Корхонаҳои саноатии Бохтар соли 2020 ҳаҷми истеҳсолотро 5,6% зиёд кардаанд

БОХТАР, 15.02.2021 /АМИТ «Ховар»/. Корхонаҳои саноатии Бохтар дар соли 2020 истеҳсоли маҳсулот ва пешниҳоди хизматрасониро 5,6% зиёд кардаанд, зикр кард имрӯз раиси шаҳри Бохтар Сиҷоуддин Саломзода зимни нишасти матбуотӣ.

Ба гуфтаи номбурда, истеҳсоли маҳсулот 220,7 миллион сомониро ташкил намуд, ки нисбат ба соли 2019 11,7 миллион сомонӣ зиёдтар аст.

«Давоми сол дар шаҳр 96 иншоот бо 318 ҷойи нави кори доимӣ ба истифода дода шуданд. Арзиши умумии сохтмонҳо ва бозсозии ҳамаи иншоот 123,8 млн сомониро ташкил намуд”, — гуфт раиси Бохтар.

 Дар давраи ҳисоботӣ барои татбиқи ҳадафи чорум — саноатикунонии босуръати кишвар дар минтақаи саноатии Бохтар 2 корхонаи саноатӣ оид ба истеҳсоли хӯрокворӣ (макарон, конфет), велосипедҳо ва бофандагӣ дар ҳузури Сарвазир Қоҳир Расулзода ба истифода дода шуда буданд. Дар ин корхонаҳо 135 ҷои нави кори доимӣ таъсис дода шудаанд.