IRS: баландии барф дар роҳи Душанбе-Чаноқ ба 15 см расид, ҳангоми ҳаракат дар он эҳтиёт бошед!
ДУШАНБЕ, 01.04.2020. /АМИТ «Ховар»/. Аз субҳи имрӯз дар роҳи мошингарди Душанбе—Чаноқ — аз километри 57 то 84 бориши барф шурӯъ гашта, баландии он ба 15 сантиметр расидааст. Кормандони «IRS», ки дар ҳама ҳолат омодагии ҷиддӣ доранд, роҳро аз барф тоза карда, бо маводи зиддилағжиш коркард карда истодаанд. Дар ин робита аз шаҳрвандон эҳтиромона хоҳиш мешавад, ки ҳангоми ҳаракат дар роҳи Душанбе – Чаноқ эҳтиёткору дақиқназар бошанд ва дар сурати ба мушкил мувоҷеҳ шудан тавассути шумораи телефони 487011020 бо кормандони ширкат тамос гиранд. Дар ин бора ба хабарнигори АМИТ «Ховар» Файзалӣ Ниёз сардори маркази матбуоти филиали Ширкати саҳомии «Инновейтив Роуд Солюшнз ЛТД» дар Ҷумҳурии Тоҷикистон Далери Абдулло хабар дод.
Айни замон роҳ кушода буда, ҳаракати воситаҳои нақлиёт пурра таъмин аст. Рӯзҳои охир дар ҷумҳурӣ бориши шиддатноки борон ба мушоҳида мерасад, ки дар натиҷа офатҳои табиӣ ба вуқӯъ пайваста, сабаби расидани хисороти ҷиддӣ ба соҳаҳои гуногуни мамлакат, аз ҷумла, роҳҳои мошингард мегардад.
Дар ин рӯзҳо дар шоҳроҳи Душанбе-Чаноқ, ки қисмати зиёди он аз минтақаи кӯҳистон мегузарад, хавфи фаромадани сангпораҳо, омадани сел, лағжиши тарма ва кӯҳпора вуҷуд дорад. Ду рӯз қабл дар километри 45-уми ин роҳ лағжиши кӯҳпораи азим ба амал омад, ки хушбахтона, талафот надошт. Кормандону техникаҳои пуриқтидори «IRS» фавран ба макони ҳодиса сафарбар шуда, дар муддати кӯтоҳ ин офати табииро бартараф карданд.
Далери Абдулло изҳор дошт, ки тибқи огоҳии сохторҳои марбута, чунин вазъи номусоиди ҳаво дар қаламрави мамлакат чанд рӯзи дигар боқӣ мемонад. Аз ин рӯ, давоми ин рӯзҳо дар роҳи Душанбе – Чаноқ хавфи омадани сел ва лағжиши кӯҳпора зиёд аст. Кормандони филиали Ширкати саҳомии «Инновейтив Роуд Солюшнз ЛТД» дар Ҷумҳурии Тоҷикистон баҳри бартарафсозии оқибатҳои офатҳои табиӣ, ҷиҳати ба ҳолати аввала баргардонидани қитъаҳои селшустаи роҳ, соҳилбандӣ ва дигар корҳои вобаста ба ин раванд тадбирҳои зарурӣ меандешанд. Филиали Ширкат баҳри нигоҳдории роҳ қувваи кофӣ дошта, пойгоҳи техникиаш аз 210 техникаву механизм иборат аст.








«БЕҲТАРИН ОИЛАИ ҲУНАРМАНД». Форуме, ки дар Кӯлоб оилаҳои ҳунармандро ҷамъ овард
Вазири адлияи Тоҷикистон дар Машварати 12-уми вазирони адлияи давлатҳои узви СҲШ иштирок намуд
Рушди ҳамкории Тоҷикистон ва Ҷопон дар соҳаи таҳсилоти ибтидоӣ ва миёнаи касбӣ баррасӣ гардид
Дар Кӯлоб Форуми ҷумҳуриявии «Беҳтарин оилаи ҳунарманд» баргузор мегардад
Дар Душанбе бахшида ба Рӯзи Конститутсия конференсияи ҷумҳуриявӣ доир шуд
БЕМОРИИ ПӮСТ – ПСОРИАЗ. Оё он табобатшаванда аст?
Дар Тоҷикистон таъсиси Маркази тайёркунии муҳандисони лифт дар назар дошта шудааст
РӮЗИ ҶАҲОНИИ МУБОРИЗА БАР ЗИДДИ БЕМОРИИ ИНСУЛТ. Чаро инсонҳо ба ин беморӣ гирифтор мешаванд?
Дар Душанбе масъалаи татбиқи Барнома оид ба меҳнати шоиста барои солҳои 2025–2026 баррасӣ гардид
Соли равон дар вилояти Суғд таъмир ва сохтмони беш аз 100 муассисаи тандурустӣ ба нақша гирифта шудааст
Дар Душанбе Форуми ёздаҳуми миллӣ оид ба волоияти қонун баргузор мешавад
Дар Тоҷикистон дар нуҳ моҳ гирифторӣ ба бемориҳои шадиди рӯда зиёд шудааст






