Дар минтақаи кӯҳии «Селбурсой»-и Шаҳринав барои ҷонварон дон ва хошок пошида шуд

ДУШАНБЕ, 11.01.2021 /АМИТ «Ховар»/. Дар минтақаи кӯҳии  «Селбурсой»-и ноҳияи Шаҳринав, ки мавзеи сукунати ҷонварон мебошад,  1 тонна дон ва хошок, аз ҷумла 100 кг гандум, 100 кг резаи гандум, 100 кг ҷав, 100 кг майдаи биринҷ ва хошок ба миқдори 500 кг пошида шуд.

Тавре аз шуъбаи ҳифзи муҳити зисти ноҳияи Шаҳринав ба АМИТ «Ховар» хабар доданд, бо мақсади ҳифзи олами парандагон ва ҳайвоноти кӯҳӣ дар мавсими зимистон дар минтақаҳои кӯҳии ноҳияи Шаҳринав  аз ҷониби кормандони ин шуъба корҳои биотехникӣ гузаронида шуданд.

Шуъбаи ҳифзи муҳити зисти ноҳияи Шаҳринав тасмим гирифтааст, ки дар оянда барои аз сардиҳо беталаф баровардани  парандагон ва ҳайвоноти кӯҳӣ корҳои биотехникиро дар дигар минтақаҳои кӯҳӣ идома диҳад.