БОРИ АВВАЛ ДАР ТОҶИКИСТОН! Шаби Соли нав дар ноҳияи Қубодиён мӯъҷизаи воқеӣ рух дод: зане панҷгоник таваллуд кард

Январь 1, 2021 21:05

ДУШАНБЕ, 01.01.2021 /АМИТ «Ховар»/. Дар Тоҷикистон шаби Соли нав, 31 декабри соли 2020, сокини деҳаи Бобоҷон Ғафурови ноҳияи Қубодиёни вилояти Хатлон Дилноза Мамадова панҷгоник таваллуд кард. Дар ин бора ба АМИТ «Ховар» аз Пажӯҳишгоҳи тадқиқотии акушерӣ, гинекология ва перинатологияи Тоҷикистон хабар дода, зикр намуданд, ки дар мамлакати мо ин ҳолат бори аввал аст: дар гузашта ҳолатҳои таваллуди дугоникҳо, сегоникҳо ва чоргоникҳо ба қайд гирифта шуда буданд.

Дилноза Мамадоваи 30-сола, ки аллакай ду фарзанд дошт, интизори фарзанди сеюм буд, аммо якбора панҷ фарзанд — ду писар ва се духтар ба дунё овард. Таваллуди ин зан дар Таваллудхонаи ҷумҳуриявӣ дар шаҳри Душанбе сурат гирифт. Ба гуфтаи табибони ин таваллудхона, вазъи тифлони навзод қаноатбахш буда, онҳо таҳти назорат қарор доранд. Модари ин фарзандони панҷгона ду моҳ таҳти назорати табибон буд ва 20 рӯзи охир таваллудхона қарор дошт.

Барои таъмини  бехатарии  таваллуди Д.Мамадова амалиёти ҷарроҳӣ гузаронида шуд. Бо дастгирии Вазири тандурустӣ ва ҳифзи иҷтимоии аҳолии Тоҷикистон Ҷамолиддин Абдуллозода табибон тамоми хароҷоти ин хонаводаро бар дӯш гирифтанд. Тӯли бист рӯзе, ки ин зан дар беморхона буд, бо се маротиба хӯроки гарм ва доруҳои лозима таъмин шуда буд. «Мо тамоми чораҳоро меандешем, то ки кӯдакони таваллудшуда солим ба хонаашон фиристонда шаванд», — гуфтанд табибон.

Дар робита ба ин, муовини Вазири тандурустӣ ва ҳифзи иҷтимоии аҳолии Тоҷикистон Зулфия Абдусаматзода ба таваллудхона ташриф оварда, бо вазъи саломатии зан ва фарзандони ӯ шинос шуд. Ӯ ба модари панҷ фарзанд тӯҳфаи хотирмони солинавӣ тақдим кард.

Тавре АМИТ “Ховар” қаблан хабар дода буд, моҳи декабри соли 2020 дар Душанбе чоргоникҳо таваллуд шуда буданд: зане дар таваллудхонаи рақами 3-и пойтахт ду писар ва ду духтар  ба дунё овард.

Сатҳи таваллуд дар Тоҷикистон хеле баланд аст. Тоҷикистон дар байни кишварҳои пасошӯравӣ аз рӯи афзоиши аҳолӣ дар ҷои аввал  меистад. Тибқи омори расмӣ, аҳолии Тоҷикистон солона ба ҳисоби миёна 2,2 фоиз ё 200 ҳазор нафар меафзояд.  Аз рӯи  маълумоти расмӣ, аҳолии Тоҷикистон дар соли 2020 аз 9,3 миллион нафар гузашт.

Мавриди зикр аст, ки дар ҷаҳон таваллуди ҳатто дугоникҳо  маъмулан ҳодисаи нодир ба ҳисоб меравад. Олимон якбора таваллуд шудани панҷ тифлро мӯъҷиза меҳисобанд. Мутахассисон муътақид бар онанд, ки панҷгонаи «табиӣ» ба ҳисоби миёна дар 480 сол як бор ба вуқуъ меояд ва имкони чунин ҳомиладорӣ аз 47 миллион нафар ба 1 нафар рост меояд.

АКС аз бойгонӣ 

Январь 1, 2021 21:05

Хабарҳои дигари ин бахш

Президенти Тоҷикистон: «Ҷашни Наврӯз ва истиқлолу озодӣ – ин ду мафҳуми барои ҳар яки мо азизу муқаддас аст»
«КАЪБА ЧӢ МЕРАВӢ, ДИЛЕРО ДАРЁБ…». Андешаҳо дар ҳошияи мулоқоти Президенти Тоҷикистон бо фаъолону намояндагони ҷомеа ва ходимони дин
Пешвои миллат: «Боиси ифтихор аст, ки Наврӯз – калимаи асили тоҷикӣ, яъне «рӯзи нав» ҳоло барои миллионҳо аҳолии сайёра ҳамчун рӯзи ҷашни фархунда вирди забон аст»
Эмомалӣ Раҳмон: «Наврӯз аз ҷумлаи бузургтарин ва маҳбубтарин ҷашнҳои тоҷикон мебошад»
СИЁСИШАВИИ ДИН — ХАТАР БА ФАРҲАНГИ МИЛЛӢ ВА СУБОТИ ҶОМЕА. Андешаҳои профессор Нозим Маҳмадизода дар ин мавзуъ
Президенти Тоҷикистон: «Бо назардошти шароити замона анъанаи неки гузаштагон – сарфаю сариштакориро бояд риоя намоем»
Сулаймон Талбакзода: «Дарси хештаншиносӣ ва хизмат ба халқу Ватанро аз Пешвои миллат бояд омӯзем»
Президенти Тоҷикистон: «Мушкилоти таъмини аҳолии сайёра бо озуқаворӣ моро водор менамояд, ки ҳар қитъа заминро оқилонаву самаранок истифода барем»
Пешвои миллат Эмомалӣ Раҳмон: «Ойинҳои наврӯзӣ аҳли башарро ба таҳаммулгароӣ, бунёдкориву созандагӣ ҳидоят менамоянд»
Пешвои миллат: «Дар шароити кунунӣ зарур аст, ки ба кишти такрорӣ, гирифтани се – чор ҳосил аз заминҳои обӣ эътибори аввалиндараҷа дода шавад»
Наврӯз дар баробари забони тоҷикӣ бунёди худшиносии тоҷиконро низ ташаккул додааст
Пешвои миллат Эмомалӣ Раҳмон: «Мақому ҷойгоҳи Наврӯз он қадар баланд буд, ки ҳеҷ монеа ва қуввае онро натавонист аз байн барад»