Обидҷон Саидзода – директори нави Радиои Тоҷикистон

ДУШАНБЕ, 16.06.2020 /АМИТ «Ховар»/. Имрӯз дар мувофиқа бо Президенти Ҷумҳурии Тоҷикистон Раиси Кумитаи телевизион ва радиои назди Ҳукумати Ҷумҳурии Тоҷикистон бо фармони худ рӯзноманигори ҷавон  Обидҷон Саидзодаро  директори Радиои Тоҷикистон таъйин намуд. 

Обидҷон Саидзода 29 июли соли 1986 таваллуд шуда, хатмкардаи факултаи журналистикаву тарҷумонии Донишгоҳи миллии Тоҷикистон (2003 — 2008) мебошад.

Мавсуф то ҳол хабарнигори идораи барномаҳои фарҳангӣ-фароғатӣ (2010), мудири шӯъбаи танзими барномаҳо (2012), муҳарирри калони Идораи барномаҳои таҳлилӣ (2015) ва панҷ соли охир муовини аввали директори Радиои Тоҷикистон буд.

«Обидҷон Саидзода муаллифи китоби «Умре бо радио» (дар бораи яке аз собиқадорони радио ва театри тоҷик Ҳунарпешаи шоистаи Тоҷикистон Ҳалима Насибулина – тавз. АМИТ «Ховар») ва дар таърихи радиои Тоҷикистон ҷавонтарин раҳбари ин дастгоҳи иттилоотии давлатӣ аст», – навиштааст имрӯз агентии иттилооотии Россия «Sputnik».

Хотиррасон мешавем, ки Радиои Тоҷикистон  чанд шабакаи радиои Кумитаи телевизион ва радиои   назди Ҳукумати Ҷумҳурии Тоҷикистон — «Тоҷикистон»,  «Фарҳанг», «Овози тоҷик» ва «Садои Душанбе»-ро дарбар мегирад, ки ҳар яке самти хоси худро дорад.