«ХАЙРХОҲӢ ШАРАФ АСТ-ВОЛОНТЁР МЕШАВЕМ!». 5 декабр — Рӯзи байналмилалии волонтёрон

Декабрь 5, 2020 09:47

ДУШАНБЕ, 05.12.2020 /АМИТ «Ховар»/. 5 декабр ҳамасола дар ҷаҳон Рӯзи байналмилалии волонтёрон — ихтиёриён таҷлил мешавад. Имрӯз бахшида ба  ин сана  дар шаҳри Душанбе таҳти унвони «Хайрхоҳӣ шараф аст-волонтёр мешавем!» барномаҳои маърифатӣ-фарҳангӣ ва  аксияву ҳамоишҳои гуногун  баргузор шуда, ихтиёриёни фаъол қадрдонӣ  мегарданд.

 Дар Ҷумҳурии Тоҷикистон, ки  узви Созмони Милали Муттаҳид аст, дар ин самт аз тарафи давлату ҳукумат тадбирҳои зарурӣ андешида мешаванд. Ин аст, ки соли  2013 Қонуни Ҷумҳурии Тоҷикистон «Дар бораи фаъолияти волонтёрӣ» қабул гардида, бо Қарори Ҳукумати Ҷумҳурии Тоҷикистон аз 5 марти соли 2014 Кумитаи кор бо ҷавонон ва варзиши назди Ҳукумати Ҷумҳурии Тоҷикистон  ҳамчун мақомоти ваколатдори давлатӣ дар соҳаи фаъолияти волонтёрӣ муайян гардид.

Мавриди зикр аст, ки  дар интихоботи навбатии Президенти Ҷумҳурии Тоҷикистон, ки 11 октябри соли 2020 баргузор гардид,  10 ҳазор нафар волонтёрон дар тамоми шаҳру навоҳии мамлакат барои расонидани хизмат дар маъракаи муҳими сиёсӣ  ҷалб карда шудаанд ва аз ин теъдод танҳо 250 нафар волонтёроне, ки донандаи хуби забонҳои тоҷикӣ, русӣ ва англисӣ мебошанд, барои мушоҳидони байналмилалӣ  ҳамчун роҳбалад хизмат намуданд.

Тавре зимни суҳбат сардори Раёсати кор бо ҷавонон ва варзиши шаҳри Душанбе Шоҳзод Раҳимзода ба хабарнигори АМИТ «Ховар» иброз дошт,  волонтёр шахсе мебошад, ки ба таври ихтиёрӣ бе музд барои рушди ҷомеа ба мардум хизмат мекунад. Тавассути пайваст шудан ба фаъолияти волонтёрӣ касбияти волонтёр аз лиҳози инсонӣ, ватандӯстӣ, худогоҳӣ, хештаншиносӣ ва аз ҳама муҳим, эҳтиром ба калонсолон зиёд мегардад. Вақте ки шахс ба фаъолияти волонтёрӣ мепайвандад, пеш аз ҳама, дар замираш дарки масъулият пайдо мешавад. Ин гуна шахсон мехоҳанд ба одамон кумак расонида, ҷомеаро ба пеш баранд ва  худро узви хуби ҷомеа эҳсос кунанд.

«Ҳоло дар Ҷумҳурии Тоҷикистон низоми хайрхоҳӣ бисёр фаъол буда, ихтиёриён дар тамоми самтҳои ҷомеа саҳми арзишманд мегузоранд. Хусусан дар шаҳри Душанбе рушду ҳаракати волонтёрӣ яке аз самтҳои афзалиятноки сиёсати давлатии кор бо ҷавонон ва варзиш ҳисобида мешавад. Ин низом зери таваҷҷуҳи хоссаи Раиси шаҳри Душанбе муҳтарам Рустами Эмомалӣ қарор дорад. Саҳми волонтёрон имрӯз дар ташкил ва баргузор намудани чорабиниҳои гуногуни сатҳи баланд, аз ҷумла интихоботи вакилони Маҷлиси намояндагони Маҷлиси Олии Ҷумҳурии Тоҷикистон ва интихоботи Президенти Ҷумҳурии Тоҷикистон ниҳоят назаррас аст», — гуфт сардори Раёсати кор бо ҷавонон ва варзиши пойтахт.

Имрӯз дар шаҳри Душанбе беш аз 2 ҳазор нафар волонтёр буда,  дар Раёсати кор бо ҷавонон ва варзиши шаҳр беш аз 250 нафар ихтиёриёни фаъолу ташаббускоре, ки ҳамарӯза саҳми арзишманди хешро дар пешрафти ҷомеа мегузоранд, хизмат мерасонанд. Имрӯз мафҳуми волонтёрӣ ва муҳим будани хизмати онҳо дар ҷомеа аллакай дарк гардидааст. Ҳамарӯза ҷавонони зиёд муроҷиат намуда, хоҳиш  доранд, ки дар ин мактаб тарбия ёфта, ба камол расанд, то вақту дониш ва имконияти  худро  ба фоидаи ҷомеа сарф намоянд.

Мутахассиси Раёсати кор бо ҷавонон ва варзиши шаҳри Душанбе Осим Муродзода, ки аз соли 2016 ба фаъолияти волонтёрӣ пардохта буд, иброз медорад, ки  тайи чанд сол дар соҳаи кор бо ҷавонон ва варзиш ба ҳайси волонтёр фаъолият кардааст ва маҳз ҳамин фаъолият буд, ки  ӯ кору пайкор, низоми хизмати давлатӣ, инкишофи нутқ ва гузаронидани чорабиниҳои сатҳи ҷумҳуриро омӯхт.

«Дар кӯдакиам орзуи хизматчии давлатӣ шудан доштам. Аз ин рӯ ҳамеша аз пайи амалӣ гаштани ин орзу будам. Вақте ба мактаби олӣ дохил шудам, ба гӯшам овозаи фаъолияти волонтёрӣ дар Кумитаи кор бо ҷавонон ва варзиши назди Ҳукумати Ҷумҳурии Тоҷикистон расид, ки аз ҷавонони худогоҳу худшинос ва масъулиятшиносу ватандӯст иборат аст. Ҳамон замон қарор додам, ки ман ҳам ба ин гурӯҳ мепайвандам. Зимни фаъолияти чандинсолаам бо дастгирии роҳбарони Кумита ба як ҷавони худогоҳу худшинос табдил ёфтам. Имрӯз бо такя ба фаъолияти волонтёрӣ дар мақомоти пойтахт  ба ҳайси хизматчии давлатӣ фаъолият дорам. Инҷо мехоҳам аз ҷавонони мамлакат даъват ба амал орам, ки  ба ин фаъолияти ҷамъиятӣ машғул шаванд ва ҳаматарафа инкишоф ёбанд. Зеро ман худро  тавассути ин фаъолият дар ҷомеа шинохтам ва мавқеи худро дар он пайдо намудам. Волонтёрӣ ва хизмат ба халқу Ватан барои ман ва даҳҳо чунин ҷавонони худогоҳу ватандӯст шараф аст»,- гуфт Осим Муродзода.

Ёдовар мешавем, ки Рӯзи байналмилалии волонтёрон соли  1985  аз тарафи  Ассамблеяи генералии Созмони Милали Муттаҳид пешниҳод шуда, аз ҳамон сол инҷониб он ҳамчун иди расмӣ мақоми байналмилалӣ касб кардааст.

Волонтёр калимаи франсавӣ буда, маънои  мададгории ихтиёриро дорад. Волонтёр  шахсе мебошад, ки ба манфиати  Ватан ва мардуми худ ройгон, бидуни миннат   кумак намуда, барои хизмати кардааш подош талаб намекунад.

Холисаи АСОМИДДИН,
АМИТ «Ховар»

Декабрь 5, 2020 09:47

Хабарҳои дигари ин бахш

Президенти Тоҷикистон: «Ҷашни Наврӯз ва истиқлолу озодӣ – ин ду мафҳуми барои ҳар яки мо азизу муқаддас аст»
«КАЪБА ЧӢ МЕРАВӢ, ДИЛЕРО ДАРЁБ…». Андешаҳо дар ҳошияи мулоқоти Президенти Тоҷикистон бо фаъолону намояндагони ҷомеа ва ходимони дин
Пешвои миллат: «Боиси ифтихор аст, ки Наврӯз – калимаи асили тоҷикӣ, яъне «рӯзи нав» ҳоло барои миллионҳо аҳолии сайёра ҳамчун рӯзи ҷашни фархунда вирди забон аст»
Эмомалӣ Раҳмон: «Наврӯз аз ҷумлаи бузургтарин ва маҳбубтарин ҷашнҳои тоҷикон мебошад»
СИЁСИШАВИИ ДИН — ХАТАР БА ФАРҲАНГИ МИЛЛӢ ВА СУБОТИ ҶОМЕА. Андешаҳои профессор Нозим Маҳмадизода дар ин мавзуъ
Президенти Тоҷикистон: «Бо назардошти шароити замона анъанаи неки гузаштагон – сарфаю сариштакориро бояд риоя намоем»
Сулаймон Талбакзода: «Дарси хештаншиносӣ ва хизмат ба халқу Ватанро аз Пешвои миллат бояд омӯзем»
Президенти Тоҷикистон: «Мушкилоти таъмини аҳолии сайёра бо озуқаворӣ моро водор менамояд, ки ҳар қитъа заминро оқилонаву самаранок истифода барем»
Пешвои миллат Эмомалӣ Раҳмон: «Ойинҳои наврӯзӣ аҳли башарро ба таҳаммулгароӣ, бунёдкориву созандагӣ ҳидоят менамоянд»
Пешвои миллат: «Дар шароити кунунӣ зарур аст, ки ба кишти такрорӣ, гирифтани се – чор ҳосил аз заминҳои обӣ эътибори аввалиндараҷа дода шавад»
Наврӯз дар баробари забони тоҷикӣ бунёди худшиносии тоҷиконро низ ташаккул додааст
Пешвои миллат Эмомалӣ Раҳмон: «Мақому ҷойгоҳи Наврӯз он қадар баланд буд, ки ҳеҷ монеа ва қуввае онро натавонист аз байн барад»