Дар Россия шумораи сироятёфтагон аз коронавирус ба 63 нафар расид

ДУШАНБЕ, 16.03.2020 /АМИТ «Ховар»/.  Шабонарӯзи гузашта нишонаҳои ташхиси сирояти коронавируси чор нафар сокинон дар Россия мусбат арзёбӣ гардиданд. Тавре АМИТ  «Ховар» хабар медиҳад, дар ин бора ситоди фаврии мубориза бо паҳн гардидани бемории сироятии мазкур иттилоъ дод.

Се нафари навсироятшуда дар вилояти Москва ва як нафар дар вилояти Тюмен қарор доранд. Ҳамаи онҳо ҳафтаи охир ба Италия, Франсия, Испания ва Швейтсария сафар кардаанд. Ҳоло ин шаҳрвандон  дар беморхонаҳои сироятӣ бистарӣ гардида, таҳти муолиҷаи духтурон қарор доранд.

Ба ҳамин минвол шумораи умумии аз коронавируси COVID-19 сироятёфтагон дар Россия ба 63 нафар расида, аз онҳо 60 нафар русҳо, як нафар итолёвӣ ва ду нафар сокинони Чин мебошанд.

Пандемияи коронавирус

Ҳафтаи гузашта Созмони умумиҷаҳонии тандурустӣ авҷ гирифтани сирояти COVID-19-ро, ки аз Чин сарчашма гирифт, пандемия эълон намуд.

Тибқи иттилои охирин, шумораи умумии сироятёфтагон аз вируси мазкур дар зиёда аз 130 мамлакат ба 157 ҳазор нафар расидааст, ки аз ин шумора 6 ҳазор нафар ба ҳалокат расида, 75 ҳазор нафар шифо ёфтаанд.  Дар қаламрави Аврупо оид ба паҳншавии ин вирус Италия мақоми аввалро касб менамояд. Дар онҷо зиёда аз 21 ҳазор нафар сироят ёфта, 1 ҳазору 441 нафар ба ҳалокат расидаанд.