«ФУТБОЛ БА НАЗДИ ШУМО МЕОЯД!». Имрӯз ҳаштумин мавсими бозиҳои Лигаи футболи кӯдакон ва наврасон оғоз мегардад

ДУШАНБЕ, 07.02.2021 /АМИТ «Ховар»/. Имрӯз, 7 феврал бозиҳои Лигаи футболи кӯдакон ва наврасони Тоҷикистон «Футбол ба назди шумо меояд» оғоз мегардад. Имсол Лига ба 30-солагии Истиқлоли давлатии Ҷумҳурии Тоҷикистон бахшида шуда, дар тамоми минтақаҳои кишвар соати 10:00 оғоз меёбад.

Тавре АМИТ «Ховар» бо истинод ба Федератсияи футболи Тоҷикистон хабар медиҳад, дар мавсими ҷорӣ бозиҳои Лига аз рӯи се категорияи синну сол дар байни кӯдакони на калонтар аз 7, 9 ва 11-сола сурат гирифта, иваз кардани бозингарон ҳатмист, то ҳамаи кӯдакон имкони якхелаи вақти бозӣ дошта бошанд.

Tcell ҳамчун сарпараст бо дастгирии Лигаи футболи кӯдакон «Футбол ба назди шумо меояд» ба насли ҷавон ғамхорӣ зоҳир мекунад, зеро маҳз дар айёми хурдсолӣ асос ва заминаҳои ҳаёти солим гузошта мешаванд.

Дар мавсими гузашта дар бозиҳои Лига 18600 нафар кӯдакон аз саросари Тоҷикистон ширкат варзиданд.

АКС аз ФФТ