Дар Деваштич Фестивали ҷумҳуриявии «Ҳафтаи китоби кӯдакону наврасони Тоҷикистон» баргузор шуд

ДУШАНБЕ, 12.04.2020 /АМИТ «Ховар»/. Дар Китобхонаи марказии кӯдаконаи ноҳияи Деваштич  Фестивали ҷумҳуриявии «Ҳафтаи китоби кӯдакону наврасони Тоҷикистон» таҳти унвони «Тараннумгари сухан» баргузор шуд.

Дар фестивал намояндагони Ҳизби Халқии Демократии Тоҷикистон дар ноҳияи Деваштич, масъулони клубу китобхонаҳо, шоирон, навқаламон, омӯзгорон ва хонандагони муассисаҳои таълимии ҳудуди ноҳия иштирок намуданд.

Кӯдакон, наврасон ва ҷавонон аз ашъори шоирон шеърҳо дар васфи китоб, модар, Ватан, устод бо ҳисси баланди ватандӯстӣ қироат намуданд.

Тавре аз Кумитаи иҷроияи ҲХДТ дар ноҳияи Деваштич хабар доданд, мақсад аз баргузории фестивал баланд бардоштани қадру манзалати китоб дар ҷомеа, ҷалби кӯдакону наврасон ба хониш, боз ҳам баланд бардоштани сатҳи фарҳанги иттилоотии кӯдакону наврасон, арҷгузорӣ ба мероси ниёгон, ҷавонон ва ба ин васила дар замири онҳо тарбия намудани ҳисси ифтихори миллӣ, ватандӯстӣ, гиромидошти арзишҳои милливу умумибашарӣ ва пайгири намудани анъанаи пурарзиши китобдӯстӣ мебошад.

Фестивалро барномаи консертии ҳаваскорони ноҳия шукӯҳу шаҳомати хосса бахшид. Ғолибони озмун бо ифтихорномаҳо ва туҳфаҳои  Ҳизби Халқии Демократии Тоҷикистон ва бахши фарҳанги ноҳия сазовор гардиданд.