Пахтакорони Турсунзода то имрӯз зиёда аз 1000 тонна пахта ҷамъоварӣ намудаанд

ТУРСУНЗОДА, 09.10.2020. /АМИТ «Ховар»/. Соли равон кишоварзони  шаҳри Турсунзода дар майдони 1177 гектар пунбадона кишт намуданд. Ҳамчунин аз сабаби  сербориш омадани фасли баҳор дар майдони беш аз 400 гектар  кишти такрории чигит гузаронида шуд. Новобаста ба ин кишоварзони шаҳр ҷиҳати гузаронидани корҳои агротехникӣ тадбирҳои зарурӣ андешида, имсол  ният доранд ҳосили дилхоҳ ба даст оваранд.

Тибқи иттилои котиби матбуоти раиси шаҳри Турсунзода Фируз Холиқов,  то имрӯз аз майдонҳои хоҷагиҳои пахтакор  зиёда аз 1166 тонна ҳосил ҷамъоварӣ шудааст,  ки аз ҳар гектар то 22-сентнериро ташкил медиҳад.

Пахтакорони шаҳри Турсунзода бо истифода аз боду ҳавои мусоид ҷиҳати сари вақт ва беталаф ҷамъоварӣ намудани ҳосили пахта чораҳои зарурӣ дида истодаанд. Бо мақсади  вусъати корҳо ба майдон қувваи чинакчиён ҷалб гардида, ҳаққи меҳнати онҳо сари вақт пардохт мешавад.