Ровии як телевизиони хусусӣ дар ҳамлаи силоҳбадастон дар Нангарҳор ҷон бохт

ДУШАНБЕ, 10.12.2020 /АМИТ «Ховар»/. Сухангӯйи волии Нангарҳор иттилоъ додааст, ки Малолай Майванд ҳангоме ҳадафи тир қарор гирифт, ки ба сӯи дафтари кориаш мерафт, хабар медиҳад АМИТ «Ховар» бо истинод ба сомонаи шабакаи телевизионии tolonews.com.

Оятуллоҳ Хугиёнӣ, сухангӯи волии Нангарҳор, имрӯз (10 декабр) изҳор намуд, ки Малолай Майванд, сухангӯи шабакаи хусусии радио ва телевизиони ин вилоят, дар як ҳамлаи мусаллаҳона дар Ҷалолобод бо ронандааш кушта шудааст.

Хугиёнӣ илова намуд, ки ин ҳодиса тақрибан соати 7:10 субҳи имрӯз дар минтақаи «Гулоии Арабон»-и ноҳияи сеюми Ҷалолобод, вақте ки Малолай Майванд ба сӯи дафтари кориаш равон буд, рух додааст.

Ҳеҷ гурӯҳе, аз ҷумла «Толибон», масъулияти ин ҳамларо бар дӯш нагирифтааст.

Ин саввумин рӯзноманигори кушташуда дар кишвар дар як моҳи охир аст.