Донишгоҳи давлатии тиҷорати Тоҷикистон 292 нафар донишҷӯро аз пардохти маблағи хобгоҳ озод намуд

ДУШАНБЕ, 27.03.2021 /АМИТ «Ховар»/. Донишгоҳи давлатии тиҷорати Тоҷикистон 292 нафар донишҷӯеро, ки дар хобгоҳи донишгоҳ истиқомат мекунанд ва маблағи хобгоҳро барои шашмоҳаи дуюми соли таҳсили 2020-2021, яъне  аз моҳи январ то моҳи июни соли равон насупоридаанд, аз пардохти маблағи хобгоҳ озод намуд.

Тавре аз Раёсати Донишгоҳи давлатии тиҷорати Тоҷикистон ба АМИТ «Ховар» иттилоъ доданд, аз 1 январи соли равон андозаи музди меҳнати ҳамаи кормандони донишгоҳи мазкур   5 фоиз зиёд гардида, омӯзгорону кормандоне, ки дар хобгоҳи донишгоҳ зиндагӣ мекунанд, аз пардохти маблағ барои истиқомат дар хобгоҳ озод гардиданд.

Иқдоми мазкур дар асоси сиёсати маорифпарваронаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва бо мақсади сазовор истиқбол гирифтани ҷашни 30-солагии Истиқлоли давлатии Ҷумҳурии Тоҷикистон дар мувофиқа бо муассис- Иттифоқи «Тоҷикматлубот» роҳандозӣ гардида,  ҳадаф аз он баланд бардоштани нуфузу эътибори олимону омӯзгорон дар ҷомеа ва ғамхорӣ намудан ба донишҷӯён мебошад.