Академияи идоракунии давлатӣ дар доираи барномаи «Еrasmus+» конференсияи илмӣ-амалӣ баргузор менамояд

Июль 30, 2020 12:30

ДУШАНБЕ, 30.07.2020 /АМИТ «Ховар»/. Дар назар аст, ки моҳи сентябри имсол дар доираи барномаи байналмилалии «Еrasmus+» марҳилаи якуми конференсияи илмӣ-амалӣ дар мавзӯи «Татбиқи моделҳои хизматрасонӣ барои шахсони имконияташон маҳдуд» тариқи онлайн сурат гирад. Дар ин бора  имрӯз  ректори Академияи идоракунии давлатии назди Президенти Ҷумҳурии Тоҷикистон Абдухалил Ғафурзода зимни нишасти матбуотӣ хабар дод.

Номбурда афзуд, ки марҳилаи дуюми конференсияи мазкур соли 2021 баргузор карда шуда, дар он як зумра масъалаҳо, аз ҷумла заминаҳои ҳуқуқии кор бо шахсони имконияташон маҳдуд, муқаррароти Конвенсияи СММ «Дар бораи ҳуқуқҳои маъюбон», моделҳои муосири кор бо шахсони имконияташон маҳдуд, робитаҳои байналмилалӣ дар самти кор бо шахсони имконияташон маҳдуд, нақши ҳокимияти маҳаллӣ дар самти кор бо шахсони имконияташон маҳдуд, таҷрибаи ҷаҳонӣ дар самти кор бо шахсони имконияташон маҳдуд ва фарогирии шахсони имконияташон маҳдуд дар низоми хизмати давлатӣ мавриди муҳокима қарор мегиранд.

Ректор афзуд, ки 22-23 майи соли 2020 Академияи идоракунии давлатии назди Президенти Ҷумҳурии Тоҷикистон дар мувофиқа бо Вазорати маориф ва илми Ҷумҳурии Тоҷикистон ҷиҳати татбиқи «Барномаи миллии тавонбахшии маъюбон барои солҳои 2017- 2020» ва лоиҳаи «Рушди хизматрасонӣ ба ашхоси имконияташон маҳдуд» (DECIDE) дар доираи барномаи байналмилалии «Еrasmus+» баргузор намудани конференсияи илмӣ-амалиро дар мавзӯи «Татбиқи моделҳои хизматрасонӣ барои шахсони имконияташон маҳдуд» ба нақша гирифта буд. Аммо, мутаассифона, бо сабаби пандемияи COVID-19 ин конфронси илмии сатҳи байналмилалӣ мавқуф гузошта шуд. Инак марҳилаи аввали он моҳи сентябри соли 2020 тариқи онлайн ва марҳилаи дуюми конференсияи мазкур соли 2021 баргузор мегарданд.

Дар мавриди  ҳамкории байналмилалӣ Абдухалил Ғафурзода  зикр кард,  ки Академия бо муассисаҳои таҳсилоти олии хориҷӣ ва созмонҳои дигари байналмилалӣ ҳамкории судманд дорад.

Ҳамзамон Академия тамдид додани Созишномаи ҳамкорӣ бо Бонки Осиёгии Рушд, Барномаи рушди СММ, Намояндагии минтақавии Созмони Милали Муттаҳидро барои ҷорӣ намудани мақсадҳои устувори рушди СММ то соли 2030 мавриди корбарӣ гирифтааст.

Академия ҷиҳати бастани созишномаҳои нави ҳамкорӣ бо Академияи идоракунии давлатии назди Президенти Ҷумҳурии Ӯзбекистон ва Академияи идоракунии давлатии назди Президенти Туркманистон гуфтушунид доир намуда истодааст.

Аз соли 2009 инҷониб Академияи идоракунии давлатии назди Президенти Ҷумҳурии Тоҷикистон бо Бунёди Ҳаннс Зайдели Ҷумҳурии Федералии Германия ҳамкории судманди дуҷониба дорад. Бунёди Ҳаннс Зайдел дар якҷоягӣ бо Академия тибқи барномаи таълимии магистрӣ аз рӯйи ихтисоси “Идораи давлатӣ” ба тайёркунии касбии хизматчиёни давлатии Ҷумҳурии Тоҷикистон машғул мебошад.

Академияи идоракунии давлатии назди Президенти Ҷумҳурии Тоҷикистон дар самти робитаҳои байналмилалӣ минбаъд низ барои густариш додани ҳамкории судманд ва созанда бо дигар шарикони дохилию байналмилалӣ бештар кӯшиш менамояд.

Июль 30, 2020 12:30

Хабарҳои дигари ин бахш

«Гуфтугӯи ду насл». Таҳти ин унвон бахшида ба 90-солагии «Ҷавонони Тоҷикистон» ҳамоиши ҷумҳуриявии рӯзноманигорон доир шуд
Дар Челябинск китоби Зафар Сайидзода таҳти унвони «История России» ба нашр расид
Зулфия Давлатзода дар ҷаласаи 17-уми вазирони фарҳанги кишварҳои узви Созмони ҳамкории Шанхай сухан гуфт
Филми «Автобус»-и коргардони тоҷик Абдулҳай Зокиров дар фестивали байналмилалӣ ҷоиза гирифт
12 сол қабл дар деҳаи Панҷрӯди Панҷакент мақбараи асосгузори адабиёти тоҷику форс Абӯабдулло Рӯдакӣ ифтитоҳ гардид
Осорхонаи миллии Тоҷикистон соҳиби ҷоизаи «Интихоби сайёҳон» гардид
3 нафар донишҷӯёни Донишкадаи давлатии фарҳанг ва санъат ғолиби даври ноҳиявии озмуни «Фурўғи субҳи доноӣ китоб аст» гардиданд
Кашшофи Саразм. Гиромидошти хотираи доктори илмҳои таърих, равоншод Абдуллоҷон Исҳоқӣ дар шаҳри Исфара
ГЕСӮИ ДАРОЗ — НИМИ ҲУСН. Имрӯз Рӯзи байналмилалии зебоӣ низ таҷлил карда мешавад
Муовини Сарвазири мамлакат Ширин Исматуллозода ба аҳли фарҳанг мукофотҳои давлатӣ супорид
Ғолибони даври аввали озмуни «Об – гарави рушди деҳот ва сайёҳӣ» муайян ва қадрдонӣ шуданд
Ходими адабии АМИТ «Ховар» Камол Насрулло дар озмуни «Тоҷикистон – хонаи умеди мо» соҳиби ҷойи аввал дар бахши назм гардид