Панҷакенти бостонӣ имкон дорад дар як сол то 200 ҳазор сайёҳ қабул намояд,- бардошт аз ҳамоиши ҷумҳуриявӣ

Октябрь 6, 2020 11:03

ДУШАНБЕ, 06.10.2020 /АМИТ «Ховар»/. Панҷакент яке аз аввалин шаҳри Тоҷикистон аст, ки ба низоми ҷаҳонии Booking.com ворид карда шуд. Тибқи таҳлилҳои оморӣ, соли 2019   72 ҳазору 736 нафар сайёҳ аз шаҳри Панҷакент дидан намуд. Аз ин шумора 34 ҳазору 28 нафарашон шаҳрвандони хориҷӣ мебошанд, ки аз шумораи умумии сайёҳони хориҷии ташрифоварда ҳамагӣ 2,8 фоизашро  ташкил медиҳад. Бо назардошти шароити мавҷуда шаҳри Панҷакент солона имкони қабули то 200 ҳазор сайёҳи хориҷиро дорад.

Ин матлаб  зимни баргузории  ҳамоиши ҷумҳуриявӣ таҳти унвони  «Панҷакент-шиносномаи сайёҳии Тоҷикистон», ки  имрӯз дар шаҳри бостонии Панҷакент доир шуд, баён гардид.

Тавре котиби матбуоти Кумитаи рушди сайёҳӣ Абдукарим Қурбонов ба АМИТ «Ховар» аз шаҳри Панҷакент иттилоъ дод, ҳамоишро Кумитаи рушди сайёҳии назди Ҳукумати Ҷумҳурии Тоҷикистон дар ҳамкорӣ бо Мақомоти иҷроияи ҳокимияти давлатии вилояти Суғд ва шаҳри Панҷакент дар партави сиёсати хирадмандонаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар рушди соҳаи сайёҳӣ ва муаррифии шаҳри Панҷакент, хосса Саразми бостонӣ ҳамчун шиносномаи сайёҳии Тоҷикистон баргузор намуд.

«Дар ҳамоиш роҳбарони Вазорати фарҳанги ҷумҳурӣ, мақомоти иҷроияи ҳокимияти давлатии шаҳри Панҷакент, Институти таърих, бостоншиносӣ ва мардумшиносии Академияи миллии илмҳои Тоҷикистон, кумитаҳои кор бо ҷавонон ва варзиш, телевизион ва радио, кор бо занон ва оила, Донишкадаи сайёҳӣ, соҳибкорӣ ва хизмат, намояндаи Комиссияи миллӣ оид ба корҳои ЮНЕСКО, Шуъбаи милитсияи сайёҳии Вазорати корҳои дохилӣ, намояндагони созмонҳои байналмилалӣ, кормандони дастгоҳи марказии Кумита ва сардорони воҳидҳои сохтори сайёҳии маҳаллӣ, гурӯҳи ҷавонони «Авангард» ҳузур доштанд», -афзуд манбаъ.

Раиси Кумитаи рушди сайёҳӣ Ширин Амонзода иброз дошт, ки Пешвои миллат муҳтарам Эмомалӣ Раҳмон бо мақсади дар сатҳи зарурӣ муаррифӣ намудани таъриху тамаддун, расму оин, ҷашну маросим, анъанаҳои миллӣ ва имконоти сайёҳии Тоҷикистон дар арсаи байналмилалӣ ва ҷалби сармояи хориҷӣ ба соҳаи сайёҳӣ соли 2018 Соли рушди сайёҳӣ ва ҳунарҳои мардумӣ ва дар идомаи ин ташаббус солҳои 2019-2021-ро Солҳои рушди деҳот, сайёҳӣ ва ҳунарҳои мардумӣ эълон намуданд. Дар доираи ин иқдоми бузург ва бо мақсади ҳифзи хотираи таърихии миллат бо ибтикори бевоситаи Сарвари давлат моҳи сентябри соли равон ҷашни  5500 — солагии Саразми бостонӣ таҷлил гардид, ки шаҳодати шаҳрофарию тамаддунофарии миллати куҳанбунёд ва қадимӣ будани сарзамини тоҷикон мебошад. Шаҳри бостонии Панҷакент барои рушди сайёҳии таърихию фарҳангӣ ва этнографӣ, инчунин сайёҳии экологӣ мусоид буда, мавҷудияти яке аз маконҳои таърихӣ — шаҳри қадимаи Саразм, ки ба рӯйхати мероси ҷаҳонии ЮНЕСКО шомил гардидааст, диққати сайёҳонро ба худ бештар ҷалб менамояд. Дар ҳудуди шаҳри қадимаи Панҷакент беш аз 350 ёдгории таърихӣ, манзараҳои нотакрори табиӣ, мавзеъҳои истироҳатию фароғатӣ, ба монанди Кӯли Калон ва Ҳафткӯл мавҷуданд, ки бо диданашон дар хотироти сайёҳон то дер нақш мебанданд.

Дар ин минтақа сайёҳони хориҷӣ бештар ба хатсайрҳои кӯҳӣ таваҷҷуҳ менамоянд. Барои ин гурӯҳҳо дар мавзеъҳои машҳур – Ҳафткӯл ва Кӯли Калон пойгоҳҳои пазироии сайёҳон бо ҳама шароити созгор ташкил шуда, ҳоло бунёди нуқтаҳои қабули сайёҳон дар хатсайрҳои кӯҳӣ бомаром идома дорад. Бо дастгирии Кумита бо мақсади пешниҳоди хизматрасонии муносиб ва рақобати солим миёни субъектони хизматрасон ба 22 ширкат иҷозатномаи фаъолияти сайёҳӣ дода шудааст. Ҳамзамон 1 ташкилоти ҷамъиятӣ  бо номи «Шӯрои туризми Зарафшон»,               14 меҳмонхона (бо 493 кати хоб), 22 хонаи меҳмонқабулкунӣ дар шаҳру деҳот, пойгоҳи кӯҳнавардию сайёҳии Артуч, пойгоҳи сайёҳии «Марғзор», воқеъ дар соҳили шашум, кӯли «Марғзор»-и силсилакӯҳҳои Ҳафткӯл ба сайёҳони дохилию хориҷӣ хизмат мерасонанд.

Яке аз масъалаҳои муҳими рушди соҳаи сайёҳӣ таъмини мутахассисони болаёқат дар иншооти қабулу хизматрасонӣ маҳсуб меёбад.  Айни замон дар вилояти Суғд Донишгоҳи давлатии Хуҷанд ва Донишкадаи омӯзгории Тоҷикистон дар шаҳри Панҷакент мутахассисони соҳа омода месозанд.

Тақвияти  неруи инсонӣ, таъминоти кадрӣ ва шуғли пурмаҳсул дар соҳаи сайёҳӣ, ташкил ва гузаронидани курсҳои бозомўзии кадрҳои хизматрасон, таъмини ҳамоҳангсозии фаъолияти мақомоти давлатии соҳаи сайёҳӣ бо муассисаҳои таҳсилоти касбӣ ва бозори (меҳнати) сайёҳии мамлакат яке аз ҳадафҳои олии Стратегияи рушди сайёҳӣ дар Ҷумҳурии Тоҷикистон барои давраи то соли 2030 маҳсуб меёбад.

Тибқи барномаи ҳамоиш, оид ба муаррифии зарфияти сайёҳии минтақа раиси шаҳри Панҷакент, директори Институти таърих, бостоншиносӣ ва мардумшиносии Академияи миллии илмҳо, Котиби Комиссияи миллӣ оид ба корҳои ЮНЕСКО, Ректори Донишкадаи сайёҳӣ, соҳибкорӣ ва хизмат, директори МД Пойгоҳи таърихию фарҳангии Саразм маърӯза намуданд.

Дар охир аз кори ҳамоиш  натиҷагирӣ карда шуда, изҳорот қабул гардид. Сипас, меҳмонон ба маконҳои ҷолиби шаҳри Панҷакент рафта, бо имконоти қабулу хизматрасониҳои сайёҳии минтақа аз наздик шинос гардиданд.

Октябрь 6, 2020 11:03

Хабарҳои дигари ин бахш

Дар Душанбе ҷаласаи 18-уми Комиссияи байниҳукуматии Тоҷикистону Беларус доир шуд
Татбиқи лоиҳаҳои муштараки ҳукумати электронӣ ва таҳияи платформаҳои рақамӣ баррасӣ гардид
Ширкатҳои фаронсавӣ метавонанд дар рушди соҳаи сайёҳии Хатлон саҳм гузоранд
Намояндаи доимии Хазинаи байналмилалии асъор ба сиёсати зиддикоррупсионии Тоҷикистон баҳои мусбат дод
Дар Намоишгоҳи байналмилалии сайёҳии Душанбе беш аз 200 ширкати хизматрасони соҳа иштирок дорад
Дар Тоҷикистон 3 миллион сар гӯсфанди зоти ҳисорӣ парвариш меёбад
Вазири кишоварзии Тоҷикистон Раиси Шурои байниҳукуматӣ оид ба масъалаҳои комплекси агросаноатии ИДМ барои солҳои 2025-2026 интихоб гардид
Бунёди ҷаҳонии AIM барои татбиқи лоиҳаҳо дар самти энергияи барқароршавандаи Тоҷикистон изҳори омодагӣ намуд
Дар Тоҷикистон саршумори ҳайвоноти нодир афзоиш ёфтааст
Вазири сайёҳии Монтенегро бо пойгоҳи омодасозии кадрҳои соҳаи сайёҳии Донишгоҳи байналмилалии сайёҳӣ ва соҳибкории Тоҷикистон шинос шуд
Намоишгоҳи байналмилалии сайёҳии Душанбе-2025 оғоз гардид
Ҷаласаи 37-уми Шурои байниҳукуматӣ оид ба масъалаҳои комплекси агросаноатии ИДМ оғоз гардид