Даври ниҳоии Озмуни ҷумҳуриявии «Фурӯғи субҳи доноӣ китоб аст» дар пойтахт ҷараён дорад
ДУШАНБЕ, 11.12.2020 /АМИТ «Ховар»/. Рӯзи панҷум аст, ки дар Китобхонаи миллии Тоҷикистон даври ниҳоии Озмуни ҷумҳуриявии «Фурӯғи субҳи доноӣ китоб аст» ҷараён дорад. Даври ниҳоии озмуни мазкур 7 декабр шурӯъ гардида, то 15 декабри соли равон идома меёбад. Ба ин даври озмун 267 нафар довталаб аз вилоятҳои Бадахшон, Суғд, Хатлон ва ноҳияҳои тобеъи ҷумҳурӣ ва шаҳри Душанбе роҳхат гирифтааанд.
Тавре хабарнигори АМИТ «Ховар» хабар медиҳад, бо мақсади шаффоф баргузор шудани озмун масъулони он барои волидон ва иштирокдорон дар макони баргузории ҳар як номинатсия мониторҳо гузоштаанд, ки ҷараёни он пурра мустақиман пахш ва аз ҷониби тамошобинон назорат карда мешавад.
То ин замон доварон аз рӯи 5 номинатсияи озмун бештар аз 160 довталабро аз вилоятҳои Бадахшон, Суғд ва Хатлон шуниданд.
Ба гуфтаи масъули озмун Фирдавс Аминов, дар номинатсияи “Хондан ва аз ёд кардани осори адибони классикии тоҷик” то имрӯз 43 нафарро шунидаанд, ки аз он 2 нафар аз вилояти Бадахшон, 15 нафар аз вилояти Суғд ва 26 нафар аз вилояти Хатлон будаанд. Бояд гуфт, ки ба номинатсияи мазкур 67 нафар довталаб роҳхат гирифтааст.
Дар номинатсияи “Хондан ва аз ёд кардани осори адибони муосири тоҷик” то ин замон аъзои ҳакамон ба маҳорату дониши 34 нафар — 2 нафар аз вилояти Бадахшон, 13 нафар аз вилояти Суғд ва 19 нафар аз вилояти Хатлон баҳо додаанд. Дар номинатсияи мазкур 62 нафар роҳхат гирифтааст.
Дар номинатсияи “Хондан ва аз ёд кардани ашъори бачагона ва афсонаҳои халқи тоҷик” то нимаи аввали имрӯз ҳайати ҳакамон 39 нафар — 3 нафар аз вилояти Бадахшон, 17 нафар аз вилояти Суғд ва 19 нафар аз вилояти Хатлонро шунидаанд. Ба ин номинатсия 54 нафар роҳхат гирифтааст.
Дар номинатсияи “Хондан ва аз ёд кардани осори адабиёти ҷаҳон” доварон 35 нафарро аз тамоми ҷумҳурӣ шунидаанд, ки шумораи умумии иштирокдорони ин номинатсия 61 нафар мебошанд.
Дар номинатсияи «Шоирӣ» то ин дам 12 нафар довталабӣ намудааст, ки шумораи умумии онҳо 23 нафарро ташкил медиҳад.
Бояд гуфт дар озмун довталабон аз рӯи номинатсияҳои интихоб кардаашон рӯйхати асарҳои хондаашонро ба ҳакамон пешниҳод мекунанд. 7 нафар аъзои ҳакамон аз ҳамон рӯйхати пешниҳодшуда бо довталабон суолу ҷавоб мекунанд. Тавре аъзои ҳакамон иброз медоранд, омодагӣ нисбат ба соли пешин хеле хуб мушоҳида мегардад, вале ҳанӯз ҳам камбудиҳо дар пешниҳоди рӯйхати асарҳо ба назар мерасад, ки аз надонистани Низомномаи озмун дарак медиҳад.
Бояд зикр намуд, ки Озмуни ҷумҳуриявии «Фурӯғи субҳи доноӣ китоб аст» бо Амри Президенти мамлакат соли дуюм аст, ки ба муносибати 30-солагии ҷашни Истиқлолияти давлатии Ҷумҳурии Тоҷикистон доир мешавад.
Абдураҳими АБДУҚАҲҲОР,
АМИТ «Ховар»
Пешвои миллат Эмомалӣ Раҳмон: «24 ёдгории таърихию фарҳангии Тоҷикистон ба Феҳристи мероси моддии ҷаҳонии ЮНЕСКО сабт гардидааст»
Президенти Тоҷикистон: «Мо барои арҷгузорӣ ба арзишҳои асили тамаддуни тоҷикону форсизабонон иқдомоти муассирро амалӣ намудем»
ШЕЪР ВА ИСТИҚЛОЛ. Назми муосири тоҷик дар солҳои соҳибистиқлолии Тоҷикистон дар сафи пеши худшиносии миллӣ ва ҳаракати ваҳдати миллӣ қарор гирифт
Кормандони соҳаи фарҳанг бо мукофотҳои давлатӣ сарфароз гардиданд
Се китоби рӯзномаи «Ҷумҳурият»: «Эмомалӣ Раҳмон ва эҳёи тамаддуни ориёӣ», «Бозгашти қаҳрамон» ва «Бозгашти қаҳрамон 2» муаррифӣ гардид
Конференсияи ҷумҳуриявии «Забон рукни муҳимми Истиқлоли давлатӣ ва ҳамбастагии ҷомеа» баргузор гардид
Дар Озмуни байналмилалии «Санъати китоб» «Шоҳнома»-и Абулқосим Фирдавсӣ сазовори Шоҳҷоиза гардид
35 СОЛИ СОҲИБИСТИҚЛОЛӢ. Дар Тоҷикистон соли 1991 танҳо 15 театр фаъолият мекард
«Эмомалӣ Раҳмон — муаррифгари таърихи ниёгон ва тамаддуни навини тоҷикон». Таҳти ин унвон китоб ба нашр расид
Дар шаҳри Душанбе маҳфили «Шоҳномахонӣ» баргузор шуд
«ТОҶИ СОМОН». Қабули филмҳо барои иштирок дар синамоҷашнвораи миллӣ то 15 сентябр идома меёбад
«МОДАРНОМА». Дар Осорхонаи миллӣ намоиши асарҳои Рассоми халқии Тоҷикистон Сабзаалӣ Шариф ифтитоҳ ёфт
