Дар Тоҷикистон наздики 2 миллион тонна ангишт истихроҷ шуд

ДУШАНБЕ, 24.12.2020 /АМИТ «Ховар»/. Ҳаҷми истихроҷи ангишт дар Тоҷикистон аз аввали соли равон беш аз 1,9 миллион тоннаро ташкил дод, хабар медиҳад АИ «Авеста» бо истинод ба Вазорати саноат ва технологияҳои нави Ҷумҳурии Тоҷикистон.

Тибқи иттилои вазорат, дар мамлакат ангиштсанг ва ангишти бӯр истихроҷ карда мешавад. Дар ҷумҳурӣ беш аз ҳама, ангиштсанг истеҳсол карда мешавад, ки ҳаҷми истеҳсоли он дар моҳҳои январ-ноябри соли равон беш аз 1,8 миллион тоннаро ташкил дод.

Ёдовар мешавем, ки ҳаҷми истихроҷи ангишт дар ҷумҳурӣ дар охири соли 2019 беш аз 2 миллион тонна (нисбат ба соли 2000 сад маротиба зиёдтар!) ва дар соли 2017 бошад, тақрибан 1,7 миллион тоннаро ташкил дод.

Қаблан хабар дода шуда буд, ки дар мамлакат 12 ширкати ватанию хориҷӣ ба истихроҷ ва истеҳсоли ангишт машғуланд.

Тибқи иттилои манбаъ, ҳоло дар ҷумҳурӣ беш аз 200 корхона ангиштро ҳамчун сӯзишворӣ истифода мебаранд.

АКС аз бойгонӣ