«Оби Зулол»: Тасмими фаъол кардани хатҳои нави истеҳсолӣ

Июнь 3, 2020 16:03

ДУШАНБЕ, 03.06.2020. /АМИТ Ховар/. Масъулини Ҷамъияти саҳомии пӯшидаи «Оби Зулол» бо воридсозии хатҳои нави технологӣ тасмим доранд истеҳсоли маҳсулоти ғизои бачагона ва афшураҳоро ба роҳ монанд. Дар ин бора аз мақомоти ичроияи ҳокимияти давлатии вилояти Суғд ба АМИТ «Ховар» хабар доданд.

Зимни боздиди Раиси вилояти Суғд Раҷаббой Аҳмадзода аз корхонаи мазкур иттилоъ дода шуд, ки ҶСП «Оби зулол» бо мақсади саҳмгузорӣ дар раванди саноатикунонии мамлакат аввалин шуда, истеҳсоли маҳсулоти хӯроквории ғизои кӯдаконро дар зарфҳои «Дой-пак» ба роҳ хоҳад монд.

Бо ин мақсад корхона аз ширкати «Navatta Group»-и Италия хатти технологии «GUALAPACK»-ро ба маблағи қариб 700 ҳазор евро харидааст. Айни замон насби хатти технологӣ идома дошта, тавассути таҷҳизоти нав дар зарфҳои «Дой-пак» аз меваҳои себ, шафтолу, нок, қулфинай маҳсулот истеҳсол карда мешавад.

Дар назар аст, ки барои кӯдакон, наврасони синни томактабӣ ва ҷавонон омехтаи меваҳои пухтасоидашуда ё смузи аз гулчини меваҳо, олу, себ, шафтолу, биҳӣ, нок ва барои гурӯҳи васеи истеъмолкунандагон нок, олу, анор, олуча бо мағзи ин меваҳо истеҳсол карда шавад. Ашёи хоми асосӣ барои маҳсулоти истеҳсолшаванда хамираи меваҳои ватанӣ маҳсуб ёфта, корхона бо хоҷагиҳо барои харидории 20 ҳазор тонна мева шартнома бастааст.

Ҳангоми пурра ба кор андохтани хатҳои нави истеҳсолӣ, ки дар маҷмӯъ ба маблағи 2,5 миллион евро харидорӣ шудаанд, имкон пайдо мешавад, ки ба маблағи 120 миллион сомонӣ маҳсулоти иловагӣ истеҳсол ва беш аз 50 ҷойи корӣ таъсис дода шавад.

Маҳсулоти истеҳсолшаванда тибқи нақша ба бозорҳои дохилӣ бароварда шуда, ҳамзамон ба Федератсияи Россия ва Қазоқистон содирот карда мешавад.

Пас аз шиносоӣ бо ҷараёни насби таҷҳизот Раиси вилоят барои пурра ба анҷом расонидани корҳо ба роҳбарияти корхона тавсияҳои судманд дод.

Июнь 3, 2020 16:03

Хабарҳои дигари ин бахш

Ҳамарӯза даҳҳо тонна пиёз ва картошка вориди бозорҳои Тоҷикистон мешавад
Озмуни «Маҳсулот ва хизматрасонии беҳтарин дар Ҷумҳурии Тоҷикистон» ҷамъбаст ва беҳтаринҳо соҳиби ҷоиза шуданд
Тоҷикистон ва Созмони ҷаҳонии сайёҳӣ ҳамкориро тақвият мебахшанд
Мушкилоти чорводорӣ. Чаро чорводорони дигар минтақаҳои мамлакат муҳлати ба чарогоҳҳои ноҳияи Сангвор овардани чорворо риоя намекунанд?
Дар шаҳри Ваҳдат Фестивал — намоиш ва фурӯши чорвои зотӣ оғоз шуд
Лоиҳаи «БРАМОМ-4» дар Тоҷикистон бо сифати баланд ва дар муҳлати муқарраршуда амалӣ карда мешавад
То охири соли равон Бонки осиёии рушд дар бахшҳои энергетика ва маориф ду лоиҳаи дигар қабул менамояд
Дар Душанбе масъалаи таҷдиди роҳи мошингарди «Гулистон-Фархор-Панҷ –Дӯстӣ» баррасӣ карда шуд
Ширкати муштараки сармоягузорӣ байни Тоҷикистон ва Узбекистон ба фаъолият шуруъ хоҳад кард
Охири моҳи июн дар Тоҷикистон ҷашни Тиргон, иди зардолу ва намоиши хушкмеваҳо баргузор хоҳад шуд
Тоҷикистон аъзои Кумитаи Созмони ҷаҳонии сайёҳӣ оид ба масъалаҳои узвият барои солҳои 2023-2027 интихоб гардид
Беш аз 20 корхонаи нассоҷӣ ва дӯзандагии Тоҷикистон аз «UzTextile Expo Spring» боздид намуд