Тоҷикистон ҳафт соли оянда таҳти роҳбарии Президенти ҷумҳурӣ Эмомалӣ Раҳмон ба дастовардҳои назаррас ноил хоҳад гардид

ДУШАНБЕ, 30.10.2020 /АМИТ «Ховар»/. Савгандёдкунии Президенти тозаинтихоби Ҷумҳурии Тоҷикистон муҳтарам Эмомалӣ Раҳмон бозгӯи он аст, ки зарфи 7 соли оянда ҷомеаи Тоҷикистон таҳти роҳбарии  Пешвои миллат дар роҳи расидан ба дастовардҳои бузурги сиёсию иқтисодӣ ва иҷтимоию фарҳангӣ муваффақ мегардад. Чунин гуфт дар суҳбат бо хабарнигори АМИТ «Ховар» вакили Маҷлиси намояндагони Маҷлиси Олии Ҷумҳурии Тоҷикистон Абдуҳалим Ғаффорзода баъд аз маросими савгандёдкунии Президенти Ҷумҳурии Тоҷикистон муҳтарам Эмомалӣ Раҳмон, ки имрӯз ба таври бошукӯҳ дар «Кохи Сомон»-и шаҳри Душанбе   баргузор гардид.

Вакили палатаи поёнии Парлумони Тоҷикистон афзуд, ки дар ҳафт соли минбаъда 123 миллиард сомонӣ аз ҳисоби ҳамаи сарчашмаҳо маблағгузорӣ гардидани соҳаҳои илму маориф,  тандурустӣ ва ҳифзи иҷтимоӣ далели он аст, ки Ҳукумати мамлакат  таҳти роҳбарии Президенти Ҷумҳурии Тоҷикистон муҳтарам Эмомалӣ Раҳмон ба рушду тавсеаи соҳаҳои афзалиятноки ҷомеа – илму маориф, тандурустӣ ва ҳифзи иҷтимоӣ аҳамияти аввалиндараҷа медиҳанд, зеро рушди соҳаҳои зикргардида ба беҳдошти вазъи иҷтимоӣ, баланд бардоштани сатҳу сифати хизматрасонӣ ва пешрафту шукуфоии Тоҷикистон мусоидат менамояд.