Пешвои миллат Эмомалӣ Раҳмон боғи фарҳангӣ-фароғатии шоҳ Исмоили Сомониро дар ноҳияи Шаҳринав ифтитоҳ намуданд

Сентябрь 30, 2020 10:25

ДУШАНБЕ, 30.09.2020 /АМИТ «Ховар»/. 30 сентябр дар идомаи сафари корӣ дар ноҳияи Шаҳринав Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар маркази ноҳияи Шаҳринав ҳамчунин боғи фарҳангӣ-фароғатии Шоҳ Исмоили Сомониро мавриди истифода қарор доданд.

Иншооти мазкур аз ҷониби Мақомоти иҷроияи ҳокимияти давлатии ноҳияи Шаҳринав дар якҷоягӣ бо соҳибкорону шахсони саховатпеша дар масоҳати умумии 1,98 гектар бунёд шудааст. Тадбири мазкур яке аз бандҳои нақшаи корӣ бахшида ба 30-юмин солгарди Истиқлоли давлатии Ҷумҳурии Тоҷикистон ба ҳисоб меравад.

Корҳои сохтмонӣ ҳанӯз аввали соли равон оғоз гардида, иншоот дар муддати кӯтоҳ ва бо сифати баланд ба итмом расонида шуд.

Дар боғи фарҳангӣ-фароғатӣ тамоми маҳсулоти сохтмонӣ сирф ватанӣ буда, корҳои бунёдӣ аз ҷониби сохтмончиёни маҳаллӣ иҷро гардидаанд.

Дар ҳамин ҷо Сарвари давлат ҳамчунин аз пайкараи тозабунёди Асосгузори аввалин давлати тоҷикон- Шоҳ Исмоили Сомонӣ пардабардорӣ намуданд. Иттилоъ дода шуд, ки пайкараи Шоҳ Исмоили Сомонӣ бо дарназардошти зерибиноаш 5 метрро ташкил дода, он аз ҷониби рассом, ҳайкалтарош Сафарбек Қосимов таҳия шудааст.

Қомат афрохтани муҷассамаи бунёдгузори давлати тоҷикон Шоҳ Исмоили Сомонӣ дар маркази боғ ба ҳусни ин макони фарҳангӣ зебоии дигар зам намуда, шаҳодати ҳифзу нигоҳдории арзишҳои миллӣ ва эҳтиром ба гузаштагон аст.

Зимни шиносоӣ Пешвои муаззами миллат ба корҳои анҷомёфта баҳои баланд дода, ифтитоҳи боғи мазкурро дар маркази ноҳия ҷиҳати рушд ва густариши соҳаи фарҳанг неку назаррас маънидод намуданд. Таъкид карда шуд, ки боғи Исмоили Сомонӣ дар ноҳияи Шаҳринав яке аз маконҳои асосии баргузории ҷашну чорабиниҳои давлатию миллӣ ба ҳисоб рафта, ҳамчунин барои истироҳату фароғати сокинон имконоти мусоид фароҳам гардидааст.

7 адад аттраксион барои бозии кӯдакон, беш аз 40 нишастгоҳ, ҳайкали 10 ҳайвончаи афсонавӣ ва амсоли инҳо дар дохили боғ барои истироҳату фароғати бошандагони ноҳия мавриди баҳрабардорӣ қарор дода шудааст.

Ба масъалаи сабзазор кардани иншооти тозабунёд таваҷҷуҳи бештар зоҳир гардида, зиёда аз 10 ҳазор метри мураббаъ бо гулу дарахтони ороишию сояафкан оро дода шудааст, ки ба ҳусни гулгашти мазкур таровати тоза зам менамояд. Бо назардошти талаботи меъморию шаҳрсозӣ тамоми роҳраву гузаргоҳҳои дохилу атрофи боғи Исмоили Сомонӣ сафолакпӯш гардида, ҳамзамон чароғон карда шудааст, ки ҳангоми сайругашти шабона мусоид мебошад.

Дар ҳамин росто Президенти мамлакат муҳтарам Эмомалӣ Раҳмон аз намоиши ҳунарҳои мардумӣ ва натиҷаи заҳмати чирадастони ноҳия дидан карда, ба маҳорати волои бонувони ноҳия баҳои баланд доданд.

Сарвари давлат таъкид намуданд, ки дар доираи эълони сесолаи рушди деҳот, сайёҳӣ ва ҳунарҳои мардумӣ ҳунармандони мардумӣ бояд пурмасъулият бошанд ва дар ҳифзу эҳёи ҳунарҳои аҷдодӣ саҳми назаррас гузоранд.

Таъкид кардан бамаврид аст, ки дар ноҳияи Шаҳринав то истиқболи сазовори ҷашни 30 — солагии Истиқлоли давлатӣ бунёди беш аз 434 иншоот ба нақша гирифта шудааст. То ба имрӯз аллакай 285-тои он мавриди истифода қарор дода шуда, дар боқимонда иншоот корҳои сохтмонӣ бомаром идома доранд.

Ифтитоҳи боғи фарҳангӣ-фароғатии шоҳ Исмоили Сомонӣ дар ноҳияи Шаҳринав 30.09.2020

Сентябрь 30, 2020 10:25

Хабарҳои дигари ин бахш

Дар шаҳри Панҷакент Боғи фарҳангию фароғатии ба номи Абулқосим Фирдавсӣ бунёд карда мешавад
Президенти Ҷумҳурии Тоҷикистон Эмомалӣ Раҳмон машварати корӣ доир намуданд
СОҲИБКОРОНИ ВАТАНДӮСТ. Бо ташаббуси онҳо дар Хатлон сохтмони муассисаҳои таҳсилоти томактабӣ идома дорад
Мумфаршкунии роҳи мошингарди Чимтеппа-Шарора-Ҳисор оғоз гардид
Президенти Ҷумҳурии Тоҷикистон Эмомалӣ Раҳмон ба Президент ва Сарвазири Ҷумҳурии Ҳиндустон Драупади Мурму ва Нарендра Модӣ барқияи изҳори тасаллӣ ирсол намуданд
Президенти Ҷумҳурии Тоҷикистон Эмомалӣ Раҳмон Вазири кишвари (корҳои дохилии) Ҷумҳурии Исломии Эрон Искандар Муъминиро ба ҳузур пазируфтанд
Қарорҳои Ҳукумати Ҷумҳурии Тоҷикистон
Президенти Ҷумҳурии Тоҷикистон Эмомалӣ Раҳмон дар сохторҳои Вазорати корҳои дохилӣ таъйиноти кадрӣ ба амал оварданд
Президенти Ҷумҳурии Тоҷикистон Эмомалӣ Раҳмон ба Декани Коллегияи кардиналҳои Тахти Муқаддас Кардинал Ҷованни Баттиста Ре барқияи изҳори тасаллӣ ирсол намуданд
Дар шаҳри Турсунзода маркази табобатии «Осуда» ифтитоҳ гардид
35-СОЛАГИИ ИСТИҚЛОЛИ ДАВЛАТӢ. Дар Ҳисор сохтмони 4 мактаби нав ва 2 муассисаи томактабӣ шуруъ шуд
35-СОЛАГИИ ИСТИҚЛОЛИ ДАВЛАТӢ. Дар ҳамаи ҷамоатҳои деҳоти ноҳияи Мастчоҳ кӯдакистон сохта мешавад