Ҳабибулло Воҳидзода: Мақсади Агентӣ гирифтани пеши роҳи воридшавии маводи нашъадор ба Тоҷикистон аст

Февраль 4, 2021 11:15

ДУШАНБЕ, 04.02.2021 /АМИТ «Ховар»/. Мақсади Агентии назорати маводи нашъаовари назди Президенти Ҷумҳурии Тоҷикистон он аст, ки зимни гузаронидани амалиёти муштарак оид ба муайян кардани ҳодисаҳои ҷинояткорӣ пеши роҳи бо роҳи қочоқ ворид шудани маводи нашъадор ба Ҷумҳурии Тоҷикистон  гирифта шавад. Ҳоло Стратегияи миллии Ҷумҳурии Тоҷикистон  барои мубориза бо маводи нашъадор дар соли 2021-2030 аз ҷониби Агентии мо омода шуда, ба Ҳукумати мамлакат пешниҳод мегардад. Тамоми фаъолияти Агентӣ дар асоси ин Стратегия ба роҳ монда мешавад. Дар ин бора Директори  Агентии назорати маводи нашъаовари назди Президенти Ҷумҳурии Тоҷикистон, мушовири давлатии адлияи дараҷаи 3 Ҳабибулло Воҳидзода имрӯз зимни нишасти матбуотии ин ниҳод ибрози назар намуд.

Зимни нишаст зикр шуд, ки соли сипаришуда аз ҷониби Агентӣ 144 (с.2019-131) ҷинояти вобаста ба маводи нашъаовар ошкор гардид, ки нисбат ба соли гузашта 13 ҷиноят ё 9,9 фоиз зиёд мебошад. Аз инҳо 97 ҷиноят оид ба муомилоти ғайриқонунии воситаҳои нашъадор ё моддаҳои психотропӣ бо мақсади фурӯш, 1 ҷиноят оид ба фасодхона, 6 ҷиноят оид ба қочоқи маводи нашъадор буда, боқимондаро дигар ҷиноятҳои вобаста ба маводи нашъаовар ташкил медиҳанд.

Ба саволи хабарнигори АМИТ “Ховар” дар мавриди моҳи январи соли 2020 дастгир гардидани гурӯҳи муташаккили ҷиноятпешаи фаромиллӣ Ҳабибулло Воҳидзода посух дод, ки “дарвоқеъ,  аз ҷониби кормандони Раёсати оперативӣ-ҷустуҷӯӣ фаъолияти як гурӯҳи муташаккили ҷиноятпешаи фаромиллӣ ошкор ва фаъолияташ қатъ  гардида, аз муомилоти ғайриқонунӣ зиёда аз 44 кг маводи нашъаовар мусодира карда шуд. Ба ин гурӯҳ як  нафар шаҳрванди Афғонистон ва ду нафар шаҳрванди Тоҷикистон ҳамроҳ мебошанд”.

Сардори Раёсати оперативӣ-ҷустуҷӯии Агентии мазкур,  генерал-майор Ҳотамшо Маҷидзода ба ин саволи хабарнигори АМИТ “Ховар”  муфассалтар посух дода, зикр кард, ки “роҳбар ва аъзои гурӯҳи мазкур шаҳрванди Афғонистон Амири Аваз ва ду нафар шаҳрвандони Ҷумҳурии Тоҷикистон- Хусрав Назаров ва Эмомалӣ Тиллоев дар шаҳри Душанбе ду хонаи истиқоматиро иҷора гирифта, ба муомилоти ғайриқонунии маводи нашъаовар машғул будаанд. Нисбат ба номбурдагон парвандаи ҷиноятӣ оғоз гардида, онҳоро Суди ноҳияи Фирдавсӣ ба муҳлатҳои 15 ва 19 сол  аз озодӣ маҳрум намудааст. Як нафари дигар- Акбар Расулов айни замон дар кофтукови байналмилалӣ қарор дорад”,-зикр кард Ҳ. Маҷидзода.

Февраль 4, 2021 11:15

Хабарҳои дигари ин бахш

АМАЛИЁТИ «БАЧАҲО». Бо мақсади пешгирии ҳодисаҳои роҳу нақлиёт бо иштироки кӯдакону наврасон гузаронида мешавад
Сатҳи забондонии кормандони милитсияи Хатлон санҷида мешавад
Дар шаш моҳ дар Тоҷикистон 495 ҳолати машғул шудан ба ҷодугарӣ ва фолбинӣ ошкор карда шуд
«МАДАНИЯТИ ШАҲРДОРӢ». Дар Хатлон бо мақсади таҳким бахшидани ҳамкорӣ бо аҳолӣ амалиёт гузаронида шуд
Дар Душанбе татбиқи марҳилаи дуюми лоиҳаи «Шаҳри бехатар» баррасӣ гардид
Дар Хатлон масъалаҳои ҳифзи тартиботи ҷамъиятӣ баррасӣ карда шуданд
Дар Вазорати мудофиаи Тоҷикистон тарҳрезии либоси хизматчиёни ҳарбӣ дар шакли ягонаи миллӣ баррасӣ гардид
Сатҳи забондонии кормандони Вазорати корҳои дохилӣ санҷида мешавад
ДАСТОВАРДИ ДАВРОНИ СОҲИБИСТИҚЛОЛӢ. Ба таъсиси Кумитаи ҳолатҳои фавқулода ва мудофиаи граждании Тоҷикистон 31 сол пур шуд
Ҳамкорӣ дар самти пешгирии ҷинояткорӣ байни милитсияи Душанбе ва Тошканд тақвият меёбад
Дар Хоруғ машқи омодабошии мудофиаи ҳудудӣ ва захираҳои сафарбарӣ баргузор шуд
Дар роҳҳои Душанбе санҷишҳо гузаронида мешаванд