Бонки Осиёии Рушд ба Тоҷикистон давоми солҳои 2021-2023 323 миллион доллар грант медиҳад

Август 27, 2020 13:00

ДУШАНБЕ, 27.08.2020 /АМИТ «Ховар»/. Бонки Осиёии Рушд (БОР) ба нақша  гирифтааст, ки давоми солҳои 2021 — 2023 ба Тоҷикистон 323 миллион доллар ба шакли грант пешниҳод намояд, хабар медиҳад АМИТ «Ховар» бо истинод ба хадамоти матбуотии намояндагии доимии БОР дар Душанбе.

«БОР ба Тоҷикистон дар се соли оянда 323 миллион доллар хоҳад дод, то ки барои қонеъ кардани ниёзҳои рушди кишвар мутобиқи нақшаи тиҷоратии таҷдидшудаи амалиётҳои бонк дар мамлакат  кумак расонад»,  — гуфт сухангӯи матбуотӣ Татяна Евстифеева.

Ба гуфти ӯ, илова бар ин, дар давраи мазкур ҷудо намудани  5,25 миллион доллар дар шакли кумаки техникӣ барои гирифтани дониш ва омодасозии лоиҳаҳо ба нақша гирифта шудааст.

«Ин нақша ҳадафҳои Стратегияи миллии рушди Тоҷикистонро барои давраи то 2030 дастгирӣ ва бо Стратегияи БОР то соли 2030 мувофиқат мекунад. Нақша инчунин гузариш ба шарикии стратегиии БОР бо ин кишварро барои солҳои 2021-2025 ба инобат гирифтааст, ки дар ҳоли коркард аст ва ба раванди номуайяни пандемияи COVID-19 мутобиқ карда хоҳад шуд», — гуфт Татяна Евстифеева.

Дар нақша барои солҳои 2021-2023 лоиҳаҳо оид ба беҳтар намудани амнияти озуқаворӣ ва идоракунии захираҳои об, инчунин оид ба рушди инфрасохтори шаҳрӣ ва бахши энергетика  шомил мебошанд. БОР инчунин ба нақша гирифтааст, ки лоиҳаҳоро дар бахшҳои рушди соҳаи тандурустӣ,  сайёҳӣ, такомули бахши молиявӣ, баланд бардоштани устуворӣ дар муқобили офатҳои табиӣ ва беҳтар намудани бахши роҳҳо дастгирӣ намояд.

Илова бар ин, дар нақша лоиҳаҳое ғунҷонида шудаанд, ки идоракунии электронӣ ва беҳтар намудани таҳсилро дар соҳаҳои илмҳои табиӣ, технология, муҳандисӣ ва риёзӣ дастгирӣ мекунанд.

Маблағи ниҳоии кумаки банақшагирифтаи БОР аз омилҳои гуногун, аз ҷумла мавҷудияти захираҳо, омодагии лоиҳаҳо ва натиҷаи арзёбии дастовардҳои миллӣ дар ҷумҳурӣ  вобаста хоҳад буд.

Интизор меравад, ки дар соли 2020 кумаки маҷмӯии БОР ба Тоҷикистон 320 миллион доллар дар шакли грант, ба шумули лоиҳаҳо дар соҳаи нақлиёт, кишоварзӣ ва захираҳои табиӣ, идоракунии бахши давлатӣ, маориф ва энергетика хоҳад буд. Дар ин маблағ инчунин як бастаи вокуниши таъҷилӣ ба COVID-19  дар ҳаҷми  52,5 миллион доллар низ шомил мебошад.

Ёдовар мешавем, ки Ҷумҳурии Тоҷикистон  соли 1998 ба узвияти   Бонки Осиёии Рушд  шомил гардидаааст. Аз он замон то ҳол  аз бонки мазкур   дар ҳаҷми зиёда аз 1,9 миллиард доллар кумак гирифтааст, ки 1,4 миллиард доллари онро грантҳо ташкил медиҳанд.

ДАР АКС: 26 октябри соли 2017 Президенти Ҷумҳурии Тоҷикистон  Эмомалӣ Раҳмон дар Қасри миллат Президенти  БОР Такехико Накаоро пазируфт.  

Август 27, 2020 13:00

Хабарҳои дигари ин бахш

Озмуни «Маҳсулот ва хизматрасонии беҳтарин дар Ҷумҳурии Тоҷикистон» ҷамъбаст мегардад
Таҳкими ҳамкории гумрукӣ дар ҷаласаи коршиносони Шурои роҳбарони хадамоти гумруки ИДМ баррасӣ гардид
Намояндаи Тоҷикистон дар Форуми иқтисодии Авруосиё 2025 иштирок намуд
Ҳамкории Институти масъалаҳои об, гидроэнергетика ва экологияи Тоҷикистон ва Донишгоҳи захираҳои табиӣ ва илмҳои амалии Австрия густариш меёбад
Барои истифодаи сарфакоронаи неруи барқ дар шаҳру навоҳии тобеи ҷумҳурӣ корҳои фаҳмондадиҳӣ мегузаронанд
Дар Боку Форуми байналмилалӣ доир ба рушди омор оғоз гардид
ҲАҶМИ ИСТЕҲСОЛИ ГӮШТ ДАР ТОҶИКИСТОН 10 ФОИЗ ЗИЁД ГАРДИД. Чаро нархи гӯшт дар бозори истеъмолӣ пайваста боло меравад?
Ҷаласаи нуздаҳуми Кумитаи ҳамоҳангсоз оид ба содагардонии расмиёти савдо баргузор гардид
Дар Тоҷикистон ба соҳаи сохтмон зиёда аз 16 миллиард сомонӣ сармоягузорӣ равона карда шудааст
Тоҷикистон ва Барномаи рушди СММ ҳамкориро дар самти муқовимат ба коррупсия густариш медиҳанд
Ҳоким Холиқзода бо Вазири меҳнат ва таъминоти иҷтимоии Ҷумҳурии Туркия Ведат Ишикхан мулоқот намуд
Ангури Тоҷикистон дар вилояти Пензаи Русия талабгорони зиёд пайдо намуд