Фестивали дӯстии ҷавонону варзишгарони Душанбе ҷамъбаст гардид: дастаи ДТТ мақоми аввалро соҳиб шуд

ДУШАНБЕ, 16.09.2020 /АМИТ «Ховар»/. 15 сентябр дар майдони варзишии «Душанбе–Арена» маросими ҷамъбастии мусобиқаи футболи хурд доир гардида, дастаи яккачини Донишгоҳи тиҷорати Тоҷикистон ғолиби ҷойи аввал дониста шуд. Коллеҷи тарбияи ҷисмонии Тоҷикистон ҷойи дуюм, Донишгоҳи техникии Тоҷикистон ба номи М.С.Осимӣ ва Донишкадаи сайёҳӣ, соҳибкорӣ ва хизмат ҷойи сеюмро ишғол намуданд. Дар ин бора ба хабарнигори АМИТ «Ховар» мутахассиси Раёсати кор бо ҷавонон ва варзиши шаҳри Душанбе Осим Муродзода иттилоъ дод.

Дар маросими ҷамъбастии мусобиқаи футболи хурд муовини якуми Раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон Ризо Назарзода, сардори Раёсати кор бо ҷавонон ва варзиши шаҳри Душанбе Шоҳзод Раҳимзода, муовини сардори Раёсати тарбияи ҷисмонӣ ва инкишофи варзиши Кумитаи кор бо ҷавонон ва варзиш  Абдулло Маҳмадализода ва дигар масъулини соҳаи варзиши шаҳри Душанбе иштирок доштанд.

Ёдовар мешавем, ки аз 3 то 13 cентябр бо дастгирии Мақомоти иҷроияи ҳокимияти давлатии шаҳри Душанбе Фестивали дӯстии ҷавонону варзишгарони пойтахт аз рӯи 4 намуди варзиш:  футболи хурд, волейбол миёни духтарон, шоҳмот ва гӯштини миллӣ доир шуд.

Мақсад аз аз баргузор намудани Фестивали мазкур, пеш аз ҳама, самаранок истифода намудани иншооти соҳаи варзиш, пешбурди корҳои фаҳмондадиҳӣ бо сокинон ва наврасону ҷавонони маҳал, хонандагону донишҷӯён ва афсарону сарбозон ҷиҳати таҳкими тарзи ҳаёти солим мебошад.