Осорхонаи миллӣ соли 2021 реҷаи нави корӣ ҷорӣ намуда, акнун ҳамарӯза тамошои он имконпазир гардид

Февраль 1, 2021 14:01

ДУШАНБЕ, 01.02.2021 /АМИТ «Ховар»/. Аз 1 феврали соли равон  реҷаи кории  Осорхонаи миллии Тоҷикистон  тағйир ёфта, вуруд ва тамошои он ҳамарӯза аз соати 10:00 то 20:00 имконпазир гардидааст.  Аз ин пеш   Осорхонаи миллӣ рӯзҳои душанбе фаъолият накарда,   реҷаи кории он аз рӯзи сешанбе то шанбе, аз соати 10:00 то 17:00 ба роҳ монда шуда буд.  Осорхонаи миллӣ дар рӯзҳои якшанбе аз соати 11:00 то 16:00  фаъолият мекард.

Аз ҷониби роҳбарият ҷадвали фаъолияти муассиса таҷдиди назар шуда, тамоми шаҳрвандони дохилӣ ва хориҷии мамлакат, аз ҷумла кормандони вазорату идора, кумитаву муассисаи давлатӣ, инчунин сафорату ташкилоту созмонҳои хориҷии дар мамлакат амалкунанда метавонанд тибқи реҷаи нави корӣ ба тамошои Осорхонаи миллӣ раванд.

Тавре корманди Осорхонаи миллии Тоҷикистон Шаҳло Абдуллоева ба хабарнигори АМИТ «Ховар»  иброз намуд, бахшида ба ҷашни 30-солагии Истиқлоли давлатии Ҷумҳурии Тоҷикистон ҷиҳати гардиши нигораҳои фонд имрӯз роҳрав ва толорҳои намоишӣ аз ҳисоби экспонатҳои нодири фонди муассиса, аз ҷумла мусаввараҳо, пайкара ва нимпайкараҳо, сиккаҳо, китобҳои дастнавис ва чопи сангӣ, хушнависӣ, ашёи сафоливу мисӣ (офтоба, кӯза, лаълӣ), хунарҳои мардумӣ (сӯзанӣ, рӯйҷо, болинпӯш) бозёфтҳои бостоншиносии тиллоӣ (сикка, гӯшвора), инчунин бозёфтҳои ёдгории Саразми бостон мукаммал гардидаанд.

Тамошобинон метавонанд тавассути тамошои нигораҳои дар сатҳи баланди касбӣ пурранамудаи роҳбарият ва кормандони илмӣ, инчунин ба роҳ мондани сайрҳои осорхонавии роҳбаладони муассиса бо бозёфтҳою ёдгориҳои таърихӣ ва осори арзишманди ниёгонамон аз наздик шинос шаванд.

Бояд тазаккур дод, ки Осорхонаи миллии Тоҷикистон  20 марти соли 2013 дари худро ба рӯи тамошобинон боз намуда, дар як муддати кӯтоҳ ба яке аз ҷойҳои дӯстдоштаи хурдсолону калонсолон табдил ёфтааст.

Осорхона маконест, ки мероси таърихию фарҳангиро дар худ нигоҳ дошта, баёнгари таърихи гузашта ва имрӯза буда, дар ҳаёти фарҳангии ҳар давлат нақши муҳим мебозад. Осорхонаҳо аз азал ҷойи дӯстдоштаи одамон ба шумор мерафтанд, чунки  ҳамеша муҳити «интихоби озод» — ро барои тамошобинон пешниҳод менамоянд.

Тавассути тамошои нигораҳои Осорхонаи миллии Тоҷикистон тамошобинон метавонанд бо таърих ва фарҳанги пурғановати халқи тоҷик шинос шуда, савияи дониши таърихии худро баланд бардоранд ва ба ин васила худшиносӣ, худогоҳӣ ва ҳувияти миллии хешро тақвият бахшанд.

Февраль 1, 2021 14:01

Хабарҳои дигари ин бахш

Барои мукофотонидани ғолибони Озмуни ҷумҳуриявии «Шоҳномахонӣ» 2 миллиону 660 ҳазор сомонӣ ҷудо карда мешавад
ТУҲФАИ АРЗАНДАИ ПРЕЗИДЕНТИ ТОҶИКИСТОН. Ба беш аз 57 ҳазор оилаи шаҳри Ваҳдат «Шоҳнома» тақдим мегардад
ИЛМ ДАР БАЛАНДИИ ЗИЁДА АЗ 5000 МЕТР. Дар калонтарин пиряхи Тоҷикистон — Ванҷях таҳқиқоти илмӣ гузаронида шуд
Академияи миллии илмҳои Тоҷикистон бо Донишгоҳи давлатии омӯзгории Шинҷони Чин ҳамкориро тақвият медиҳад
Ёдгориҳои нодири тамаддуни тоҷикон дар Осорхонаи миллии Чин ба намоиш гузошта шуданд
Аз ҷониби нашриёти «Адиб» чор китоб ба нашр расид
Туҳфаи арзишманди Пешвои миллат — китоби «Шоҳнома» ба ноҳияи Файзобод расид
Байни консерваторияҳои Тоҷикистон ва Чин Ёддошти тафоҳум ба имзо расид
Намояндагони Шурои байналмилалии ҳунармандӣ бо намунаҳои сӯзании Панҷакент шинос шуданд
Сокинони шаҳри Роғун соҳиби туҳфаи Президенти Тоҷикистон — «Шоҳнома»-и Абулқосим Фирдавсӣ гардиданд
«АНДАЛЕБ-2025». Дар Панҷакент даври шаҳрии фестивал- озмуни ҷумҳуриявии телевизионӣ доир шуд
Намояндаи Тоҷикистон дар ҳамоиши тарғибгарони илм дар Чин иштирок намуд