Ёдгор Файзов, Раиси ВМКБ: «Бо мақсади пешгирии бемории сироятӣ аз риояи баъзе расму суннатҳо муваққатан худдорӣ намудан зарур аст»

Май 13, 2020 11:11

ХОРУҒ, 13.05.2020 /АМИӢ «Ховар»/. Яке аз масъалаҳои нозукин ба хок супоридани шахсоне мебошад, ки бар асари бемории сироятии COVID-19 аз дунё реҳлат мекунанд. Бо мақсади ҳифзи саломатии хешу табор, ёру дӯстон то лаҳзаи омода гардидани манзили охират ҷасад дар беморхона мемонад ва танҳо бо тавсия ва ҳузури табибон он ба хок супорида мешавад. Бояд дар ин лаҳзаҳои душвору ҳассос бо мақсади пешгирӣ аз паҳншавии ин бемории сироятӣ аз риояи баъзе расму суннатҳои исломӣ ва аҷдодӣ муваққатан худдорӣ варзем. Ин матлабро Раиси Вилояти Мухтори Кӯҳистони Бадахшон Ёдгор Файзов зимни ҷаласаи навбатии ситоди вилоятӣ доир ба пешгирӣ аз бемории сироятии COVID-19 баён дошт.

Раиси вилоят Ёдгор Файзов ба ҳамаи сокинони вилоят барои риояи маслиҳату тавсияи табибон изҳори сипос намуда, аз кулли сохторҳои давлатию ҷамъиятӣ, соҳибкорону волонтёрон даъват кард, ки дар ин шабу рӯз дар канори табибон бошанд ва онҳоро ҳам аз ҷиҳати моддӣ ва ҳам маънавӣ дастгирӣ намоянд. Ҳарчанд ки аксарияти сокинони вилоят аз ниқобҳои муҳофизатӣ истифода мебаранду ба кӯча ҳам кам мебароянд, аммо  ҳанӯз ҳам шумораи зиёди одамон дар назди дарвозаи беморхонаи вилоятӣ ҷамъ шуда, мехоҳанд бо беморон аз наздик дидору гуфтугӯ намоянд. Бо ҳамин роҳ онҳо ҳам ҷони худ ва ҳам ҷони наздиконашонро дар хатар мегузоранд.

Дар ин шабу рӯз сокинони 17 маҳаллаи шаҳри Хоруғ беморхонаи вилоятиро бо навбат бо ғизои гарм таъмин мекунанд ва ниёз ба кумаки беруна нест. Катҳои хоб ҳанӯз басандаанд ва дар сурати зарурӣ беморхона бо катҳои иловагӣ таъмин мегардад. Ҳамчунин баъзе аз соҳибкорони саховатпеша барои қабул ва табобати беморон меҳмонхонаҳои хусусии худро пешниҳод карданд, ки ҳоло аз тарафи мутахассисони соҳа мавриди омӯзиш қарор гирифтаанд.

Раиси вилоят ба масъулини Раёсати тандурустии вилоят супориш дод, ки ба ташхиси беморон аҳамияти ҷиддӣ диҳанд ва аввал ба онҳое кумак расонанд, ки вазъи саломатиашон вазнин аст. Зеро мутобиқи таҳқиқи коршиносони соҳаи тиб, 85 фоизи сироятёфтагон дар шароити хона низ шифо меёбанд. Ҳамчунин ҳар сари чанд вақт аз ҳоли табибони шабакаи ёрии таъҷилӣ хабар гирифтан зарур аст. Зеро онҳо дар хати аввали мубориза бо ин бемории сироятӣ қарор доранд. Ба иттилои сардори Маркази ёрии таъҷилии вилоят, дар як рӯз то 85 занги телефонӣ ворид мешавад, аммо ин марказ ҳамагӣ 5 мошини ёрии таъҷилӣ дорад. Барои ҳалли ин масъала тадбирҳои мушаххас андешидан зарур аст.

Дар масъалаи таъмини доруворӣ ва маҳсулоти хӯрокворӣ то ба ҳол ягон камбудӣ вуҷуд надорад ва  ҳамарӯза аз пойтахти мамлакат интиқоли маҳсулот ба шаҳру ноҳияҳои вилоят идома дорад. Нархи орду сабзавот то ин дам муътадил нигоҳ дошта мешавад. Нархи 1 кг картошка 6 сомонӣ, пиёз 3 сомонӣ, сабзӣ 2,5 сомонӣ, шир 6 сомонӣ, гӯшт 44 сомонӣ, орд аз 225 то 260 сомонӣ аст. Ҳоло дар тамоми ноҳияҳои вилоят 452 тонна орд аз тарафи Агентии давлатии захираҳои моддии назди Ҳукумати Ҷумҳурии Тоҷикистон захира шуда,  дар худи анборхонаи ин агентӣ низ 130 тонна орд мавҷуд аст.

Дар назди мақомоти иҷроияи ҳокимияти давлатии вилоят суратҳисоби махсус бо мақсади кумак ба беморону табибон кушода шуда, давоми ҳамагӣ чанд рӯз ба ин суратҳисоб 78 ҳазор сомонӣ ворид гардид.

Раиси вилоят аз кормандони воситаҳои ахбори оммаи маҳаллӣ даъват намуд, ки ба сокинони вилоят маълумоти дақиқ пешниҳод кунанд ва ба ин восита аз паҳншавии ҳар гуна овозаҳои бардурӯғу ғаразомез ҷилавгирӣ намоянд.

Май 13, 2020 11:11

Хабарҳои дигари ин бахш

Президенти Тоҷикистон: «Зиндагии орому осудаи мардуми мо ба қимати ҷони ҳазорон нафар ҷавонмардони ватандӯсту ҷоннисор ва бонангу номуси халқи тоҷик ба даст омадааст»
Пешвои миллат: «Қувваҳои Мусаллаҳ дар айёми барои халқи Тоҷикистон ва давлати тоҷикон ниҳоят ҳассосу сарнавиштсоз хизмати ҷавонмардонаву таърихӣ анҷом доданд»
ҲИФЗИ ОЗОДАПАЛАНГ. Дар Тоҷикистон «Барномаи давлатӣ оид ба ҳифзи бабри барфӣ барои солҳои 2024-2028» қабул гардид
РАВАНДИ ОБИ ДУШАНБЕ. Корҳои омодагӣ ҷиҳати баргузор намудани Конфронси сеюми байналмилалии сатҳи баланд оғоз гардиданд
ПАЙОМАДИ КАМБОРИШУ ХУШК ОМАДАНИ ТИРАМОҲУ ЗИМИСТОН. Он то 30-40 фоизи ҳосили зироати кишоварзиро талаф медиҳад
Эмомалӣ Раҳмон: «Таъкид месозам, ки ҳар оилаи мамлакат бояд ба муҳлати то ду сол захираи маводи зарурии ғизоӣ дошта бошад»
Эмомалӣ Раҳмон: «Сада моҳиятан тақвими чиллашуморӣ аст»
Бемасъулиятӣ ё қафомондагӣ? Сомонаи расмии Агентии авиатсияи граждании назди Ҳукумати Ҷумҳурии Тоҷикистон ба талаботи имрӯз ҷавобгӯ нест. Чаро?
Президенти Тоҷикистон: «Камборишу хушк омадани тирамоҳу зимистони имсола моро водор месозад, ки тамоми имкониятро самаранок истифода намоем»
ТОҶИКИСТОН ВА ҚАТАР. Андешаҳо доир ба афзалият ва дурнамои рушди ҳамкории дуҷониба
ДАР ПАРТАВИ ПАЁМИ ПРЕЗИДЕНТИ ҶУМҲУРИИ ТОҶИКИСТОН БА МАҶЛИСИ ОЛӢ. ТАРБИЯИ ҲУҚУҚӢ – МЕҲВАРИ МАЪРИФАТИ ҲУҚУҚИИ ҶАВОНОН ДАР ҶУМҲУРИИ ТОҶИКИСТОН. Мулоҳизаҳои Ректори Донишгоҳи миллии Тоҷикистон Эмомалӣ Насриддинзода
Президенти Тоҷикистон зимни мулоқот бо соҳибкорон ва сармоягузорони Қатар 8 бахши ояндадорро муаррифӣ намуданд