе – Чанок ҳамеша чароғаки сабз фурӯзон мегардад. Ин нуктаро зимни суҳбат ба мухбири АМИТ «Ховар» сардори Маркази матбуоти филиали Ширкати саҳомии “Инновейтив Роуд Солюшнз ЛТД” дар Ҷумҳурии Тоҷикистон Далери АБДУЛЛО  изҳор дошт.

Ба гуфти Далери Абдулло, ронандагон бояд дуруст дарк намоянд, ки истифодаи чипи RFID   ва  кортҳои электронии филиали ширкат бартариҳои зиёд дорад. Аввалан, он воситаи хеле мувофиқи баҳравар гаштан аз хизматрасониҳои филиали ширкат  ба ҳисоб рафта, вақти ронандагону мусофиронро сарфа менамояд.

Сониян, ин иқдом   то андозае ба коҳиш ёфтани пули нақд дар гардиш, ки аз лиҳози иқтисодӣ хеле муҳим аст, сабаб мегардад. Таъкид менамоем, ки истифодаи ин намуди хизматрасонӣ ба майлу иродаи шаҳрвандон вобаста буда, шахсони воқеӣ ва ҳуқуқӣ метавонанд дар низоми толлингии филиали ширкат дар муддати кӯтоҳ суратҳисоби худро кушоянд ва аз имконияти пардохти маблағи гузариш аз плазаҳо бо роҳи ғайринақдӣ баҳравар шаванд.

Ба таъкиди ҳамсуҳбати мо, дар ин самт муҳим он аст, ки истифодаи RFI- кортҳои марбут ба филиали ширкат бе иштироки хазинадор, ки қаблан тариқи нақд маблағро қабул мекард, имконпазир аст. Ҳамзамон бо ин, онҳое, ки аз  кортҳои пардохтии «IRS» истифода мекунанд, аз бисёр лиҳоз бурд хоҳанд кард. Масалан, барои дорандаи чунин корт кофист, ки кортро ба панели берунаи пардохт, ки дар ҷойгоҳи хазинадор насб шудааст, наздик барад.  Таҷҳизоти замонавии насбшуда фавран ба кор даромада, маблағи пешбинишуда гирифта ва роҳ барои гузариши воситаи нақлиёт боз мегардад. Истифодаи чунин корт дар баробари бартариҳои зикршуда ҳамчунин замина фароҳам меорад, ки танбашавии мошинҳо дар плазаҳои толлингӣ пурра аз байн равад. Зеро суръати хизматрасонӣ бамаротиб афзуда, сифати он  беҳтар мегардад.

Сардори Маркази матбуоти филиали Ширкати саҳомии “Инновейтив Роуд Солюшнз ЛТД” дар Ҷумҳурии Тоҷикистон Далери Абдулло дар идомаи суҳбат афзуд, ки кушодани суратҳисоб ва гирифтани корт осон ва дар муддати кӯтоҳ имконпазир буда, шаҳрвандонро мебояд нусхаи шиноснома, нусхаи РМА  (ИНН), нусхаи шиносномаи техникии мошин, нусхаи ваколатномаро (агар соҳиби воситаи нақлиёт    шахси дигар  бошад), пешниҳод намояд. Бо мақсади осон намудани дастрасии шаҳрвандон ва сарфи вақти онҳо шароит фароҳам шудааст, ки дар сомонаи филиали ширкат – www. irs.tj аз тариқи онлайн ба ин намуди хизматрасонӣ пайваст гарданд.  Маълумоти иловагиро дар саҳифаи филиали ширкат дар шабакаи иҷтимоии Фейсбук, сайти филиали ширкат ва аз тариқи телефони 48 701 10 20 қобили дарёфт  метавон кард.

Моҳи апрели соли 2016  мақоми олии намояндагӣ ва қонунгузори мамлакат Қонуни Ҷумҳурии Тоҷикистон «Дар бораи ворид намудани тағйиру иловаҳо ба Кодекси ҳуқуқвайронкунии маъмурии Ҷумҳурии Тоҷикистон»-ро қабул намуд.  Моддаи 615 Кодекси ҳуқуқвайронкунии маъмурии Ҷумҳурии Тоҷикистон «Риоя накардани тартиби истифодаи мошинаҳои назоратию хазинавии дорои хотираи фискалӣ ва баҳисобгирии хазина» ном дошта, тибқи иловаҳо ба номи модда калимаҳои «терминалҳои электронӣ» ва қисми нав дар таҳрири зерин пешниҳод гардидааст: «Барои саркашӣ намудан аз насби терминалҳои электронӣ ё рад кардани истифодаи кортҳои пардохтии бонкӣ дар ҳисоббаробаркуниҳо ба шахсони мансабдор ба андозаи аз сад то яксаду шаст, ба соҳибкорони инфиродие, ки дар асоси шаҳодатнома фаъолият менамоянд, аз яксаду шаст то яксаду ҳаштод ва ба шахсони ҳуқуқӣ аз яксаду ҳаштод то дусад нишондиҳанда барои ҳисобҳо ҷарима таъйин карда мешаванд».

Ба  густариши пардохти ғайринақдӣ таваҷҷуҳи хосса зоҳир намудан далели возеҳи он аст, ки роҳбарияти филиали Ширкати саҳомии “Инновейтив Роуд Солюшнз ЛТД” дар Ҷумҳурии Тоҷикистон  дар  иҷрои ин муқаррароти қонунгузорӣ фаъол  буда, дар ин самт  тадбирҳои зарурӣ меандешад.

 Далери Абдулло гуфт, ки ояндаи наздик ҳамаи онҳое, ки аз тариқи роҳи Душанбе – Чанок  ба сафар мебароянд, ба RFID ва кортҳои электронии филиали ширкат таваҷҷуҳ ва аз онҳо истифода менамоянд. “Бо дарки масъулият мегӯем, ки пардохти ғайринақдӣ ба маънои томаш кумакрасони беминнати ронандагон аст. Ба шарте ки моҳияти он дарк гардаду  ронандагон дар тавсеаи ин раванд саҳмгузор бошанд”, — изҳор дошт Далери Абдулло.

Ёдрас мешавем, ки давоми моҳҳои охир кормандони филиали ширкат фаъолияташонро ҷиҳати  зиёд намудани пардохти ғайринақдӣ ҳангоми гузариши воситаҳои нақлиёт аз тариқи плазаҳои толлингии филиали ширкат тавсеа бахшиданд. Гузаронидани корҳои фаҳмондадиҳӣ, пешниҳоди RFID, кортҳои электронӣ  ва зиёд намудани хатсайрҳои экспресс аз  тадбирҳои  дар робита ба ин масъала андешидашуда ба ҳисоб мераванд.                 

                                                                                                                                                                                        Файзалӣ НИЁЗ,
АМИТ «Ховар»