Нурулло Лоиқов аз нав Президенти Федератсияи дзюдои Тоҷикистон интихоб шуд

ДУШАНБЕ, 13.10.2020 /АМИТ «Ховар»/. Дар шаҳри Душанбе конференсияи ғайринавбатии   ҳисоботию интихоботии Ташкилоти ҷамъиятии Федератсияи гӯштини дзюдои  Ҷумҳурии Тоҷикистон баргузор гардид. Дар  конференсия аъзои федератсия ва кумитаи иҷроия   дар ҳузури намояндагони Кумитаи миллии олимпӣ ва Кумитаи кор бо ҷавонон ва варзиши назди Ҳукумати  Ҷумҳурии Тоҷикистон  якдилона Нурулло Лоиқовро аз нав Президенти Ташкилоти ҷамъиятии Федератсияи дзюдои Ҷумҳурии Тоҷикистон интихоб намуданд.  Дар ин бора аз Кумитаи кор бо ҷавонон ва варзиши назди Ҳукмати  Ҷумҳури Тоҷикистон  ба шореҳи варзиши АМИТ «Ховар» Меҳрони Қурбон хабар доданд.

Ҳамчунин дар раванди ҷаласа ноиби якум, ноибон, котиби генералӣ, директори генералӣ, раиси доварон ва Раиси комиссияи тафтишотӣ интихоб шуданд.

Дар   конференсия   аъзои федератсияю кумитаи иҷроия ширкат намуда, аз рӯйи масъалаҳои   муайянгардида   гуфтушунид анҷом дода, дар баробари ин қарорҳои дахлдор    қабул карданд. Аз рӯйи масъалаи якуми маҷлис ноиби Президенти федератсияи дзюдо Парвиз Нориён   сухан гуфта, оид ба фаъолияти ташкилоти ҷамъиятии Федератсияи дзюдои  Ҷумҳурии Тоҷикистон дар даври солҳои 2017-2020 ҳисобот доданд.

Зикр шуд, ки яке аз барномаҳои муҳими федератсия- ин лоиҳаи дзюдо дар мактаб мебошад. Дар доираи ин лоиҳа мактабҳои ноҳияҳои дурдасти   мамлакат бо татами ва либосҳои варзишӣ таъмин шуданд. Ин имкон дод, ки дар ҳар ноҳия дасти кам 50 наврас машғули ин намуди варзиш гарданд.