Дастаи мунтахаби наврасони Тоҷикистон дар Мусобиқаи байналмилалии «Ҷоми рушд-2021» иштирок мекунад

ДУШАНБЕ, 21.01.2021 /АМИТ «Ховар»/. Дастаи мунтахаби наврасони Тоҷикистон (U-17) бо роҳбарии сармураббӣ Аҳлиддин Турдиев дар 17-умин Мусобиқаи байналмилалии «Ҷоми рушд-2021», ки аз 31 январ то 6 феврал дар пойтахти Беларус – шаҳри Минск доир мегардад, иштирок мекунад.

Тавре аз Кумитаи миллии олимпии Тоҷикистон ба АМИТ «Ховар» иттилоъ доданд, дастаи мунтахаби наврасони Тоҷикистон оид ба футбол (U-17) дар Мусобиқаи байналмилалии «Ҷоми рушд-2021» бо дастаҳои мунтахаби наврасони Беларус, Қазоқистон ва Молдова вомехӯрад.

Барои пирӯзӣ дар ин мусобиқа 4 дастаи мунтахаби наврасони соли таваллудашон на бештар аз 2004 талош мекунанд. Дар «Ҷоми рушд-2021» дар Минск футболбозони навраси тоҷик бо ҳамсолонашон аз Қазоқистон (31 январ), Молдова (3 феврал) ва Беларус (6 феврал) бозӣ хоҳанд кард.

Мусобиқаи анъанавии зимистона дар толори футболи Минск тибқи системаи даврӣ дар як давр баргузор мешавад. Ғолиб аз рӯи холҳои бадастоварда муайян мегардад.

Мусобиқаи байналмилалии «Ҷоми рушд-2021» дар Минск

1-ум давр
31 январ (якшанбе)
14:00. Қазоқистон – Тоҷикистон
17:30. Белорус – Молдова

2-юм давр
3 феврал (чоршанбе)
14:00. Тоҷикистон – Молдова
17:30. Белорус – Қазоқистон

3-юм давр
6 феврал (шанбе)
14:00. Молдова – Қазоқистон
17:30. Белорус – Тоҷикистон