Россия аз 18 март марзҳояшро барои хориҷиён мебандад

ДУШАНБЕ, 17.03.2020. /АМИТ «Ховар»/. Ҳукумати Федератсияи Россия вуруди шаҳрвандони хориҷӣ ва шахсони бешаҳрвандиро ба Федератсияи Россия аз 18 марти соли 2020 муваққатан маҳдуд мекунад. Дар ин бора Сарвазири ФР Михаил Мишустин ба сарварони чанд давлат иттилоъ дод, менависад рӯзномаи «Коммерсант».

Маҳдудияти вуруд ба инҳо дахл надорад:

— кормандони намояндагиҳои дипломатӣ ва муассисаҳои консулӣ дар ФР;

— ронандагони мошинҳои боркаши байналмилалӣ;

— экипажҳои ҳавопаймоҳо ва киштиҳои баҳрию дарёӣ, бригадаҳои қатораҳо ва локомотивҳои ҳаракати байналмилалии роҳи оҳан;

— аъзои ҳайатҳои расмӣ ва шахсоне, ки раводиди дипломатӣ, хидматӣ ва одии хусусии дар робита ба вафоти хешовандони наздик додашуда доранд;

— ашхосе, ки дар қаламрави Федератсияи Россия доимӣ истиқомат мекунанд, инчунин шахсоне, ки ба таври транзит тавассути гузаргоҳҳои сарҳади ҳавоӣ мегузаранд.

Тибқи иттилои хадамоти матбуоти ҳукумат, Мишустин 15-16 март бо ҳамтоёни худ аз Озарбойҷон, Арманистон, Қазоқистон, Қирғизистон, Тоҷикистон ва Ӯзбакистон як зумра суҳбатҳои телефонӣ анҷом додааст. «Тадбирҳои андешидаи ҷониби Россия ба тавсияҳои Созмони Умумиҷаҳонии Тандурустӣ мутобиқ мебошанд ва бо сабабҳои махсус рух дода, хусусияти муваққатӣ доранд», — омадааст дар гузориш.

Ёдовар мешавем, ки манбаъҳои «Коммерсант» иттилоъ дода буданд, ки мақомоти Россия имкони комилан бастани марзҳои Федератсияи Россияро баррасӣ мекунанд. Нақшаҳои Москва амалан тасмимҳои мақомоти бархе аз кишварҳои Ғарб ва ИА-ро, ки тасмим гирифтаанд вуруди хориҷиёнро тӯли як моҳ манъ кунанд, такрор мекунанд.