Ёвон: баҳри пешгирии корнавирус дар ноҳия корҳои безараргардонӣ ба роҳ монда шуданд

ДУШАНБЕ, 10.04.2020 /АМИТ «Ховар»/. То 9 апрел аз тарафи гурӯҳҳои дезинфексионии ноҳияи Ёвон дар 1 ҳазору 133 хоҷагӣ, 100 муассисаи таълимӣ, 176 масҷид, бозори марказии ноҳия ва тамоми ташкилоту муассисаҳои ноҳиявӣ корҳои безараргардонӣ доир шуда, ин иқдом дар деҳот ва дигар субъектҳои хоҷагидории ноҳия идома дорад.

Тавре аз Вазорати тандурустӣ ва ҳифзи иҷтимоии аҳолии мамлакат ба АМИТ «Ховар» хабар доданд, ба хотири пешгирӣ аз интиқолу паҳншавии сирояти короновирус  дар асоси дастуру супоришҳои Ситоди ҷумҳуриявӣ ва вилоятӣ оид ба пешгирӣ аз интиқол ва  паҳншавии сирояти  мазкур дар ноҳияи Ёвон тадбирҳои зарурӣ андешида мешаванд.

Бо ин мақсад ҳоло дар ноҳияи мазкур аз ҳисоби шуъбаҳои дезинфексионии Маркази назорати давлатии  санитарию эпидемиологӣ ва маркази тропикӣ шуъбаи дезинфексионӣ ташкил гардидааст.

Ёдовар мешавем, ки айни замон аз ҳисоби кормандони сохторҳои соҳаи тандурустӣ дар ноҳияи Ёвон 87 гурӯҳҳои ташфиқотию тарғиботӣ таъсис дода шудааст, ки онҳо байни мардум оид ба пешгирии сирояти коронавирус ва риояи қоидаҳои гигиенаи шахсӣ корбарӣ менамоянд.