Шӯро оид ба шарикии давлат ва бахши хусусӣ баргузор гардид

Сентябрь 30, 2020 17:18

ДУШАНБЕ, 30.09.2020/АМИТ «Ховар»/. Имрӯз дар шаҳри Душанбе таҳти раёсати  муовини аввали Сарвазири Ҷумҳурии Тоҷикистон-Раиси Шӯро оид ба шарикии давлат ва бахши хусусӣ  Давлаталӣ  Саид  ҷаласаи дувоздаҳуми  Шӯро оид ба шарикии давлат  ва бахши хусусӣ доир гардид.

Хабарнигори  АМИТ «Ховар» иттилоъ медиҳад, ки дар ҷаласаи Шӯро роҳбарону намояндагони вазорату идораҳои марбутаи мамлакат-адлия, молия,  рушди иқтисод ва савдо,  энергетика ва захираҳои об, нақлиёт, тандурустӣ ва ҳифзи иҷтимоии аҳолӣ, Кумитаи давлатии сармоягузорӣ ва идораи амволи давлатӣ, Кумитаи давлатии идораи  замин ва геодезӣ, Кумитаи меъморӣ ва сохтмон, хадамотҳои гумрук, алоқа ва зиддиинҳисорӣ ва директори Муассисаи  давлатии «Маркази татбиқи лоиҳаҳои  шарикии давлат ва бахши хусусӣ», инчунин роҳбарони мақомоти иҷроияи  ҳокимияти давлатии вилояти Суғд, шаҳри Бӯстон ва ноҳияи Спитамен иштирок намуданд.

Муовини аввали Сарвазири мамлакат  — Раиси Шӯро оид ба шарикии давлат ва бахши хусусӣ  Давлаталӣ  Саид  дар оғози ҷаласа зикр кард, ки   дар солҳои соҳибистиқлолӣ  таҳти сиёсати хирадмандонаи  Асосгузори сулҳу ваҳдати миллӣ –Пешвои миллат, Президенти   Ҷумҳурии Тоҷикистон муҳтарам  Эмомалӣ Раҳмон  муносибатҳои  муосири  шарикӣ бо бахши  хусусӣ дар мамлакат роҳандозӣ гардида, дар ин раванд  қонунгузории  шарикии  давлат ва бахши хусусӣ пурра ба талаботи  байналмилалӣ  мутобиқ гардонида шуд.

-Дар ин замина дар  ҷумҳурӣ  Шӯро оид ба шарикии  давлат бо бахши  хусусӣ таъсис дода шуд, ки лоиҳаҳои  ҳамкорӣ  бо бахши хусусиро  дар самти рушди инфрасохтор  ва хизматрасонии иҷтимоӣ  баррасӣ менамояд. Дар натиҷа давлат имрӯз метавонад  боэътимод  ба бахши хусусӣ уҳдадориҳои иҷтимоии худро вогузор созад,- афзуд муовини аввали Сарвазири мамлакат –Раиси Шӯро оид ба шарикии давлат  ва бахши хусусӣ Давлаталӣ Саид.

Ҳамзамон дар ҷаласа директори Муассисаи  давлатии «Маркази  татбиқи  лоиҳаҳои  шарикии   давлат ва бахши хусусӣ», Котиби Шӯро оид ба  шарикии давлат ва бахши хусусӣ Абдухолиқ  Холиқзода доир ба иҷрои протоколи ҷаласаи  ёздаҳуми  Шӯро гузориш дод.

Мавсуф афзуд, ки  дар зарфи ҳафт соли охир дар ҷумҳурӣ заминаи мусоиди  меъёрии ҳуқуқӣ  дар самти  шарикии давлат ва бахши  хусусӣ  фароҳам оварда шуда, дар  ин муддат   11 ҷаласаи Шӯро  оид ба шарикии давлат ва бахши хусусӣ  гузаронида шуд ва 5 лоиҳаи шарикии давлат ва бахши хусусӣ бо ҷалби беш аз 280 миллион сомонӣ  сармояи бахши хусусӣ  ба иқтисодиёти ҷумҳурӣ  татбиқ шуда истодааст. Таъкид шуд, ки дар натиҷаи фаъолияти Шӯро  оид ба шарикии давлат ва бахши хусусӣ  ва татбиқи лоиҳаҳои  шарикӣ уҳдадориҳои  иҷтимоии давлат  коҳиш дода шуда,  беш аз 270 ҷойи  кор  ва зиёда аз 8,8 миллион сомонӣ  ба буҷети давлат  андоз пардохт гардид.

Дар ҷаласа пешниҳоди пешакии  лоиҳаҳои   «Таъсиси маркази  таъмини асбоби тиббии бамаротиб  истифодашаванда  ва мониторинги сифати  безараргардонӣ» ва «Таъсиси Маркази скрингии аввалияи  бемории оташак» баррасӣ гардиданд, ки дар доираи дастуру супоришҳои Президенти Ҷумҳурии Тоҷикистон муҳтарам Эмомалӣ Раҳмон оид ба пешгирии бемориҳои сироятӣ,  Стратегияи   миллии рушди  Ҷумҳурии Тоҷикистон  барои давраҳои  то соли  2030, Стратегияи миллии  солимии  аҳолии Ҷумҳурии   Тоҷикистон  барои солҳои 2010-2020 ва Қонуни Ҷумҳурии Тоҷикистон «Дар бораи шарикии давлат ва бахши хусусӣ» татбиқ карда мешаванд.

Дар ҷаласа  доир ба масъалаҳои матраҳгардида қарорҳои  дахлдор қабул  гардида, ба вазорату идораҳои  марбута ва Муассисаи давлатии «Маркази татбиқи лоиҳаҳои шарикии давлат ва бахши хусусӣ» супоришҳои мушаххас дода шуданд.

Сентябрь 30, 2020 17:18

Хабарҳои дигари ин бахш

Гармхонаҳои ширкати «Моғиён- агро»-и шаҳри Панҷакент бозорро бо сабзавоти тоза таъмин менамоянд
Хатмкунандагони Барномаи гузариши иқлимӣ соҳиби шаҳодатнома шуданд
Дар шаҳри Турсунзода бинои нави маъмурии Истгоҳи роҳи оҳани «Регар» ба истифода дода шуд
Дар Бонки миллии Тоҷикистон Барномаи фишанги ҳамоҳангсозии сиёсӣ бо ҳайати Хазинаи Байналмилалии Асъор баррасӣ шуд
Тоҷикистон дар Абузабӣ шоми бошукуҳи сармоягузорӣ доир менамояд
Тақвияти ҳамкории Тоҷикистон ва Қазоқистон дар самти технологияҳои иттилоотӣ баррасӣ гардид
Татбиқи лоиҳаи «Асосҳои рақамии Тоҷикистон» баррасӣ шуд
Дар Душанбе ҷаласаи 27-уми Комиссияи Иттиҳоди минтақавӣ дар соҳаи алоқа баргузор мегардад
Дар Душанбе доир ба иқтисодиёти рақамӣ ҳамоиш баргузор шуд
Таҳкими ҳамкории иқтисодию тиҷоратии вилояти Суғди Тоҷикистон ва Тотористон баррасӣ гардид
Дар Қазон Форуми байналмилалии энергетикии Тотористон – «ЭНЕРГОПРОМ-2025 ва намоишгоҳи «KazanEnergyExpo» доир гардид
Дар ҷаласаи 66-уми Шурои электроэнергетикии ИДМ иқтидори гидроэнергетикии Тоҷикистон баррасӣ гардид