Ба ғамхории давлат бо амали нек саҳмгузор бошем. Ва ё талқини фарҳанги истифодаи босамари неруи барқ дар вилояти Суғд

ДУШАНБЕ, 19.12.2020. /АМИТ «Ховар»/. Гурӯҳҳои ташаббускор, иборат аз аъзои Ташкилоти ҷамъиятии ҷавонон “Созандагони Ватан”, шуъбаи кор бо ҷавонон ва занон, Кумиҷроияи шаҳрии ҲХДТ  ва Маркази ташаккули тарзи ҳаёти солими вилояти Суғд  корҳои тарғиботу ташвиқотро ин дафъа дар майдони Регистони бозори марказии вилоят- “Панҷшанбе” вобаста ба пешгирии бемории сироятии КОВИД -19 ва талқини фарҳанги истифодаи босамари неруи барқ гузарониданд. Дар ин бора аз КИ ҲХДТ дар шаҳри Хуҷанд ба АМИТ “Ховар” хабар доданд.

Зимни вохӯрӣ зикр  гардид, ки агар ҳамагон неруи барқро сарфакорона истифода баранд, кафолати ба пуррагӣ гирифтани барқ таъмин карда мешавад. Зеро захираи оби барқистеҳсолмешуда дар Неругоҳи барқи обии “Норак” то мавсими гармо дар сурате басандагӣ мекунад, ки мо онро сарфакорона истифода барем.

Инчунин бо харидорону фурӯшандаҳо корҳои фаҳмондадиҳӣ гузаронида шуда, ба онҳо зарурати пӯшидани ниқобҳои ҳимоявӣ гуфта шуд. Таъкид гардид, ки мубориза бо ин бемории ҳамагир дар кишварҳои пешрафта мушкилии рақами як маҳсуб шуда, теъдоди сироятёфтагон ба ҷои коҳишёбӣ рӯз то рӯз зиёд гардида истодааст.

-Дар Ҷумҳурии Тоҷикистон бо таваҷҷуҳи рӯзафзуни давлат ва Ҳукумати мамлакат, садоқатмандӣ ва вафопешагии пизишкон  хатари сироятёбӣ коҳиш ёфтааст, аммо ангезаи сироятёбӣ ҳанӯз ҳам ҷо  дорад. Аз ин хотир риояи талаботи санитарию гигиенӣ ба манфиати кор аст,-зикр шуд зимни ҳамоиш.