ЭМОМАЛӢ РАҲМОН: ҶАВОНОН МЕТАВОНАНД САДДИ БОЭЪТИМОДИ ПАҲНШАВИИ ЭКСТРЕМИЗМ ВА ТЕРРОРИЗМРО ЭҶОД КУНАНД. Дирӯз дар Тошканд дар ин бора конфронси байналмилалӣ баргузор шуд

Февраль 19, 2021 16:55

ДУШАНБЕ, 19.02.2021. /АМИТ «Ховар»/. 18 феврал дар Тошканд Конфронси байналмилалии «Нақши ҷавонон дар мубориза бо радикализм, экстремизм ва терроризм» баргузор гардид. Тавре хабарнигори АМИТ «Ховар» иттилоъ медиҳад, ин чорабинӣ бо ибтикори Агентии кор бо ҷавонони Ӯзбекистон, Вазорати корҳои дохилии Ҷумҳурии Ӯзбекистон, Иттифоқи ҷавонони Ӯзбекистон, Машварати ҳамкорӣ ва тадбирҳои боварӣ дар Осиё (CICA)*, Котиботи СҲШ, Кумитаи иҷроияи ИДМ, Ҷамъияти Олмон оид ба ҳамкории байналмилалӣ (GIZ), Ҳамоҳангсози лоиҳаҳои САҲА, БРСММ дар Ӯзбекистон ва Дафтари минтақавии Идораи минтақавии СММ оид ба маводи мухаддир ва ҷинояткорӣ дар Осиёи Марказӣ доир шуд.

Хабарнигорони АМИТ «Ховар” гузориш медиҳанд.

Дабири кулли СҲШ Владимир Норов зимни суханронӣ дар маросими ифтитоҳи чорабинӣ изҳор дошт, мушкилоти иқтисодӣ ва иҷтимоии пандемия, ки бо коҳиш ёфтани сатҳи таҳсилот, афзоиши якбораи бекорӣ ва камбизоатӣ алоқаманданд аст, пеш аз ҳама, таъсири манфии бештарро ба ҷавононе мерасонанд, ки мушкилотро бо худтатбиқкунӣ ва ҳарос аз оянда аз сар мегузаронанд.

Тавре дар конфронс зикр гардид, ба ин мавзӯъ дар Паёми Президенти Тоҷикистон, Пешвои миллат муҳтарам Эмомалӣ Раҳмон 26 январи соли равон таваҷҷуҳи махсус зоҳир карда шуд. Ба гуфтаи Сарвари давлати Тоҷикистон, вазъи тағйирёбандаи ҷаҳони имрӯза ва хусусияти устувор пайдо намудани зуҳуроти хатарноки замони муосир, аз ҷумла терроризму экстремизм, қочоқи силоҳ, гардиши ғайриқонунии маводи мухаддир, киберҷиноятҳо ва дигар ҷиноятҳои фаромиллӣ, ки башариятро ба ташвиш овардаанд, моро водор месозад, ки ба масъалаҳои таъмини амнияти кишварамон диққати аввалиндараҷа диҳем.

«Президенти мамлакати мо борҳо таъкид кардаанд, ки маҳз ҷавонон метавонанд садди боэътимоди паҳншавии экстремизм ва терроризмро эҷод кунанд»,-гуфт мудири шуъбаи робитаҳои байналмилалии Кумитаи кор бо ҷавонон ва варзиши назди Ҳукумат Ҷумҳурии Тоҷикистон Шабнам Раҳимзода, ки дар конфронси онлайнии Тошканд иштирок ва суханронӣ намуд. «Пайравони созмонҳои террористиву экстремистӣ барои ноором сохтани вазъият дар ҷомеа ва тафриқаандозиву барангехтани низоъҳои диниву мазҳабӣ кӯшиш карда, барои гумроҳ сохтани сокинони мамлакат, бахусус, ҷавонон ва ба созмонҳои манъшуда ҷалб намудани онҳо аз шабакаҳои интернетӣ васеъ истифода мебаранд”, — иқтибос овард Ш. Раҳимзода аз суханони Президенти Тоҷикистон дар Паём.

ДАР АКС: Намояндаи Тоҷикистон Шабнам Раҳимзода дар видеоконфронси байналмилалӣ дар Тошканд

Шабнам Раҳимзода ба иштирокчиёни конфронси онлайнӣ иттилоъ дод, ки бо супориши Сарвари давлат Прокуратураи генералии Тоҷикистон ба таҳияи Стратегияи миллии Ҷумҳурии Тоҷикистон оид ба мубориза бо терроризм ва экстремизм барои солҳои 2021-2025 шурӯъ кардааст.

ДАР АКС: Дабири кулли СҲШ В.Норов

Дабири кулли СҲШ дар суханронии худ иттилоъ дод, ки имсол Созмони ҳамкории Шанхайро Тоҷикистон раисӣ мекунад ва нишасти 20-уми сарони кишварҳои узви СҲШ таҳти шиори «20 соли СҲШ: ҳамкорӣ барои субот ва шукуфоӣ” дар Душанбе доир хоҳад шуд. Ба гуфтаи Дабири кулл, имсол бо мусоидати раёсати Ҷумҳурии Тоҷикистон барои таъмини иштироки фаъоли насли ҷавон дар ҳаёти сиёсӣ, иқтисодӣ ва фарҳангии кишварҳои минтақаи мо як қатор чорабиниҳо ба нақша гирифта шудаанд. Аз ҷумла, баргузории як конфронси байналмилалӣ оид ба таҳкими ҳамкорӣ ҷиҳати муқовимат бо ҷалби ҷавонон ба гурӯҳҳои тахрибкор дар Душанбе дар моҳи августи соли ҷорӣ ба нақша гирифта шудааст.

Иттилоъ дода шуд, ки илова бар ин, дар доираи чорабиниҳои бахшида ба саммит, тобистон имсол дар пойтахти Тоҷикистон ҷаласаи Шӯрои ҷавонони СҲШ баргузор мегардад, ки дар он иштирокдорон масъалаҳои таҳдиди терроризм, экстремизм ва амният дар фазои СҲШ-ро баррасӣ мекунанд.

                                                             Саид АЛӢ,
Холисаи АСОМИДДИН,
Акрамхоҷи АКБАР,
Бекназари АБӮБАКР,
АМИТ “ Ховар»

                                                           АКСҲО аз АМИТ «Ховар» ва CICA

______________________________________

*Дар забони англисӣ ин созмон чунин номида мешавад: CICA – Conference on Interaction and Confidence Building Measures in Asia.

Февраль 19, 2021 16:55

Хабарҳои дигари ин бахш

Мавлуда Қаландарзода: «Дар ҷодае, ки зан фаъолият дорад, он ҷо адлу инсоф пойдор ва тартибу низом ҳукмфармост»
COVID-19: Шабонарӯзи охир дар Тоҷикистон ягон ҳолати нави гирифторшавӣ ба ин беморӣ ба қайд гирифта нашуд
«МОДАР БУЗУРГУ МУҚАДДАС АСТ…». Таҷлили Рӯзи Модар на аз замони юнониҳои қадим ва на аз собиқ Рӯзи байналмилалии озодии занон, балки аз анъанаҳои бостонии аҷдодони миллати тоҷик маншаъ мегирад
МОДАР СУТУНИ ОИЛА ВА ҶОМЕА МЕБОШАД. Раёсати маорифи ВМКБ муаллимаҳои вилоятро бо Рӯзи Модар табрик намуд
Муътабар Зоидова — зани ихтироъкори тоҷик, ки дар намоишгоҳи Корея сазовори медали тилло гардид
COVID-19: Шабонарӯзи охир дар Тоҷикистон ягон ҳолати нави гирифторшавӣ ба ин беморӣ ба қайд гирифта нашуд
СИТОДИ ҶУМҲУРИЯВӢ: барои гузаронидани ваксинатсияи аҳолӣ бар зидди сирояти нави коронавирус чорабиниҳои омодагӣ ба роҳ монада шавад
COVID-19: Шабонарӯзи охир дар Тоҷикистон ягон ҳолати нави гирифторшавӣ ба ин беморӣ ба қайд гирифта нашуд
Зарина Норова: «Занҳои афғон низ мехоҳанд чун мо Сарвари ғамхор дошта бошанд, то ҳамроҳи фарзандон дар фазои орому осуда умр ба сар баранд»
COVID-19: Шабонарӯзи охир дар Тоҷикистон ягон ҳолати нави гирифторшавӣ ба ин беморӣ ба қайд гирифта нашуд
COVID-19. Беш аз 80%-и аҳолии Тоҷикистон бар зидди коронавирус ваксина гирифтан мехоҳанд
Шабонарӯзи охир дар ҷаҳон зиёда аз 440 ҳазор ҳолати сирояти коронавирус ошкор гардид

Маводҳои таҳлилӣ