Мусобиқаи футболи хурд барои дарёфти «Ҷоми Вазири корҳои дохилӣ-2020» идома дорад

ДУШАНБЕ, 14.11.2020 /АМИТ «Ховар»/. Дар доираи мусобиқаи кушоди шахсӣ-даставӣ байни кормандони мақомоти ҳифзи ҳуқуқ, сохторҳои қудратӣ ва корхонаю идораҳои ҷумҳурӣ барои дарёфти «Ҷоми Вазири корҳои дохилӣ-2020» зери шиори «Милитсия – ҳомии ҷомеа!» мусобиқаҳои футболи хурд байни ҷавонон ва собиқадорон давом доранд. Дар ин бора АМИТ «Ховар» бо истинод ба маркази матбуоти Вазорати корҳои дохилии Ҷумҳурии Тоҷикистон хабар медиҳад.

Мусобиқаҳо аз 4 ноябри соли 2020 оғоз ёфта, то 4 декабр идома меёбанд. Макони баргузорӣ толори Маҷмааи варзишии Шӯрои ҷумҳуриявии «Динамо»-и Вазорати корҳои дохилӣ мебошад.

Дар мусобиқаи байни футболбозони ҷавон 25 даста ҷамъ омада, онҳо дар 4 гурӯҳ бо ҳам рақобат доранд. Дар байни собиқадорон 12 даста дар 2 гурӯҳ бозӣ мекунанд.

9 ноябр бозиҳои байни дастаҳои «Динамо-1»-и ВКД ва «Барқи Тоҷик» бо ҳисоби 10:2 ба фоидаи динамочиён анҷом ёфт. Дар бозии собиқадорон низ дастаи «Динамо» дастаи «Зуҳур»-ро бо ҳисоби 4:1 мағлуб сохт. Ҳамчунин дар бозии байни дастаи Ҳукумати шаҳри Душанбе ва Донишгоҳи тиббии Тоҷикистон бозингарони Ҳукумати шаҳр бо ҳисоби 8:4 ғолиб омаданд.

АКС аз ВКД ҶТ