Дар Кумитаи кор бо ҷавонон ва варзиш маҳфили доимии «Фурӯғи субҳи доноӣ китоб аст» таъсис ёфт

ДУШАНБЕ, 18.04.2020 /АМИТ «Ховар»/. Дар Кумитаи кор бо ҷавонон ва варзиши назди Ҳукумати Ҷумҳурии Тоҷикистон маҳфили доимии «Фурӯғи субҳи доноӣ китоб аст» таъсис  дода шуд. Мақсад аз таъсиси маҳфили мазкур ҷалби ҷавонон ба китобхонӣ ва омода намудани онҳо барои иштирок дар озмуни ҷумҳуриявии «Фурӯғи субҳи доноӣ китоб аст» мебошад.

Тавре аз маркази матбуоти Кумитаи кор бо ҷавонон ва варзиш ба АМИТ «Ховар» иттилоъ доданд, нақшаи фаъолияти маҳфил тибқи талаботи Низомномаи озмун тасдиқ гардида, шумораи хоҳишмандон барои узвият дар маҳфил дар ҳоли афзоиш аст.

Маҳфили мазкур бо мақсади иҷрои Амри Президенти Ҷумҳурии Тоҷикистон муҳтарам Эмомалӣ Раҳмон дар бораи Озмуни ҷумҳуриявии «Фурӯғи субҳи доноӣ китоб аст»  роҳандозӣ гардидааст.

Ёдовар мешавем, ки озмуни «Фурӯғи субҳи доноӣ китоб аст» миёни тарбиягирандагон ва хонандагони муассисаҳои таҳсилоти томактабӣ ва миёнаи умумӣ, донишҷӯёни муассисаҳои таҳсилоти ибтидоӣ, миёна ва олии касбӣ, баъд аз муассисаҳои таҳсилоти касбӣ (магистрҳо, аспирантҳо, докторантҳо),​ калонсолон ва намояндагони касбу кори гуногун (омӯзгорони ҳамаи зинаҳои таҳсилот, кормандони фарҳангу санъат ва дигар табақаҳои аҳолии мамлакат)  доир мегардад.

Мақсад аз он  баланд бардоштани завқи китобхонӣ, тақвияти неруи зеҳнӣ, дарёфти чеҳраҳои нави суханвару сухандон, арҷ гузоштан ба арзишҳои миллию фарҳангӣ, инкишофи қобилияти эҷодӣ, таҳкими эҳсоси худогоҳию худшиносӣ, такмили захираи луғавӣ ва тақвияти ҷаҳони маънавӣ миёни аҳолии мамлакат мебошад.

Акс аз бойгонӣ