ҶОНВАРОНРО АЗ САРДӢ МУҲОФИЗАТ МЕКУНЕМ! Бо ин мақсад дар мавзеи Чиларча наздики се тонна дон ва хошок пошида шуд

ДУШАНБЕ, 23.12.2020/АМИТ «Ховар»/. Дар мавзеи Чиларчаи ҷамоати деҳоти Саразми шаҳри Панҷакент корҳои биотехникӣ гузаронида шуд.

Ин тадбир бо мақсади нигоҳдорӣ ва бехатарии гуногунии биологӣ, беталаф баровардани олами ҳайвоноти ваҳшӣ ва паррандаҳо аз фасли зимистон андешида шудааст. Дар ин росто,  аз ҷониби  кормандони шуъбаи назорати давлатии истифода ва ҳифзи олами набототу ҳайвонот ва захираҳои моҳии Раёсати ҳифзи муҳити зисти вилояти Суғд ва бахши ҳифзи муҳити зисти шаҳри Панҷакент дар мавзеи Чиларча 550 кг гандум, 500 кг ҷав, 350 кг биринҷреза, 150 адад бастаи хошок, 30 адад бастаи коҳ, 35 адад бастаи беда, 370 кг резаи гандум, 750 кг сабус, 200 кг намак ва 50 кг  сангнамак пошида шуд.

Тибқи иттилои  Кумитаи ҳифзи муҳити зисти назди Ҳукумати ҷумҳурӣ, дар мавзеъҳои мазкур ҳайвонот, ба монанди хуки ёбоӣ, гург, хирс, бабри барфӣ, харгӯш кабк ва дигар намуди парандаҳои ваҳшӣ сукунат доранд.

Гузаронидани корҳои биотехникӣ дар ҳолати сард омадани ҳаво дар мавзеъҳои дигари баландкӯҳи Панҷакент низ дар назар дошта шудааст.