Котиби Шӯрои амният, роҳбарони Вазорати мудофиа ва Вазорати корҳои хориҷии Тоҷикистон бо Дабири кулли СААД мулоқот намуданд

Февраль 17, 2021 21:05

ДУШАНБЕ, 17.02.2021. /АМИТ «Ховар»/. Имрӯз Котиби Шӯрои амнияти Ҷумҳурии Тоҷикистон Насрулло Маҳмудзода бо Дабири кулли Созмони Аҳдномаи амнияти дастаҷамъӣ Станислав Зас, ки бо сафари корӣ дар шаҳри Душанбе қарор дорад, мулоқот анҷом дод, хабар медиҳад АМИТ «Ховар».

Дар ҷараёни мулоқот масъалаҳои ҳамкории Котиботи Созмони Аҳдномаи амнияти дастаҷамъӣ ва Котиботи Шӯрои амнияти Ҷумҳурии Тоҷикистон, аз ҷумла дар самти ҳамкории ҳарбӣ, таҳкими сарҳадот, вазъи имрӯзаи Ҷумҳурии Исломии Афғонистон, мубориза бар зидди маводи мухаддир, ҷиноятҳои киберӣ, омӯзиши иловагии касбии мутахассисони мақомоти марбута ва дигар масъалаҳои амнияти минтақавӣ баррасӣ гардиданд.

Қарор карда шуд, ки ҳамкорӣ дар доираи муқаррароти оинномавии Созмон идома ёфта, тақвият бахшида мешавад.

Ҳамзамон доир ба раёсати Ҷумҳурии Тоҷикистон дар Созмони аҳдномаи амнияти дастаҷамъӣ, ташкил ва баргузории чорабиниҳо дар давраи раёсати Тоҷикистон, аз ҷумла омодагӣ ва баргузории ҷаласаи Кумитаи котибони шӯроҳои амнияти СААД дар шаҳри Душанбе мубодилаи афкор сурат гирифт.

Дар хотимаи мулоқот ҷонибҳо ба мувофиқа расиданд, ки чорабиниҳои мазкурро дар ҳамдастӣ омода ва доир менамоянд.

***

Имрӯз Вазири мудофиаи Ҷумҳурии Тоҷикистон, генерал-полковник Шералӣ Мирзо ва Дабири кулли Созмони Аҳдномаи амнияти дастаҷамъӣ Станислав Зас низ мулоқот намуданд.

Ҷонибҳо баргузории ҷаласаи Шӯрои вазирони мудофиаи СААД баҳори соли ҷорӣ дар шаҳри Душанбе, ҳамкории ҳарбӣ, ҳарбӣ-техникӣ ва ҳарбӣ-иқтисодиро дар доираи СААД ва татбиқи афзалияти ҷониби Тоҷикистонро дар ин соҳаҳо дар давраи раисии Тоҷикистон дар Созмон дар соли 2021 баррасӣ карданд.

Аҳамияти баланд бардоштани сатҳи омодагии неруҳои амнияти дастаҷамъӣ ҷиҳати иҷрои вазифаҳо, аз ҷумла тавассути гузаронидани чораҳои муштараки фаврӣ ва омӯзишии ҷангӣ таъкид карда шуд. Аз ҷумла, онҳо дар бораи такмили низоми фармондеҳӣ ва идоракунии неруҳои дастаҷамъии вокуниши сареъ, баланд бардоштани сатҳи омодагии неруҳои посдори сулҳи СААД ва муҷаҳҳаз кардани онҳо бо силоҳҳои муосир, техникаи низомии махсус ва лавозимоти махсус бо назардошти имконоти ҷалби онҳо ба амалиёти муҳофизати сулҳ таҳти сарпарастии СММ суҳбат намуданд.

Вазири мудофиаи Тоҷикистон ва Дабири кулли СААД машқҳои дарпешистодаи неруҳо ва воситаҳои амнияти дастаҷамъиро, ки дар қаламрави Ҷумҳурии Тоҷикистон соли 2021 ба нақша гирифта шудаанд, баррасӣ карданд. Инҳо машқҳои муштарак бо Неруҳои зудамали дастаҷамъии СААД «Ҳамгироӣ-2021», машқи махсус бо неруҳо ва воситаҳои иктишофии «Ҷустуҷӯ-2021», машқи махсус бо неруҳо ва воситаҳои ТМТ Қӯшунҳои (Неруҳои дастаҷамъии) СААД «Эшелон-2021» мебошанд.

Тавре қаблан АМИТ “Ховар” иттилоъ дод, имрӯз Вазири корҳои хориҷии Ҷумҳурии Тоҷикистон Сироҷиддин Муҳриддин Дабири кулли Созмони Аҳдномаи амнияти дастаҷамъӣ Станислав Засро, ки бо сафари корӣ дар Тоҷикистон қарор дорад, ба ҳузур пазируфт.

Дар мулоқот ҷонибҳо атрофи масоили ҳифзи сулҳу субот дар минтақаи масъулияти Созмон, вокуниши саривақтӣ ба чолишу таҳдидҳои муосир, инчунин афзун гардонидани ҳамкории кишварҳои узви СААД дар соҳаҳои сиёсиву дипломатӣ, ҳарбӣ, ҳарбӣ-техникӣ ва ҳарбӣ-иқтисодӣ табодули афкор намуданд.

Бо дарназардошти раёсати Тоҷикистон дар Созмон С.Муҳриддин таваҷҷуҳи кишварро ба ҳамкории зич бо Котиботи СААД ва ниҳодҳои он ҷиҳати пешбурди рӯзафзуни самтҳои авлавиятноки раёсат таъкид кард.

Гузашта аз ин, ҷонибҳо роҷеъ ба ҳамоҳангсозии баъдии мавқеъҳо ва ба ҳам наздик сохтани равишҳои кишварҳои узв дар масъалаҳои минтақавию байналмилалӣ мубодилаи афкор намуда, ҷараёни омодагии кишварро ба нишасти дарпешистодаи Шӯрои вазирони корҳои хориҷии СААД, ки баҳори имсол дар Тоҷикистон ба нақша гирифта шудааст, мавриди баррасӣ қарор доданд.

АКСҲО аз АМИТ «Ховар»

Февраль 17, 2021 21:05

Хабарҳои дигари ин бахш

АМАЛИЁТИ «БАЧАҲО». Бо мақсади пешгирии ҳодисаҳои роҳу нақлиёт бо иштироки кӯдакону наврасон гузаронида мешавад
Сатҳи забондонии кормандони милитсияи Хатлон санҷида мешавад
Дар шаш моҳ дар Тоҷикистон 495 ҳолати машғул шудан ба ҷодугарӣ ва фолбинӣ ошкор карда шуд
«МАДАНИЯТИ ШАҲРДОРӢ». Дар Хатлон бо мақсади таҳким бахшидани ҳамкорӣ бо аҳолӣ амалиёт гузаронида шуд
Дар Душанбе татбиқи марҳилаи дуюми лоиҳаи «Шаҳри бехатар» баррасӣ гардид
Дар Хатлон масъалаҳои ҳифзи тартиботи ҷамъиятӣ баррасӣ карда шуданд
Дар Вазорати мудофиаи Тоҷикистон тарҳрезии либоси хизматчиёни ҳарбӣ дар шакли ягонаи миллӣ баррасӣ гардид
Сатҳи забондонии кормандони Вазорати корҳои дохилӣ санҷида мешавад
ДАСТОВАРДИ ДАВРОНИ СОҲИБИСТИҚЛОЛӢ. Ба таъсиси Кумитаи ҳолатҳои фавқулода ва мудофиаи граждании Тоҷикистон 31 сол пур шуд
Ҳамкорӣ дар самти пешгирии ҷинояткорӣ байни милитсияи Душанбе ва Тошканд тақвият меёбад
Дар Хоруғ машқи омодабошии мудофиаи ҳудудӣ ва захираҳои сафарбарӣ баргузор шуд
Дар роҳҳои Душанбе санҷишҳо гузаронида мешаванд