Варзишгарони дастаи «Динамо»-и ВКД дар мусобиқаи гӯштини самбо мақомҳои назаррасро соҳиб шуданд

ДУШАНБЕ, 08.04.2020. /АМИТ «Ховар»/. Дар Мусобиқаи ҷумҳуриявӣ оид ба гӯштини самбо байни ҷавонони солҳои таваллуди 2000-2002, ки 4-5 апрел дар толори Маҷмааи варзишии ноҳияи Рашт доир гардид, самбочиёни дастаи яккачини «Динамо»-и Вазорати корҳои дохилӣ ширкат варзида, ғолибият ба даст оварданд. Дар ин бора аз Вазорати корҳои дохилии Ҷумҳурии Тоҷикистон ба АМИТ «Ховар» иттилоъ доданд.

Паҳлавонони ояндадор Алишер Расулов дар вазни 52 кило, Ҷаҳонгир Камолов дар вазни 57 кило, Шаҳбоз Саидаброров дар вазни 62 кило, Бузург Исоев дар вазни 67 кило ва Давлатҷон Назриев дар вазни беш аз 100 кило мақомҳои аввали чемпионатро ба даст оварда, Фирӯз Фатоев дар вазни 57 кило, Фирдавс Раҳматуллоев дар вазни 62 кило, Абдураҳим Имомқулов дар вазни 100 кило ҷойҳои дуюмро ишғол намуданд. Ҳамчунин Одинабои Ҳукумалӣ дар вазни 48 кило ва Билол Нусратов дар вазни 82 кило ҷойҳои сеюмро соҳиб шуданд.

Мусобиқаи мазкур ба хотири гиромидошти чемпиони ИҶШС оид ба гӯштини самбо Афзалшо Олимов баргузор гардида, дар он беш аз 200 нафар варзишгар аз тамоми минтақаҳои мамлакат ширкат доштанд.

Бояд зикр намуд, ки мактаби гӯштини самбои Шӯрои ҷумҳуриявии «Динамо» сол то сол рушд ёфта, дар он мураббиёни таҷрибадор, аз ҷумла Дилшод Бобоев, Зариф Назриев, Садриддин Обидов, Бобоҷон Маҳмадрасулов зери роҳбарии сармураббӣ Хайрулло Назриев ба гӯштингирони ҷавону наврас тамрин медиҳанд.