БОЗИҲОИ ЗИМИСТОНАИ ОЛИМПИИ ПЕКИН-2022: маълумоте, ки бояд донист

Февраль 7, 2021 09:05

ДУШАНБЕ, 07.02.2021 /АМИТ «Ховар»/. То Бозиҳои зимистонаи олимпии соли 2022 дар Пекин як сол боқӣ монд ва таваҷҷуҳи варзишгарон ва мухлисони намудҳои зимистонаи варзиш ба бозиҳо дар ҷаҳон меафзояд. Аз 4 то 20 феврали соли 2022 беҳтарин варзишгарони намудҳои зимистонаи варзиш дар пойтахти Ҷумҳурии Мардумии Чин, ҳамчунин Жангҷакоу ҷамъ меоянд ва барои ба даст овардани 109 медали тиллои олимпӣ талош мекунанд.

Дар Бозиҳои Пекин-2022 мусобиқаҳо аз рӯи 15 равияи варзишии 7 намуди варзиш: биатлон; бобслей (скелетон); кёрлинг; хоккей; чанасаворӣ; конкитозӣ (рақси рӯи ях, шорт-трек, конкитозӣ) ва лижаронӣ (лижаронии кӯҳӣ, лижаронии босуръат, лижаронии тарзи озод, дуҳарба, ҷаҳиш аз трамплин ва сноуборд) доир мегарданд.

Тақдими 109 маҷмӯи медалҳо дар нақша аст, ки нисбат ба Бозиҳои Пйонгчанг-2018 7 маҷмӯъ бештар мебошад. Мусобиқаҳои нав дар намудҳои бобслей, шорт-трек, лижаронии тарзи озод, ҷаҳиш аз трамплин ва сноуборд гузаронида хоҳанд шуд. Аз ҷумла, аввалин мусобиқаи олимпӣ оид ба монобоб (бобслей-якнафарӣ) миёни бонувон. Ҳамчунин барномаи Бозиҳоро мусобиқаҳои нави лижаронии тарзи озод миёни мардон ва бонувон — биг эйр, сабқати даставии омехта дар ҷаҳиш аз трамплин, даставии омехта дар сноуборд-кросс, даставии омехта дар шорт-трек ташкил додаанд.

Бозиҳои Пекин дар таърихи Бозиҳои олимпӣ аз ҷиҳати таъмини баробарии гендерӣ беҳтарин хоҳад буд: шумораи квотаҳо барои бонувон аз 41 дар сади соли 2018 дар Пйонгчанг то 45 дар сад афзоиш ёфт. Инчунин дар таърихи ҳаракати олимпӣ Пекин аввалин шаҳре хоҳад шуд, ки ҳам Бозиҳои тобистона ва ҳам Бозиҳои зимистонаи олимпиро мизбонӣ мекунад.

Маросими кушодашавӣ ва пӯшидашавии бозиҳо дар Варзишгоҳи миллӣ, ки бо номи “Лонаи паранда” машҳур аст ва варзишгоҳи асосӣ барои баргузории Бозиҳои олимпии соли 2008 буд, доир мешавад.

Ҳамаи мусобиқаҳо дар болои ях дар Пекин мегузаранд, аз ҷумла дар иншооти варзишие, ки дар Бозиҳои олимпии соли 2008 истифода шуда буданд, мисли маркази миллии варзишҳои обӣ, ки барои мусобиқаи керлинг мувофиқ карда шудааст.

Пандаи бузург бо номи Bing Dwen Dwen тилисми расмии Бозиҳои зимистонаи олимпии Пекин-2022 мебошад. Bing маънои покӣ ва тавоноиро дорад, Dwen Dwen кӯдаконро ифода мекунад. Тилисм неру ва иродаи варзишгаронро таҷассум намуда, ба тарғиби рӯҳияи олимпӣ мусоидат хоҳад кард.

Нишони бозиҳо дар асоси иероглифи чинии “зимистон” 冬 сохта шудааст. Он шакли варзишгари рақси рӯи яхро аз боло ва лижаронро аз поён таҷассум мекунад.

Ёдовар мешавем, ки Кумитаи миллии олимпии Тоҷикистон дар ҳамкорӣ бо Ассотсиатсияи намудҳои зимистонаи варзиши Тоҷикистон ду варзишгар – Баҳриддин Ғоибов ва Сайфиддини Низомиддинро дар намуди лижаронии кӯҳӣ ҷиҳати ба даст овардани роҳхати Бозиҳои зимистонаи олимпии Пекин-2022 сафарбар кардаанд. Онҳо ҳар моҳ дар ҳаҷми 1500 доллари ИМА кумакпулии олимпӣ мегиранд, ки барои тамрин ва иштирок дар мусобиқаҳои интихобӣ пешбинӣ шудааст.

АКСҲО аз КМО Тоҷикистон

Февраль 7, 2021 09:05

Хабарҳои дигари ин бахш

Бахшида ба Рӯзи варзишгарон дар Панҷакент майдончаи муосири варзишӣ ба истифода дода шуд
Дар Ниммарафони байналмилалии экологии кӯҳии «Seven Lakes» варзишгарони 10 давлати ҷаҳон иштирок намуданд
Ноибони Президенти ФФТ бо ҳолати омодагии варзишгоҳҳои шаҳри Ҳисор ба мусобиқаҳои байналмилалӣ шинос шуданд
Соли 2025 варзишгарони Тоҷикистон дар мусобиқаҳои байналмилалӣ 238 медал ба даст оварданд
НИШАСТИ МАТБУОТӢ. Донишҷӯёни Донишкадаи тарбияи ҷисмонӣ дар мусобиқаҳои байналмилалӣ соҳиби 26 медал шуданд
Таеквондочиёни тоҷик дар Чемпионати Осиё дар Малайзия ду медали биринҷӣ ба даст оварданд
Паҳлавонони тоҷик «Ulaanbaatar Grand Slam-2025»-ро бо як медали нуқра ҷамбаст намуданд
Марҳилаи якуми даврҳои омӯзишӣ оид ба барномаи литсензияи «B» идома дорад
Имрӯз мусобиқаи байналмилалии «Ulaanbaatar Grand Slam-2025» оид ба гӯштини ҷудо оғоз меёбад
Дар Чемпионати ҷаҳон оид ба варзиши намудҳои обӣ 2 варзишгари Тоҷикистон иштирок менамоянд
Бозии интихобии Ҷоми Осиё-2027 байни Тоҷикистон ва Малдив дар Хуҷанд баргузор мешавад
Тоҷикистон бозиҳои марҳилаи интихобии Ҷоми Осиё-2026 байни духтарони то 17-соларо мизбонӣ менамояд